ފަހަތުން އަރައި ޖޯލި ބީންގ ބަލިކޮށް، ކޯރާ ކޯރާ އިން މުބާރާތް ނިންމާލީ މޮޅަކާއެކު

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ރާ ޒޯނުގެ ގްރޫޕް އޭގެ ފަހު މެޗުގައި މިއަދު ހަވީރު ޖޯލި ބީންގ އާއި ކޯރާ ކޯރާ ވާދަކުރި މެޗު 4-3 ގެ ނަތީޖާއަކުން ކާމިޔާބުކޮށް ކޯރާ ކޯރާ އިން މުބާރާތް ނިންމާލީ މޮޅަކާއެކުގައެވެ.

މި މެޗަށް ނުކުތްއިރު ވެސް ދެޓީމަށް މުބާރާތުގައި އިތުރަށް ކުރިއަށް ދިއުމުގެ ފުރުސަތު ނެތް ނަމަވެސް މި މެޗުގައި ދެޓީމުގެ ފަރާތުން ވަނީ ވަރަށް ވާދަވެރި ކުޅުމެއް ފެނިގެން ގޮސްފައެވެ.

މެޗުގެ ވަރަށް ކުރީކޮޅު ޖޯލި ބީންގ އިން ވަނީ ދެލަނޑުގެ ލީޑެއް ނަގާފައެވެ. އެގޮތުން އެޓީމުގެ ފުރަތަަމަ ލަނޑު މެޗު ފެށިގެން ހަތަރުވަނަ މިނެޓުގައި މުހައްމަދު އަޒުހީން ކާމިޔާބުކޮށްދިންއިރު، އޭގެ ދެ މިނެޓު ފަހުން އެޓީމުގެ ލީޑު ފުޅާކޮށްދިނީ ހަސަން ސޮލާހް އެވެ.

ނަމަވެސް އޭގެ ދެމިނެޓު ފަހުން ކޯރާ ކޯރާ އިން ވަނީ ލަނޑެއް ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިލަނޑު އެޓީމަށް ކާމިޔާބުކޮށްދިނީ އަހުމަދު މުނައްވަރު އެވެ. އަދި ފުރަތަމަ ހާފު ނިމުމުގެ ކުރިން އެޓީމަށް ނަތީޖާ އެއްވަރުކޮށްދިނީ މުހައްމަދު އުލްވާން އެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ވެސް ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިހާފު ފެށިގެން ދެވަނަ މިނެޓުގައި ކޯރާ ކޯރާ އިން ވަނީ ލަނޑެއް ކާމިޔާބުކޮށް މި މެޗުގައި ފުރަތަަމަ ފަހަރަށް ލީޑު ހޯދާފައެވެ. މިލަނޑު އެޓީމަށް ކާމިޔާބުކޮށްދިނީ އަހުމަދު ހާފިޒް އެވެ.

ނަމަވެސް އޭގެ ހަތަރު މިނެޓު ފަހުން ޖޯލި ބީންގ އިން ލަނޑެއް ކާމިޔާބުކޮށް މެޗުގެ ނަތީޖާ އެއްވަރުކުރި އެވެ. މިލަނޑަކީ ކޯރާ ކޯރާގެ ކެޕްޓަން އާދަމް ތައުފީގް އަތުން ބައިކޮޅަށް ވަން ލަނޑެކެވެ.

ކޯރާ ކޯރާ އިން މިމެޗުން މޮޅުވި ލަނޑު ދެވަނަ ހާފުގެ 31 ވަނަ މިނެޓުގައި ކާމިޔާބުކޮށްދިނީ އަހުމަދު މުނައްވަރު އެވެ. މިލަނޑާއެކު މެޗުގެ ކުޅުން ނިމިގެންދިޔައީ 4-3 ގެ ނަތީޖާއަކުން ކޯރާ ކޯރާ ކުރީގައި އޮވެގެންނެވެ. މި މެޗުގެ މޭން އޮފް ދަ މެޗަކަށް ހޮވުނީ މި މެޗުގައި ދެލަނޑު ކާމިޔާބުކުރި ކޯރާ ކޯރާގެ އަހުމަދު މުނައްވަރު އެވެ.

މި މެޗުން ލިބުނު ތިން ޕޮއިންޓާއެކު ކޯރާ ކޯރާ އިން މުބާރާތް ނިންމާލީ ކުޅުނު ތިން މެޗުން ލިބުނު ތިން ޕޮއިންޓާއެކު ގުރޫޕް އޭގެ ތިންވަނަ ޓީމުގެ ގޮތުގައެވެ. އަދި މި މެޗުން ބަލިވި ޖޯލި ބީންގ މުބާރާތް ނިންމާލީ ކުޅުނު ތިން މެޗުން ވެސް ބަލިވެ ގްރޫޕްގެ ފުލުގައި އޮވެއެވެ.

މުބާރާތުގެ ސެމީ ފައިނަލުގެ ފުރަތަމަ މެޗުގައި ސެޕްޓެމްބަރު މަހުގެ 3ވަނަ ދުވަހު ކޮތައިފަރު ނުކުންނާނީ ގްރޫޕް އޭގެ އެއްވަނަ ޖޯލި މޯލްޑިވްސް އާއި ދެކޮޅަށެވެ. އަދި ހަމަ އެދުވަހު ސެމީ ފައިނަލުގެ ދެވަނަ މެޗުގައި އެމެރަލްޑް މޯލްޑިވްސް ނުކުންނާނީ ގްރޫޕް ބީގެ އެއްވަނަ ދިގަލި މޯލްޑިވްސް އާއި ދެކޮޅަށެވެ.

ރިސޯޓް ލީގު ފުޓްސަލް މުބާރާތުގެ ރާ ޒޯނުގައި މިއަހަރު 7 ޓީމަކުން ބައިވެރިވެފައިވާއިރު، މި ޒޯނުގެ ހުރިހާ މެޗެއް ވެސް ކުޅުމަށް ހަމަޖެހިފައިވަނީ ޖޯލި މޯލްޑިވްސް ގައެވެ. އަދި މި މުބާރާތް ކުރިއަށް ދަނީ ބައިވެރިވި 7 ޓީމު ދެ ގްރޫޕަކަށް ބަހާލައިގެންނެވެ.