ސައުދީއިން އެމެރިކާއާ ގުޅިގެން، އިރާގުގެ އަސްކަރީ ބައެއް ސަރަހައްދުތަކަށް ވަރުގަދަ ހަމަލާތަކެއް ދީފި

ސައުދީ އަރަބިއްޔާގެ ތެޔޮ ވަސީލަތްތަކަށް ދެމުންދާ ޑްރޯން ހަމަލާތަކާ ގުޅިގެން، އިރާގުގައި ހަރަކާތްތެރިވާ އީރާނަށް ތާއީދުކުރާ ހަނގުރާމަވެރި ޖަމާއަތްތަކުގެ އަމާޒުތަކަށް ސައުދީ އަރަބިއްޔާގެ އަސްކަރިއްޔާއިން ވަރުގަދަ ހަމަލާތަކެއް ދީފިއެވެ.

ސައުދީގެ މިނިސްޓްރީ އޮފް ޑިފެންސް އިން ހާމަކުރި ގޮތުގައި، އެމެރިކާގެ ސެންޓްރަލް ކޮމާންޑް (ސެންޓްކޮމް) އާ ގުޅިގެން ބުދަ ދުވަހު ދިން މި ހަމަލާތަކަކީ ސައުދީގެ ހަކަތައާ ބެހޭ އިންފްރާސްޓްރަކްޗަރަށް ދެމުންދާ ހަމަލާތަކަށް ރައްދު ދިނުމުގެ ގޮތުން ދިން ހަމަލާތަކެކެވެ.

މި އޮޕަރޭޝަނާ ގުޅޭގޮތުން ވާހަކަ ދައްކަވަމުން ޑިފެންސް މިނިސްޓްރީގެ ތަރުޖަމާނު މޭޖަރ ޖެނެރަލް ތުރުކީ އަލް މާލިކީ ވިދާޅުވީ، މިދިޔަ ހޯމަ އަދި އަންގާރަ ދުވަހު ސައުދީގެ އީސްޓަން ޕްރޮވިންސް އަދި ރިޔާދު ސަރަހައްދުގައި ހުރި ތެޔޮ ވަސީލަތްތަކަށް ޑްރޯން ހަމަލާތަކެއް ދޭން މަސައްކަތް ކޮށްފައިވާ ކަމަށެވެ. އެ ހަމަލާތައް ސައުދީގެ އެއާ ޑިފެންސް ސިސްޓަމްތަކުން ހުއްޓުވާފައިވާއިރު، އެއީ އިރާގުގެ ސަރަހައްދުން ފޮނުވާލި ހަމަލާތަކެއްކަން ކަށަވަރުވެފައިވާ ކަމަށް އޭނާ ވިދާޅުވިއެވެ.

އަލް މާލިކީ އިތުރަށް ވިދާޅުވީ، ބުދަ ދުވަހުގެ އަސްކަރީ ހަމަލާތަކަކީ އދ. ގެ ޗާޓަރުގެ 51 ވަނަ މާއްދާގެ ދަށުން އަމިއްލަ ނަފްސުގެ ދިފާއުގައި ދިން ހަމަލާތަކެއް ކަމަށެވެ. އަދި ސައުދީގެ ރައްޔިތުންނާއި ގައުމީ ވަސީލަތްތައް ހިމާޔަތްކުރުމުގެ ހައްގު އެ ގައުމަށް އޮތް ކަމަށާއި، ބޭނުންވާ ވަގުތެއްގައި އަދި ބޭނުންވާ ތަނަކަށް ރައްދު ހަމަލާ ދިނުމުގެ އިހުތިޔާރު ސައުދީ އަރަބިއްޔާއަށް އޮތް ކަމަށް އޭނާ ވިދާޅުވިއެވެ.

ސައުދީގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ސަރަހައްދީ ހަމަޖެހުމާއި ސަލާމަތްތެރިކަން ދެމެހެއްޓުމަށް ބައިނަލްއަގުވާމީ ފަރާތްތަކާ ގުޅިގެން ސައުދީން މަސައްކަތް ކުރަމުންދަނިކޮށް، އީރާނަށް ތާއީދުކުރާ ޖަމާއަތްތަކުން އިސްކުރީ "ޒިންމާދާރުކަން ކުޑަ މަގަކުން ކަންކަން ގޯސްކުރުމަށް" ކަމަށެވެ. އަދި މި ޖަމާއަތްތަކުން ބައިނަލްއަގުވާމީ ގާނޫނުތަކާއި އަވަށްޓެރި ގައުމުތަކުގެ ގުޅުމުގެ އުސޫލުތަކާ ހިލާފުވެފައިވާ ކަމަށްވެސް އެ ބަޔާނުގައިވެއެވެ.

މިނިސްޓްރީން ބުނި ގޮތުގައި، ސައުދީ އަރަބިއްޔާއިން ބޭނުންވަނީ މަސްލަހަތު ގޯސްވިޔަނުދީ ހިފެހެއްޓުމަށެވެ. ނަމަވެސް ގައުމުގެ އިސްތިގުލާލާއި ރައްޔިތުންގެ ރައްކާތެރިކަމަށްޓަކައި އަޅަންޖެހޭ ކޮންމެ ފިޔަވަޅެއް އަޅާނެ ކަމުގެ އިންޒާރު ސައުދީ ސަރުކާރުން ވަނީ ދީފައެވެ.