ދައުލަތުގެ މާލީ ނިޒާމު ހަރުދަނާކުރުމާއި ކޮރަޕްޝަން ހުއްޓުވުން

ދިވެހިރާއްޖޭގެ އިޤްތިޞާދީ ދުވެލި ހަލުވިވެ، ތަރައްޤީގެ މަޝްރޫޢުތައް އިތުރުވަމުންދާ މިދަނޑިވަޅުގައި، ދައުލަތުގެ މާލީ ނިޒާމުގެ ތެރެއިން ކުންފުނިތަކަށް ފައިސާ ދޫކުރުމުގައި ހުރި ކޮރަޕްޝަންގެ މައްސަލަތަކަކީ ކަންބޮޑުވާންޖެހޭ ކަމެކެވެ. މި މައްސަލަތައް ހައްލުކުރުމަށްޓަކައި، ދަޢުލަތުގެ މާލީ ވުޒާރާއިން މިހާރު ވަނީ ފުޅާ ދާއިރާއެއްގައި ރިފޯމްތަކެއް ތަޢާރަފުކުރަން ފަށާފައެވެ.

މިކަމާ ގުޅޭގޮތުން މާލީ ވުޒާރާއިން ބުނެފައިވަނީ އެންމެ ފުރަތަމަ ކަމަކަށް، ކުންފުނިތަކުން ހުށަހަޅާ އިންވޮއިސްތަކުގައި ހުންނަ އަގުތަކުގެ މައްސަލަ ހައްލުކުރަންޖެހޭ ކަމަށާއި ގިނަ ފަހަރަށް، ކުންފުނިތަކުން ހުށަހަޅާ އިންވޮއިސްތަކުގައި ހުންނަނީ އާންމު ބާޒާރުގެ އަގަށްވުރެ މާ ބޮޑެތި އަގުތައް ކަމަށެވެ. މިސާލެއްގެ ގޮތުގައި އެ ވުޒާރާއިން ބުނީ، އާންމުކޮށް 100 ރުފިޔާއަށް ލިބެން ހުންނަ އެއްޗެއް، ސަރުކާރަށް ވިއްކާއިރު 1000 ރުފިޔާއަށް ނުވަތަ އެއަށްވުރެ ބޮޑު އަގެއްގައި އިންވޮއިސްކުރާ ހާލަތްތައް ފުދޭވަރަކަށް ހުންނަކަން ފާހަގަކުރެވޭ ކަމަށެވެ.

މިއީ ދައުލަތުގެ ބަޖެޓަށް ވަރަށް ބޮޑު ގެއްލުމެއް ލިބޭ ކަމެއްކަން ފާހަގަކުރަމުން މާލީ ވުޒާރާއިން ބުނީ، މި މައްސަލަ ހައްލުކުރުމަށްޓަކައި، އެ ވުޒާރާއިން މިހާރު ވަނީ ހަރުދަނާ މާލީ ނިޒާމެއް ޤާއިމުކުރުމުގެ މަސައްކަތް ފަށާފައި ކަމަށެވެ. މީގެ ތެރޭގައި، ސަރުކާރު ހިއްސާވާ ކުންފުނިތަކުގެ މާލީ ކަންކަން ވެސް ހިމެނެއެވެ.

ދެވަނަ ކަމަކަށް، އެ ވުޒާރާއިން ބުނީ އިންވޮއިސްތަކުން ވަކި ޕަސެންޓެއް ކަނޑައި، އެ ބައި ވަކި ފަރާތްތަކަށް ދިނުމުގެ މައްސަލައިގެ ޝަކުވާ އާންމުން ކުރާތާ ގިނަ އަހަރުތަކެއްވެއްޖެ ކަމަށެވެ. މިއީ ދިވެހިރާއްޖޭގައި އެތައް އަހަރެއް ވަންދެން ދެމިގެން އައިސްފައިވާ ކޮރަޕްޝަނުގެ ވަރަށް ނުރައްކާތެރި ބާވަތެކެވެ. މި މައްސަލަ ހައްލުކުރުމަށްޓަކައި، ސަރުކާރުން މިހާރު ފުޅާ ދާއިރާއެއްގައި ރިފޯމްތަކެއް ތަޢާރަފުކުރަން ފަށާފައިވާއިރު، މި ރިފޯމްތަކުގެ ތެރޭގައި، ސަރުކާރު ހިއްސާވާ ކުންފުނިތަކުގެ މާލީ މުޢާމަލާތްތައް ވެސް ހިމެނެއެވެ. އެގޮތުން މުޅި ދައުލަތުގެ ތެރޭގައި ހުރި މިފަދަ ކޮރަޕްޝަންގެ ޢަމަލުތައް ހުއްޓުވުމަށް ފިޔަވަޅު އެޅުމުގެ މަސައްކަތް މިހާރު ދަނީ ކުރެވެމުންދާކަމަށް މާލީ ވުޒާރާއިން ބުންޏެވެ.

ތިންވަނަ ކަމަކަށް، ޖުމްލަ ހައްލެއްގެ މުހިންމުކަން ބޮޑެވެ. ދައުލަތުގެ މާލީ ކަންކަން މިހާރަށްވުރެ ހަރުދަނާކޮށް، ޒިންމާދާރުކަމާއެކު، ދެފުށް ފެންނަ ގޮތެއްގައި ކުރިއަށް ގެންދިއުމަކީ މުހިންމު ކަމެކެވެ. މާލީ ވުޒާރާއިން ބުނާގޮތުގައި މިކަން ހާސިލުކުރުމަށްޓަކައި، ދަޢުލަތުގެ މާލިއްޔަތުން މިހާރު ވަނީ ޑިޖިޓަލް ޓެކްނޮލޮޖީ ބޭނުންކޮށްގެން އައު އުސޫލުތަކެއް ތަޢާރަފުކުރަން ފަށާފައެވެ. މި އުސޫލުތަކުގެ ސަބަބުން، ދައުލަތުގެ އެކި ފަންތިތަކުގައި ހުރި ކޮރަޕްޝަންގެ ޢަމަލުތައް ނައްތާލުމަށް މަގުފަހިވެގެންދާނޭކަމަށް އެ ވުޒާރާއިން ދެކެއެވެ.

މާލީ ވުޒާރާއިން ބުނީ މި ރިފޯމްތަކުގެ ސަބަބުން ލިބޭނެ ފައިދާތަކަށް ބަލާއިރު، އެންމެ ފުރަތަމަ ފާހަގަކުރެވެނީ ދައުލަތުގެ ބަޖެޓަށް ލިބޭނެ ސީދާ ފައިދާއެވެ.

"އިންވޮއިސްތަކުގައި ހުންނަ އަގުތައް ހަޤީޤީ އަގުތަކާ އެއްގޮތްވާ ގޮތުގެ މަތިން ބެހެއްޓުމުގެ ސަބަބުން، ދައުލަތުގެ ޚަރަދުތައް ބޮޑުތަނުން ކުޑަވެގެންދާނެއެވެ. މީގެ އިތުރުން، ކޮރަޕްޝަންގެ ޢަމަލުތައް މަދުވުމުގެ ސަބަބުން، ދައުލަތުގެ ވަސީލަތްތައް އެންމެ އެކަށީގެންވާ ގޮތުގައި ބޭނުންކުރެވޭނެއެވެ. އެއާއެކު، މި ރިފޯމްތަކުގެ ސަބަބުން ދައުލަތުގެ މުއައްސަސާތަކުގެ މައްޗަށް އާންމު ރައްޔިތުންގެ އިތުބާރު އިތުރުވެގެންދާނެއެވެ. ދައުލަތުގެ މާލީ ކަންކަން ދެފުށް ފެންނަ ގޮތެއްގައި ކުރިއަށް ގެންދިއުމުގެ ސަބަބުން، ރައްޔިތުންނަށް ދައުލަތުގެ ޚަރަދުތަދުތަކާ ބެހޭ މަޢުލޫމާތު ފަސޭހައިން ލިބި، އެކަންކަމާ މެދު ސުވާލުކުރުމުގެ ފުރުޞަތު ލިބިގެންދާނެއެވެ" ފިނޭންސުން ބުންޏެވެ.

މާލީ ވުޒާރާއިން އިތުރަށް ބުނެފައިވަނީ، މި ރިފޯމްތަކުގެ ސަބަބުން ދިވެހިރާއްޖޭގެ ވިޔަފާރީގެ މާޙައުލުވެސް އިތުރަށް ހަރުދަނާވެގެންދާނެއެވެ. ކޮރަޕްޝަންގެ ޢަމަލުތައް މަދުވުމުގެ ސަބަބުން، ހުރިހާ ވިޔަފާރިތަކަކަށް ވެސް ހަމަހަމަ ފުރުޞަތުތަކެއް ލިބި، ވާދަވެރި މާޙައުލެއް ޤާއިމުވެގެންދާނޭ ކަމަށެވެ.

ސަރުކާރުން، ޚާއްސަކޮށް މާލީ ވުޒާރާއިން ކުރިއަށްގެންދާ ރިފޯމްތަކަކީ ދިވެހިރާއްޖޭގެ އިޤްތިޞާދީ ކުރިއެރުމަށް ނުހަނު މުހިންމު ފިޔަވަޅުތަކެކެވެ. ނަމަވެސް، މި ރިފޯމްތައް ކާމިޔާބުކަމާއެކު ތަންފީޒުކުރުމަށްޓަކައި، ހުރިހާ ފަރާތްތަކެއްގެ އެއްބާރުލުން ބޭނުންވާއިރު، ދައުލަތުގެ މުއައްސަސާތަކާއި އަމިއްލަ ވިޔަފާރިތަކާއި، އާންމު ރައްޔިތުން ގުޅިގެން މަސައްކަތްކޮށްފިނަމަ، ކޮރަޕްޝަންގެ ވަބާއިން ސަލާމަތްވެ، ފުދުންތެރި މުޖުތަމަޢެއް ބިނާކުރުމުގެ ލަނޑުދަނޑި ހާސިލުކުރެވޭނޭކަން މާލީ ވުޒާރާއިން ވަނީ ފާހަގަކޮށްފައެވެ.