ސިވިލް ސަރވިސްއަށް މީހުން ހޮވުމުގެ ނިޒާމު ޒަމާނީކޮށް، ދެފުށް ފެންނަ ގޮތަށް ބަދަލުކުރަނީ

ސިވިލް ސަރވިސްގެ ވަޒީފާތަކަށް މީހުން ހޮވުމުގެ މަރުޙަލާތައް ހާމަކަން ބޮޑު، ދެފުށް ފެންނަ ޒަމާނީ އޮންލައިން ނިޒާމަކަށް ބަދަލުކުރުމުގެ ޢަމަލީ މަސައްކަތްތައް ފަށާފައިވާކަން ސިވިލް ސަރވިސް ކޮމިޝަން (ސީއެސްސީ) އިން ހާމަކޮށްފިއެވެ.

ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް އެ ކޮމިޝަނުގެ 2025 ވަނަ އަހަރުގެ އަހަރީ ރިޕޯޓު ހުށަހަޅުއްވަމުން ކައުންސެލް ޖެނެރަލް އިބްރާހިމް ރަޝީދު ވިދާޅުވީ، ކޮމިޝަނުގެ ޚިދުމަތްތަކުގެ ފެންވަރު މަތިކޮށް، ރައްޔިތުންގެ އިތުބާރު ދެމެހެއްޓުމަށް ގިނަގުނަ އިޞްލާޙީ ފިޔަވަޅުތަކެއް އަޅަމުންދާ ކަމަށެވެ. އެގޮތުން ޝަކުވާތައް ބަލައިގަތުމަށް 'އޮންލައިން ކޮމްޕްލެއިންޓްސް މޮޑިއުލް' އެއް ތަޢާރުފުކޮށް، މައްސަލަތަކަށް އަވަހަށް ޖަވާބުދާރީވެވޭނެ ނިޒާމެއް މިހާރު ޤާއިމުކޮށްފައިވާ ކަމަށް އޭނާ ވިދާޅުވިއެވެ. މީގެއިތުރުން، ވަޒީފާއަށް ކުރިމަތިލާ ފަރާތްތަކުގެ އިމްތިޙާނުތައްވެސް ނަޒާހަތްތެރިކަމާއެކު އޮންލައިންކޮށް ހެދޭނެ އިންތިޒާމު ހަމަޖައްސަމުންދާ ކަމަށް އޭނާ ފާހަގަކުރެއްވިއެވެ.

ސީއެސްސީގެ 2025 ވަނަ އަހަރުގެ އަހަރީ ރިޕޯޓުގެ އުސްއަލިތައް:

• އަލަށް ގުޅުނު މުވައްޒަފުން: 4,370

• ވަޒީފާ ބަދަލުވި މުވައްޒަފުން: 415

• މަޤާމުގެ ކުރިއެރުން ލިބުނު މުވައްޒަފުން: 1,935

• ވަޒީފާއިން ވަކިވި މުވައްޒަފުން: 1,506

ޝަކުވާތަކުގެ ތަފްޞީލަށް ބަލާއިރު، ވޭތުވެދިޔަ އަހަރު ކޮމިޝަނަށް ހުށަހެޅުނު 5,930 ޝަކުވާގެ ތެރެއިން 5,834 ޝަކުވާއެއް ބަލައި، ވަނީ ޖަވާބުދާރީވެފައެވެ. މިގޮތުން އެންމެ ގިނައިން ހުށަހެޅިފައިވަނީ ވަޒީފާތަކަށް މީހުން ހޮވުމާއި ޢައްޔަނުކުރުމާ ގުޅޭ މައްސަލަތަކެވެ. އަދި އެކިއެކި ޚިދުމަތްތަކާ ގުޅިގެން 8,000 އަށް ވުރެ ގިނަ ރިކުއެސްޓް އެ މުއްދަތުގައި ކޮމިޝަނަށް ލިބިފައިވެއެވެ.

ސިވިލް ސަރވިސްގައި 35,000 އަށް ވުރެ ގިނަ މުވައްޒަފުން ޚިދުމަތްކުރަމުން އަންނައިރު، ކޮމިޝަނުގެ އިދާރީ މުވައްޒަފުންގެ ޢަދަދު މަދުވުމަކީ މުޅި ޚިދުމަތް އެންމެ ފުރިހަމައަށް ވިލަރެސްކޮށް ބެލެހެއްޓުމަށް އޮތް ބޮޑު ގޮންޖެހުމެއްކަންވެސް ކޮމިޓީގައި ވަނީ ފާހަގަކޮށްފައެވެ.

ޤާނޫނީ އަދި އިދާރީ ހިންގުން ހަރުދަނާކުރުމުގެ ގޮތުން 2025 ވަނަ އަހަރު ސީއެސްސީން ވަނީ އަލަށް 3 ޤަވާޢިދެއް އެކުލަވައިލައި، ޢަމަލުކުރަމުންދިޔަ ޤަވާޢިދުތަކަށް 19 އިޞްލާޙެއް ގެނެސްފައެވެ. އަދި ދަޢުލަތުގެ އިދާރާތަކުގެ 72 އޮނިގަނޑެއް ފާސްކޮށްދީފައިވާކަންވެސް އެ ރިޕޯޓުގައި ފާހަގަކޮށްފައިވެއެވެ.