ފަސޭހަކަމާއި އެކު ދިގަލި މޯލްޑިވްސް ބަލިކޮށް ފައިނަލްގެ ދެވަނަ ޖާގަ އެމެރަލްޑް މޯލްޑިވްސް އިން ހޯދައިފި

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ރާ ޒޯނުގެ ސެމީ ފައިނަލުގެ ދެވަނަ މެޗުގައި މިއަދު ހަވީރު ދިގަލި މޯލްޑިވްސް އާއި އެމެރަލްޑް މޯލްޑިވްސް ވާދަކުރި މެޗު 5-2 ގެ ނަތީޖާއަކުން ކާމިޔާބުކޮށް މުބާރާތުގެ ފައިނަލްގެ ދެވަނަ ޖާގަ އެމެރަލްޑް މޯލްޑިވްސް އިން ހޯދައިފިއެވެ.

ގުރޫޕް ބީގެ އެއްވަނަ ޓީމުގެ ގޮތުގައި ދިގަލި މޯލްޑިވްސް މުބާރާތުގެ ސެމީ ފައިނަލުން ޖާގަ ހޯދިއިރު، އެމެރަލްޑް މޯލްޑިވްސް ސެމީގެ ފުރުސަތު ހޯދީ ގުރޫޕް އޭގެ ދެވަނަ ޓީމުގެ ގޮތުގައެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އެމެރަލްޑް މޯލްޑިވްސް އިންނެވެ. މިލަނޑު ފުރަތަމަ ހާފުގެ 9 ވަނަ މިނެޓުގައި ކާމިޔާބުކޮށްދިނީ އެޓީމުގެ އަބްދުﷲ އަލީ އެވެ. މި ލަނޑަށްފަހު ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ.

ނަމަވެސް ފުރަތަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން އެމެރަލްޑް މޯލްޑިވްސް ކުރީގައި އޮވެގެންނެވެ.

މެޗުގެ ދެވަަނަ ހާފު ވަރުގަދަކޮށް ފެށީ އެމެރަލްޑް މޯލްޑިވްސް އިންނެވެ. އެގޮތުން މިހާފު ފެށިގެން ފުރަތަމަ މިނެޓުގައި އެޓީމުގެ ދެވަނަ ލަނޑު އިސްމާއިލް ޝާފިޢު ކާމިޔާބުކުރި އިރު، ޖެހިގެން އައި މިނެޓުގައި އެޓީމުގެ އަބްދުﷲ އަލީ ވަނީ އިތުރު ލަނޑެއް ކާމިޔާބުކޮށް މެޗުގެ ނަތީޖާ 3-0 އަށް ބަދަލުކޮށްފައެވެ.

އެމެރަލްޑް މޯލްޑިވްސްގެ ފަރާތުން އަވަސް ކުޅުމެއް ފެނިގެންދިޔަ މިހާފުގައި، އެޓީމުގެ ހަތަރުވަނަ ލަނޑު ކާމިޔާބުކޮށްދިނީ 28 ވަނަ މިނެޓުގައި އެޓީމުގެ އަހުމަދު ޔަސްރު އެވެ.

4-0 ގެ ނަތީޖާއަކުން އެމެރަލްޑް މޯލްޑިވްސް ކުރީގައި ވަނިކޮށް ދިގަލި މޯލްޑިވްސް އިން ވަނީ ގާތްގާތުގައި ދެ ލަނޑު ކާމިޔާބުކޮށް ނަތީޖާގެ ފަރަގު ކުޑަކޮށްފައެވެ. މިދެލަނޑު ވެސް އެޓީމަށް ކާމިޔާބުކޮށްދިނީ މުހައްމަދު މަމްދޫހް އެވެ.

ނަމަވެސް މެޗު ނިމެން ދެ މިނިޓަށްވެފައި ވަނިކޮށް އެމެރަލްޑް މޯލްޑިވްސް އިން ވަނީ އިތުރު ލަނޑެއް ކާމިޔާބުކޮށް އަނެއްކާވެސް ތިން ލަނޑުގެ ލީޑެއް ނަގާފައެވެ. މިލަނޑާއެކު މެޗުގެ ކުޅުން ނިމިގެންދިޔައީ 5-2 ނަތީޖާއަކުން ޖޯލި މޯލްޑިވްސް ކުރީގައި އޮވެގެންނެވެ. އަދި މި މެޗުގެ މޭން އޮފް ދަ މެޗަކަށް ހޮވުނީ އެމެރަލްޑް މޯލްޑިވްސް އިބްރާހިމް އަޒްމޫން އެވެ.

މުބާރާތުގެ ފައިނަލްގައި އެމެރަލްޑް މޯލްޑިވްސް ނުކުންނާނީ ސެމީފައިނަލްގެ ފުރަތަމަ މެޗުގައި 4-1 ގެ ނަތީޖާއަކުން ކޮތައިފަރު ކަޓުވާލުމަށްފަހު ފައިނަލުން ޖާގަ ހޯދީ ޖޯލި މޯލްޑިވްސް އާއި ދެކޮޅަށެވެ. މިމެޗު ކުޅުމަށް ހަމަޖެހިފައިވަނީ ސެޕްޓެމްބަރު މަހުގެ 5 ވަނަ ދުވަހުގެ ހަވީރު 16:00 ގައެވެ.