ހޫނު ގަދަވުމާއި ގުޅިގެން ނިޔާވި ހައްޖުވެރިންގެ އަދަދު 200 އަށް އަރައިފި!

މި އަހަރުގެ ހައްޖު މޫސުމުގައި ސައުދީ އަރަބިއާ އަށް އިންތިހާ އަށް ހޫނު ގަދަވުމުގެ ސަބަބުން ނިޔާވި ހައްޖުވެރިންގެ އަދަދު 200 އަށް ވުރެ މައްޗަށް އަރައިފިއެވެ.

މިއަހަރުގެ ހައްޖު މޫސުން ހޫނު ގަދަވާނެ ކަމަށް ސައުދީ ސަރުކާރުން މީގެ ކުރިން ބުނެފައިވާއިރު، ހޫނު ގަދަވުމުގެ ސަބަބުން މިއަހަރު ހައްޖަށް ދިޔަ މީހުންގެ ތެރެއިން 252 މީހަކު ވަނީ ނިޔާވެފައެވެ.

ސީއެންއެން އިން ރިޕޯޓްކުރާ ގޮތުގައި، އޭގެ ތެރޭގައި ހިމެނެނީ އިންޑޮނޭޝިއާގެ 165 މީހުންނާއި، އުރުދުންގެ 41 މީހުންނާއި، ޓިއުނީޝިއާގެ 35 މީހުންގެ އިތުރުން، އީރާނަށް ނިސްބަތްވާ 11 މީހުންނެވެ.

މީގެ އިތުރުންވެސް، ހޫނުގެ ސަބަބުން ހާލުދެރަވުމާއި ގުޅިގެން އީރާނުގެ 26 މީހަކަށް އެޑްމިޓްކޮށްގެން ވެސް ވަނީ ފަރުވާދީފައެވެ.

ސައުދީ އަރަބިއާ އާއި މިސްރުން ނިޔާވި މީހުންގެ ރަސްމީ އަދަދު މިހާތަނަށް ނެރެފައިނުވާއިރު، ކޯޓާ އަކާއި ނުލައި ހައްޖަށް ދިޔަ މީހުންގެ ހާލަތު އެ ގައުމުގެ ސަރުކާރަށް ދެނެނުގަނެވޭނެތީ ނިޔާވި މީހުންގެ އަދަދުތައް މިއަށް ވުރެ މައްޗަށް ދިޔުމުގެ ފުރުސަތު އޮތް ކަމަށް ސީއެންއެންއިން ރިޕޯޓް ކުރެއެވެ.

ސައުދީ ސަރުކާރުން ހާމަކުރި ގޮތުގައި ހޫނު ގަދަވުމާއި ގުޅިގެން ހާލުދެރަވި 2,700 އަށް ވުރެ ގިނަ މީހުންނަށް ވަނީ ފަރުވާދީފައިއެވެ.

މިއަހަރުގެ ހައްޖަށް ދުނިޔޭގެ އެކި ކަންކޮޅުތަކުން 1.8 މިލިއަން މުސްލިމުން މައްކާއަށް ގޮސްފައިވާއިރު، ހޫނު ގަދަވުމާއި ގުޅިގެން މީގެ ކުރިން ވެސް ހައްޖުވެރިން ނިޔާވެފައިވާ ކަން ފާހަގަކޮށްލަން ޖެހެއެވެ. މިގޮތުން، ހީޓް ސްޓްރޯކް ގެ ސަބަބުން މިދިޔަ އަހަރު ވެސް ވަނީ 200 އަަށް ވުރެ ގިނަ މީހުން ނިޔާވެފައެވެ.

ހޫނުގެ އަސަރު ހައްޖުވެރިންނަށް ކުރާ މިންވަރު ދަށްކުރުމަށްޓަކައި ސައުދީ ސަރުކާރުން ފިޔަވަޅުތަކެއް މި އަހަރުގެ ހައްޖު މޫސުމާއި ދިމާކޮށް އަޅާފައިވާއިރު، ހައްޖުގެ ކަންތައްތައް ބަލަހައްޓާ ފަރާތުން ވަނީ ދުވަހުގެ ހޫނު މަޑުވާ ވަގުތުތަކުގައި ޖަމްރާ އަށް ހިލައުކަން ދިޔުމަށް އިލްތިމާސްކޮށް، އަބަދުވެސް ކުޑަ ފަދަ ހިޔާވާ ތަކެތި ބޭނުން ކުރުމަށާއި، ފެންފުޅި ފަދަ ތަކެތި އަބަދުވެސް އަތްޖެހޭ ހިސާބުގައި ގެންގުޅުމަށް ހައްޖުވެރިންގެ ކިބައިން އެދިފައެވެ.