އެސްއެސްސީ އިމްތިޙާނުގައި ޤުރުއާން އެސެސްކުރާ އުސޫލު ބަދަލުކުރުމަށް އެމްޑީޕީން ގޮވާލައިފި

އަންނަ އަހަރުގެ އެސްއެސްސީ އިމްތިޙާނުގައި ޤުރުއާން މާއްދާ ހިމެނުމަށް އެޑިއުކޭޝަން މިނިސްޓްރީން ނިންމާފައިވާއިރު، އެ މާއްދާގެ ނަތީޖާ ދޫކުރާ އުޞޫލު ބަދަލުކުރުމަށް އިދިކޮޅު އެމްޑީޕީން މިއަދު ގޮވާލައިފިއެވެ.

އެޑިއުކޭޝަން މިނިސްޓްރީން މިފަހުން ވަނީ އެސްއެސްސީ އިމްތިޙާނުގައި އަލަށް ޤުރުއާން މާއްދާ ހިމެނުމަށް ވަނީ ނިންމައިފައެވެ. ނަމަވެސް، އަންނަ އަހަރު މިކަން ކުރިއަށް ގެންދާނީ ޕައިލެޓް ޕްރޮޖެކްޓެއްގެ ގޮތުގައި މަދު ސްކޫލުތަކެއްގައެވެ. މި ނިންމުމަށް އެމްޑީޕީން ތާއީދުކުރި ނަމަވެސް، ދަރިވަރުން ވަޒަންކުރާ އެސެސްމެންޓުގެ ނިޒާމާ މެދު އެ ޕާޓީން ވަނީ ކަންބޮޑުވުން ފާޅުކޮށްފައެވެ.

އެމްޑީޕީ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި، އެ ޕާޓީގެ އެޑިއުކޭޝަން ކޮމިޓީގެ ފަރާތުން ވާހަކަދައްކަވަމުން ރައްޔިތުންގެ މަޖިލީހުގެ ދާންދޫ ދާއިރާގެ ކުރީގެ މެންބަރު ޔައުޤޫބު ޢަބްދުﷲ ވިދާޅުވީ، ސްކޫލުތަކުގައި ޤުރުއާން ކިޔަވައިދިނުމަކީ ނުހަނު މުހިންމު ކަމެއް ކަމަށާއި، ތަޢުލީމީ ޙަޔާތް ނިންމައި ނުކުންނައިރު ކޮންމެ ދަރިވަރަކަށްވެސް ރީތިކޮށް ޤުރުއާން ކިޔަވަން އެނގެންޖެހޭނެ ކަމަށެވެ. އެހެންނަމަވެސް، ޤައުމީ ފެންވަރުގެ ބޮޑު އިމްތިޙާނެއްގައި އެ މާއްދާއިން ދަރިވަރުން ވަޒަންކުރަން ކަނޑައަޅާފައިވާ ގޮތާމެދު ސުވާލު އުފެދޭ ކަމަށް އޭނާ ވިދާޅުވިއެވެ.

"އަޅުގަނޑުމެންނަށް މަޢުލޫމާތު ލިބިފައިވާ ގޮތުގައި އެ މާއްދާ އެސެސްކުރުމަށްފަހު ދަރިވަރުންނަށް ދިނުމަށް ހަމަޖެހިފައިވަނީ ފާސްވި ނުވަތަ ފެއިލްވި ކަމުގެ ނަތީޖާއެއް. އެހެންކަމުން ދަރިވަރަށް މި ލިބެނީ ޤުރުއާނުން ފާސްވި ނުވަތަ ފެއިލްވި ކަމުގެ ސަނަދެއް. މިފަދަ މުސްލިމް މުޖުތަމަޢެއްގައި، ކޮންމެ ތަނަކަށް ދިޔަޔަސް އެ ކުއްޖަކު ދާން މި ޖެހެނީ ޤުރުއާނުން ފެއިލްވި ކަމުގެ ސެޓްފިކެޓަކާ އެކުގައި. މިއީ މުޖުތަމަޢުގެ ތެރޭގައި އެ ދަރިވަރާމެދު ދެކޭގޮތް ނޭދެވޭ ގޮތަކަށް ބަދަލުވެގެން ހިނގައިދާނެ ކަމެއް." ޔައުޤޫބު ވިދާޅުވިއެވެ.

އޭނާ އިތުރަށް ފާހަގަކުރެއްވި ގޮތުގައި، ދަރިވަރުން ތަޢުލީމު ނިންމައި ވަޒީފާގެ ބާޒާރަށް ނުކުންނައިރު ހުށަހަޅާ ލިޔެކިޔުންތަކުގައި ޤުރުއާނުން ފެއިލްވެފައިވާކަން ބަޔާންވެފައި އޮތުމަކީ، އެ ކުދިންނާމެދު ތަފާތުކުރުންތަކެއް އުފެދި، އޭގެ ނޭދެވޭ އަސަރު މުޅި ޢުމުރަށް ދެމިގެންދާނެ ކަމެކެވެ. އެހެންކަމުން، މި ކަންބޮޑުވުންތަކަށް ރިޢާޔަތްކޮށް، ޤުރުއާން މާއްދާ އެސެސްކުރާ އުޞޫލު އަލުން މުރާޖަޢާކޮށް އިޞްލާޙުކުރުމަށް ޔައުޤޫބު ވަނީ އެޑިއުކޭޝަން މިނިސްޓްރީއަށް ގޮވާލައްވައިފައެވެ.

އަންނަ ނޮވެމްބަރު މަހު ބޭއްވުމަށް ހަމަޖެހިފައިވާ އެސްއެސްސީ އިމްތިޙާނުގައި ޤުރުއާން މާއްދާ އަޖުމަބެލުމުގެ ގޮތުން ކުރިއަށްގެންދަނީ 10 ސްކޫލެއްގައެވެ. އަދި ކުރިއަށް އޮތް ތަނުގައި މި މާއްދާ ހުރިހާ ސްކޫލަކަށް ފުޅާކުރެވިގެންދާއިރު، އެސްއެސްސީ އަދި އޯލެވެލް އިމްތިޙާނުގެ ގަދަ ދިހައެއް (ޓޮޕް ޓެން) ގައި ހިމެނޭނީ ޤުރުއާން މާއްދާއިން ވެސް ފާސްވާ ދަރިވަރުންނެވެ.