ސަރުކާރުގެ ގެދޮރުވެރިޔާ ސްކީމްގެ ދަށުން ބެހި 4000 ފްލެޓް ގެ ތެރެއިން އާއިލާގެ ތިން މެމްބަރުނަށް ފްލެޓް ލިބިފައިވަނީ ޝަރުތު ހަމަވާތީ ކަމަށް ރައްޔިތުންގެ މަޖިލީހުގެ ދުވާފަރު ދާއިރާގެ އެމްޑީޕީ މެމްބަރު އިސްމާއީލް އަހުމަދު ވިދާޅުވެއްޖެއެވެ.

މިދިޔަ ހޮނިހިރު ފްލެޓް ލިބޭ ފަރާތް ތައް އާންމު ކުރި އިރު އިސްމާއިލް އަހުމަދުގެ އާއިލާ މީހުނަށް ފްލެޓް ލިބިފައި ވާތީ މީހުންގެ ފާޑު ކިޔުން ވަނީ އަމާޒުވެފައެވެ. ބައެއް މީހުން ބުނާ ގޮތުގައި އިސްމާއީލް އަހުމަދުގެ އާއިލާ މީހުނަށް ފްލެޓް ދީފައި ވަނީ ސަރުކާރުން ނުފޫޒު ފޯރުވައިގެންނެވެ.

މިކަމާއި ގުޅޭގޮތުން އިސްމާއީލް އަހުމަދު ފޭސްބުކް ގައި ކުރެއްވި ޕޯސްޓެއްގައި ވަނީ ފްލެޓް ލިބުނު ފަރާތް ތަކަކީ 15 އަހަރު ވަންދެން މާލޭގައި އާއިލާ އެއް ގޮވައިގެން އުޅުނު ބައެއް ކަމަށާއި އެމީހުން ދަންނަ އެންމެނަށް ވެސް އެއީ އެ ފްލެޓަށް ޝަރުތު ހަމަވާ ފަރާތް ތަކެއްކަން އެނގޭނެ ކަމަށެވެ.  

ފްލެޓް ލިބުނު ތިން މީހުންގެ އިތުރުން އޭނާއާއި ގުޅުން ހުރި އިތުރު ހަތަރު މީހަކުވެސް 4000 ފްލެޓް ގެ ތެރެއިން ފްލެޓް ހޯދުމަށް ލައިފައިވީ ނަމަވެސް އެ ހަތަރު މީހުންނަށް އެކަން ކަށަވަރު ކޮށްދެވޭ ވަރަށް ލިޔެކިއުން ހުށައެޅިފައިނުވާތީ ފްލެޓް ނުލިބޭ ކަމަށް އޭނާ ވިދާޅުވިއެވެ.

"ވަކި ރަށަކަށް އަދި ވަކި އާއިލާއަކަށް ނިސްބަތްވުމަކީ ސަރުކާރުން ހިންގާ މި ފަދަ ޕްރޮގްރާމްތަކުން މަހުރޫމްވާން ޖެހޭ ކަމަކަށް ނުދެކެން. އެގޮތުން އެމީހަކަށް މުހިންމު އަދި އެކަމެއްގެ ޝަރުތުތައް ފުރިހަމަވާ ކަމަށް ލަފާ ކުރެވޭ މިކަހަލަ ކޮންމެ ކަމެއްގައި ކޮންމެ ދިވެހި ރައްޔިތަކަށް ބައިވެރިވުމުގެ ހައްގު އޮންނަން ވާނެ ކަމަށް ދެކެން." އިސްމާއީލް ވިދާޅުވިއެވެ.

ގެދޮރުވެރިޔާ ސްކީމް ގެ ދަށުން 4000 ފްލެޓް ބަހާފައިވާ ގޮތާއި މެދު ރައްޔިތުން ވަނީ ވަރަށް ބޮޑެތި ކަންބޮޑުވުންތަކެއް ފާޅުކޮށްފައެވެ. އެކަމާއި ގުޅިގެން ދާއިމީ ލިސްޓަށް ޝަކުވާ ހުށަހަޅަންވެސް މިހާރު ވަނީ ހުޅުވާލާފައެވެ.