ރަޙުމަތްތެރިކަމުގެ މެޗެއްގައި ދިވެހިރާއްޖެ، ޗައިނާއާ ދެކޮޅަށް ނިކުންނަނީ

ބައިނަލްއަޤްވާމީ އެކުވެރިކަމުގެ މެޗެއްގައި ދިވެހިރާއްޖޭގެ ޤައުމީ ފުޓްބޯޅަ ޓީމު، ޗައިނާއާ ދެކޮޅަށް ކުޅުމަށް ހަމަޖެހިއްޖެއެވެ.

މައުލޫމާތު ލިބިފައިވާ ގޮތުގައި ޗައިނާއާ ދެކޮޅަށް ރާއްޖެ ކުޅޭ މި މެޗު ތާވަލުކޮށްފައިވަނީ މި ހިނގާ މަހުގެ ފަހުކޮޅުގައެވެ. މި މެޗު ކުޅޭނެ ވަކި ޚާއްޞަ ތާރީޚެއް އަދި ރަސްމީކޮށް ކަނޑައެޅިފައި ނުވި ނަމަވެސް، މެޗު ކުޅުމަށް ނިންމާފައިވަނީ ޗައިނާގައެވެ.

ޗައިނާއާ ދެކޮޅަށް އެކުވެރިކަމުގެ މެޗެއް ކުޅުމަށް ތައްޔާރުވަމުން އަންނައިރު، މީގެ އިތުރުންވެސް ބައިނަލްއަޤްވާމީ އެކުވެރިކަމުގެ އިތުރު މެޗުތަކެއް ކުޅުމަށް ރާއްޖޭގެ ޤައުމީ ޓީމުން ވަނީ ތާވަލުކޮށްފައެވެ. އެގޮތުން ކިރްގިޒްސްތާން އަދި ލެބަނާންގެ ޤައުމީ ޓީމާ ދެކޮޅަށް ރާއްޖެއިން މެޗުތަކެއް ކުޅޭނެއެވެ. ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބުނި ގޮތުގައި މި ދެ މެޗުވެސް ކުޅުމަށް ހަމަޖެހިފައިވަނީ ކިރްގިޒްސްތާނުގެ ވެރިރަށް ބިޝްކެކްގައެވެ.

ސެޕްޓެމްބަރު މަހުގެ 28 ވާ ހޮނިހިރު ދުވަހު ނުކުންނާނީ ކިރްގިޒްސްތާނާ ދެކޮޅަށެވެ. އަދި ދެވަނަ މެޗުގައި އަންނަ އޮކްޓޫބަރު މަހުގެ 1 ވާ އަންގާރަ ދުވަހު ރާއްޖެ ބައްދަލުކުރާނީ ލެބަނާންގެ ޤައުމީ ޓީމާއެވެ.

މި މެޗުތަކަކީ ބައިނަލްއަޤްވާމީ މައިދާނުގައި ރާއްޖޭގެ ޓީމުގެ ފެންވަރު ވަޒަންކޮށްލުމަށާއި، ކުރިއަށް އޮތް ރަސްމީ މުބާރާތްތަކަށް ޓީމު ތައްޔާރުކުރުމުގެ މަޤްޞަދުގައި ކުޅޭ މުހިންމު މެޗުތަކެކެވެ.