ރިސޯޓް ލީގު 2023: ބަނޑޮހާއި ރީތިރަށުގެ ތާރީޚީ ފައިނަލް މެޗު މާދަމާ ހަވީރު!

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ނޯތު މާލޭ ޒޯނުގެ ފައިނަލް މެޗު މާދަމާ ހަވީރު ކުޅުމަށް ހަމަޖެހިފައިވާ އިރު، މި މެޗުގައި ވާދަކުރަނީ މިޒޯނުގެ އެންމެ ކާމިޔާބު ދެޓީމް ކަމަށްވާ ބަނޑޮހާއި ރީތިރަށެވެ.

2013 ވަނަ އަހަރު ބާއްވަން ފެށުނު މި މުބާރާތުގެ ނޯތު މާލޭ ޒޯން ޗެމްޕިއަންކަން ޖެހިޖެހިގެން ހަތަރު އަހަރު ބަނޑޮހުން ހޯދިއިރު، ޖެހިގެން އައި ތިން މުބާރާތުގެ ޗެމްޕިއަންކަން ހޯދީ ރީތިރަށުންނެވެ. އަދި 2016 ވަނަ އަހަރު މުބާރާތުގެ ފައިނަލްގައި މިދެޓީމު ވާދަކުރި މެޗު ބަނޑޮހުން ކާމިޔާބުކުރި އިރު މިއީ މި ޒޯނުގެ ފައިނަލުގައި މި ދެޓީމުން ވާދަކުރާ ދެވަނަ ފަހަރެވެ.

މާދަމާގެ ފައިނަލް މެޗާއި ބެހޭގޮތުން ވޮއިސް އަށް މައުލޫމާތު ދެއްވަމުން ބަނޑޮސް ޓީމުގެ މެނޭޖަރު ބުނީ ފައިނަލް މެޗަށް އެޓީމު އޮތީ ވަރަށް ރަގަޅަށް ތައްޔާރުވެފައި ކަމަށާއި، ޓީމުގެ ހުރިހާ ކުޅުންތެރިން ވެސް ތިބީ ވަރަށް ރަގަޅު ރޫހެއްގައި ކަމަށެވެ. ޓީމުގައި އަނިޔާ އާއި ސަސްޕެންޝަންގެ މައްސަލައެއް ނެތްކަމަށާއި، ބަނޑޮހުން ކޮންމެ މުބާރާތެއްގައި ކުޅުނަސް އަބަދުވެސް ވިސްނުން ހުންނަނީ ސީދާ ތައްޓަށް.. އެވަރިހަމަ ފުޓްސަލް ނޫނީ ވޮލީ ވިއަސް.

އިތުރަށް ވާހަކަދައްކަމުން ބަނޑޮސް ޓީމުގެ މެނޭޖަރު ބުނީ މުބާރާތުގެ އިންތިޒާމްތަކާއި މެދު ވަރަށް ހިތްހަމަޖެހޭ ކަމަށާއި މި މުބާރާތަކީ ބަނޑޮހުން ވަރަށް އިސްކަންދޭ މުބާރާތެއް ކަމަށެވެ. އޭގެ ނަތީޖާއެއް ކަންނޭގެ މިޒޯނުގެ އެންމެ ކާމިޔާބު ޓީމު ބަނޑޮހަކީ..

ފައިނަލް މެޗަށް ކުޅުންތެރިންގެ އިތުރުން ބަނޑޮހުގެ ސަޕޯޓަރުން ވެސް އަންނަނީ ވަރަށް ޖޯޝާއި ފޯރީގައި ތައްޔާރުވަމުން ކަމަށާއި، ސަޕޯޓަރުންގެ ފަރާތުން އެދެނީ ކުޅިވަރުގެ ރޫހާ އެއްގޮތަށް މެޗު ފެށުނީއްސުރެ ނިމެންދެން ސަޕޯޓްކޮށް ދިނުމަށެވެ.

ފައިނަލް މެޗާއި ބެހޭގޮތުން ވޮއިސް އަށް މައުލޫމާތު ދެމުން ރީތިރަށުގެ ފުޓްސަލް ޓީމު މެނޭޖަރު ބުނީ މުބާރާތުގެ ކުރީކޮޅު ތަންކޮޅެއް ދަށްކޮށް ދިޔަ ނަމަވެސް ކުއާޓާ ފައިނަލުން ފެށިގެން ޓީމުގެ ފަރާތުން ފެނިގެންދާ ކުޅުމާއި މެދު ވަރަށް ހިތްހަމަ ޖެހޭ ކަމަށެވެ. ހާއްސަކޮށް ސެމީ ފައިނަލުގައި ޓީމުގެ އެންމެ މުހިންމު އެއްކުޅުތެރިއަކު ސަސްޕެންޝަންގެ ސަބަބުން ނުލައި ކުޅުނުއިރު ޓީމުގެ ފަރާތުން ފެނުނު މޮޅުވުމުގެ ރޫހް ފެނިފައި ވަރަށް އުންމީދުގައި މިހިރީ ފައިނަލް މެޗާއިމެދުގަ.

މެޗާއި ބެހޭގޮތުން އިތުރަށް ވާހަކަ ދައްކަމުން ރީތިރަށު ޓީމުގެ މެނޭޖަރު ބުނީ ފައިނަލުގައި ކުޅޭ ބަނޑޮސް ޓީމަކީ ވަރަށް މޮޅު ހުނަރުވެރި ކުޅުންތެރިންތަކެއްތިބި ޓީމެއްކަމަށާއި، އެޓީމަށް ފުރިހަމަޔަށް އިހްތިރާމް ކުރާ ކަމަށެވެ. ނަމަވެސް ރީތިރަށުގެ ސަޕޯޓަރުންގެ ކުރިމަތީގައި ބަނޑޮސް ބަލިކުރެވޭނެ ކަމަށާއި އެކަމަށްޓަކައި ޓީމު އޮތީ ވަރަށް ރަގަޅަށް ތައްޔާރުވެފައި ކަމަށެވެ.

އިރާދަކުރެއްވިޔާ އަޅުގަނޑުމެންގެ ސަޕޯޓަރުންގެ އެހީތެރިކަމާއިއެކު މިތަށި ހުންނަނީ ރީތިރަށުގައި، އަޅުގަނޑުމެން އެދެނީ ޓީމުގެ ސަޕޯޓަރުން ސެމީފައިނަލް މެޗެކޭ އެއްގޮތަށް ފައިނަލް މެޗުގައި ވެސް ކުޅިވަރުގެ ރޫހާ އެއްގޮތަށް ޓީމަށް ސަޕޯޓު ކޮށްދިނުން.