އެމްޓީސީސީން މެލޭޝިއާގެ ޕްރޮޖެކްޓް މެނޭޖްމަންޓް ކޮންފަރެންސްގައި ބައިވެރިވެއްޖެ

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން މެލޭޝިއާގެ ކުއަލަލަމްޕޫރުގައި ބޭއްވި ބައިނަލްއަޤުވާމީ ޕްރޮޖެކްޓް މެނޭޖްމަންޓް ކޮންފަރެންސެއްގައި ބައިވެރިވެއްޖެއެވެ.

ޕްރޮޖެކްޓް މެނޭޖްމަންޓް އިންސްޓިޓިއުޓް (ޕީއެމްއައި) މެލޭޝިއާ ޗެޕްޓަރުން އިންތިޒާމުކޮށްގެން ބޭއްވި ކުއަލަލަމްޕޫރުގައި މި ކޮންފަރެންސް ފަށާފައިވަނީ އިއްޔެއެވެ. "ޕްރޮޖެކްޓް މެނޭޖަރ އެޒް އޯކެސްޓްރޭޓަރ: ދަ ގާޑިއަން އޮފް ޕްރޮޖެކްޓް ވެލިއު" މި ޝިއާރުގެ ދަށުން ބޭއްވި މި ކޮންފަރެންސްގައި އެމްޓީސީސީގެ ފަރާތުން ބައިވެރިވެވަޑައިގެންނެވީ އެ ކުންފުނީގެ ޗެއަރޕާސަން ސާޢަދާ އިބްރާހީމާއި، ސީނިއަރ ޖެނެރަލް މެނޭޖަރު ޢުމަރު ޒާހިރާއި، ޖެނެރަލް މެނޭޖަރު އިބްރާހީމް ޙަސަންގެ އިތުރުން ކޮންސްޓްރަކްޝަން އެންޑް ޑްރެޖިންގ ޑިވިޜަންގެ ޒޯން މެނޭޖަރުންނެވެ.

މި ކޮންފަރެންސްގައި ޕްރޮޖެކްޓް މެނޭޖްމަންޓް ދާއިރާގެ ބައިނަލްއަޤުވާމީ ތަޖުރިބާކާރުންނާއި އެކި ސިނާޢަތްތަކުގެ އިސް ވެރިން ބައިވެރިވިއެވެ. އެގޮތުން މި ޒަމާނީ ފެންވަރެއްގައި މަޝްރޫޢުތައް ހިންގުމުގެ ނިޒާމުތަކާއި، ޑިޖިޓަލް ބަދަލުތަކާއި، ދެމެހެއްޓެނިވި ތަރައްޤީގެ ލަނޑުދަނޑިތަކާއި، އިސްތިރާތީޖީ ގުޅުންތައް ބަދަހިކުރުމާއި، ހަރުދަނާ ނިންމުންތައް ނިންމުމާ ގުޅޭ ގޮތުން ފުޅާ ދާއިރާއެއްގައި މަޢުލޫމާތާއި ތަޖުރިބާ ޙިއްޞާކޮށްފައިވެއެވެ.

އެމްޓީސީސީން ބުނީ، މިފަދަ ކޮންފަރެންސެއްގައި ބައިވެރިވުމުގެ މައިގަނޑު ބޭނުމަކީ އެ ކުންފުނިން ރާއްޖޭގެ އެކި ކަންކޮޅުތަކުގައި ހިންގަމުންދާ މަޝްރޫޢުތައް މިހާރަށް ވުރެ ހަރުދަނާކޮށް، މަސައްކަތްތައް ވިލަރެސްކުރުމުގެ ފެންވަރު މަތިކުރުން ކަމަށެވެ. އަދި މިއީ މަޝްރޫޢުތައް ކަނޑައެޅިފައިވާ މުއްދަތުގައި ކާމިޔާބުކަމާ އެކު ނިންމުމަށް އިތުރު ބާރަކަށް ވެގެންދާނެ ކަމެއް ކަމަށް ވެސް އެ ކުންފުނިން ފާހަގަކޮށްފައިވެއެވެ.

މި ކޮންފަރެންސުން ލިބުނު ޒަމާނީ ޢިލްމާއި ތަޖުރިބާގެ ސަބަބުން، ދިވެހި ރައްޔިތުންނަށް ދެމެހެއްޓެނިވި އަދި ފެންވަރު ރަނގަޅު ޚިދުމަތްތަކެއް ފޯރުކޮށްދިނުމަށް އެމްޓީސީސީން ކުރަމުންދާ މަސައްކަތްތަކަށް އިތުރު ކުރިއެރުމެއް ލިބިގެންދާނެ ކަމަށް އެ ކުންފުނިން ބުނެފައިވެއެވެ.