މިފްކޯއިން މަސްވެރިންގެ އަތުން މަސްގަންނަ އަގު ބޮޑުކޮށްފި

ސަރުކާރުގެ މަސްކުންފުނި، މިފްކޯއިން މަސްވެރިންގެ އަތުން މަސްގަންނަ އަގު މިއަދުން ފެށިގެން ބޮޑުކޮށްފިއެވެ.

މިފްކޯއިން މިއަދު އާއްމުކުރި ރޭޓްތަކަށް ބަލާއިރު، އަގަށް ގެނައި ބަދަލާއެކު ތިން ރޭޓަކުން މަސް ގަންނަ އަގު ވަނީ ބޮޑުކޮށްފައެވެ. މަސްގަންނަ އަގު ބޮޑުކޮށްފައިވަނީ ދުނިޔޭގެ ބާޒާރުގެ ޑިމާންޑާއި ސަޕްލައިއަށް ރިޢާޔަތްކޮށް، ދޯނިފަހަރުން ކިރާ މަހުގެ ނިސްބަތަށް ބަލައިގެންކަމަށް މިފްކޯއިން ބުންޏެވެ.

މިއަދުން ފެށިގެން ދޯނިފަހަރުން މަސް ގަންނަމުންދާނޭ އަގުތައް:

• 1 އާއި 5 ޓަނާ ދެމެދުގެ މިންވަރަކަށް މަސް ކިރާނަމަ: ކިލޯއެއް -/21 ރުފިޔާއަށް

• 5 އާއި 8 ޓަނާ ދެމެދުގެ މިންވަރަކަށް މަސް ކިރާނަމަ: ކިލޯއެއް -/22 ރުފިޔާއަށް

• 8 ޓަނަށްވުރެ އިތުރަށް މަސް ކިރާނަމަ: ކިލޯއެއް -/22.75 ރުފިޔާއަށް

މިފްކޯއިން ބުނީ އައު ރޭޓުތަކުގައި މަސް ގަންނަމުންދާނީ، ގދ. ތިނަދޫ، ޅ. ފެލިވަރު، ހއ. އިހަވަންދޫ، ލ. ހިތަދޫ އަދި މ. މުލަކު ބަނދަރުން ކަމަށެވެ.

މިފްކޯއިން ފާހަގަކުރި ގޮތުގައި، މިއީ މަސްވެރިން ބާނާ މަހަށް އެކަށޭނަ އުޖޫރައެއް ކަށަވަރުކޮށްދިނުމަށާއި، ރާއްޖޭގެ މަސްވެރިކަމުގެ ސިނާޢަތު ދެމެހެއްޓެނިވި ގޮތެއްގައި ކުރިއެރުވުމަށް ސަރުކާރުން ގެންގުޅުއްވާ ހަރުދަނާ ސިޔާސަތުގެ ދަށުން ނިންމެވި މުހިންމު ނިންމުމެއް ކަމަށެވެ.

ދުނިޔޭގެ ބާޒާރުގައި މަހުގެ އަގަށް އަންނަ ބަދަލުތަކާ އެއްހަމަކުރުމުގެ ގޮތުން، މީގެ ކުރިންވެސް އެކި މަރުޙަލާތަކަކަށް ބަހާލައިގެން މިފްކޯއިން ވަނީ މަސް ގަންނަ އަގު މަތިކޮށްފައެވެ. އެގޮތުން، މިއަހަރުގެ ޖޫން މަހު ކިލޯއެއްގެ އަގު -/20 ރުފިޔާއަށް، އޮގަސްޓް މަހު -/21 ރުފިޔާއަށް، އަދި ސެޕްޓެމްބަރު މަހު ކަޅުބިލަމަސް ކިލޯއެއްގެ އަގު ވަނީ -/22 ރުފިޔާއަށް ބޮޑުކޮށްފައެވެ.

މަސް ކިލޯއެއްގެ އަގު -/20 ރުފިޔާއަށް ވުރެ ދަށްނުވާނެހެން އިންތިޒާމުތައް ހަމަޖައްސަވައިދެއްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މަސްވެރިންނަށް ވަޢުދުވެވަޑައިގެންފައެވެ.