ވެރިކަން ކުރާ މާލޭގެ އިތުރުންވެސް ރަށް ރަށަށް ބޯހިޔާވަހިކަން ފޯރު ކޮށްދިނުމުގެ މަޝްރޫއު އަންނަ އަހަރުގެ ބަޖެޓްގައި އޮތް ކަމަށް އާބަންކޯގެ މެނޭޖިން ޑިރެކްޓަރު ފަޒުލް ރަޝީދު ވިދާޅުވެއްޖެއެވެ.
ފަޒުލް މިފަދައިން ވިދާޅުވީ ޕީއެސްއެމްގެ ރާއްޖެ މިއަދު ޕްރޮގްރާމްގައި ވާހަކަފުޅު ދައްކަވަމުންނެވެ.
"މެނިފެސްޓޯގައި ހުރި ކަންތައް ތަކަކީ ހުސް އެކަނި މި ގްރޭޓާ މާލެ އޭރިއާ ނޫނީ މިސަރަހައްދަށް ބޯހިޔާވަހިކަން އިތުރުކުރުމެއް ނޫނޭ، ރަށް ރަށުންވެސް އެފުރުސަތު ފަހި ކޮށްދިނުމަށްޓަކައި އެ ވައުދު ރައީސް އޮތީ ވެދެއްވާފައި. އެހެންކަމުން މިކަން ފުރިހަމަ ކުރުމަށްޓަކައިވެސް ހަަމަ މި އަންނަ އަހަރުގެ ބަޖެޓް ގައި ބަޖެޓް ކުރެވިފައި އެބަހުރި."
ފަޒުލް ވިދާޅުވިއެވެ.
މީގެ އިތުރުންވެސް އޭނާ ވިދާޅުވީ ރައީސް ޑރ.މުއިއްޒު ގެ މެނިފެސްޓޯ ކިޔާލެއްވީމަ ހުރިހާ ރައްޔިތުންނަށް ވެސް ހަގީގަތް. އެނގޭނެކަމަށާއި ރަސްމާލެ ހިއްކަނީ ދިވެހި ރާއްޖޭގެ އާބާދީގެ ގިނަ ބައެއް ގްރޭޓާ މާލެ އޭރިއާ ގައި ދިރިއުޅެނީ ކުއްޔަށް ކަމަށް ވާތީ އެތަނުގެ ޑިމާންޑް ބޮޑުވާނެތީ ކަމަށެވެ.
ދިވެހި ރާއްޖެ އެކި އެކި ދިމާލުގައި ރަށް ރަށް އޮންނަ އިރުގައި ރައީސް ޑރ.މުއިއްޒުގެ މެނިފެސްޓޯގައި ބޯހިޔާ ވަހިކަން ބޭނުންވާ ރަށް ރަށުގައި ބިން ހިއްކައިގެން އެކަން ކޮށްދެއްވާނެ ކަމަށް ވިދާޅުވެދެއްވާފައި ވާކަމަށާއި ޒުވާނުންނަށް ބޯހިޔާވަހިކަމުގެ ފުރުސަތު ފަހި ކޮށްދެއްވާނެ ވާހަކަވެސް އެމަނިކުފާނު ވިދާޅުވިކަން ފަޒުލް ފާހަގަ ކުރެއްވިއެވެ.
ވެރިކަމަށް އަންނަނީ މެނިފެސްޓޯ އަކާއި އެކީގައި ކަމަށާއި ރައްޔިތުން ވޯޓު ލަނީ އެ އުންމީދު ހާސިލް ކޮށްދޭނެ ކަމަށް އިތުބާރުކޮށް ކަމަށް ވާތީ ރައްޔިތުންގެ ބޭނުންތައް ރައީސް ޑރ.މުއިއްޒު ފުއްދަވައިދެއްވާނެ ކަމަށް ފަޒުލް ވިދާޅުވިއެވެ.
Advertisement
This content is created and paid for by advertisers and does not involve Voice Journalists
