ސައުދީން އިރާގަށް ދިން ހަމަލާގައި 20 މީހުން މަރުވި؛ އިރާގުން ކުއްލި ބައްދަލުވުމެއް ބާއްވަނީ

ސައުދީ އަރަބިއްޔާއިން އެމެރިކާއާ ގުޅިގެން އިރާގަށް ދިން ވައިގެ ހަމަލާތަކެއްގައި 20 މީހުން މަރުވެފައިވާ ކަމަށް އިރާޤުން ބުނެފިއެވެ.

މި ހަމަލާއާ ގުޅިގެން، އިރާގުގެ ސަރުކާރުން ކުއްލި ސަލާމަތީ ބައްދަލުވުމެއް ބާއްވަން ވަނީ ގޮވާލައިފިއެވެ.

އިރާގުގެ 'ޕޮޕިއުލާ މޮބިލައިޒޭޝަން ޔުނިޓްސް' އިން ހާމަކުރި ގޮތުގައި، ރޭގެ ވަގުތެއްގައި ސައުދީ އާއި އެމެރިކާ ގުޅިގެން އިރާގުގެ އެކި ޕްރޮވިންސްތަކުގައި ހުރި އެ ޖަމާއަތުގެ މަރުކަޒުތަކަށް ދިން ވަރުގަދަ ހަމަލާތަކުގައި އެ ޖަމާއަތުގެ 20 މެންބަރަކު ވަނީ މަރުވެފައެވެ. އަދި އިތުރު 32 މީހަކު ޒަހަމްވެފައިވާ ކަމަށްވެސް އެ ޖަމާއަތުން ބުނެފައިވެއެވެ.

މި ހަމަލާތަކާ ގުޅިގެން އިރާގުގެ ބޮޑުވަޒީރު އަލީ އަލް-ޒައިދީ ވަނީ ނޭޝަނަލް ސެކިއުރިޓީއާ ބެހޭ މިނިސްޓްރީގެ މަޖިލީހުގެ ކުއްލި ބައްދަލުވުމަކަށް އަމުރުކުރައްވާފައެވެ.

އިރާގުގެ ސެކިއުރިޓީ މީޑިއާ ސެލްއިން ނެރުނު ބަޔާނެއްގައި ބުނެފައިވަނީ، އަމްނުއާ ބެހޭ ކަންކަމުގައި އެންމެ އިސްކޮށް ހުންނަވާ ބޮޑުވަޒީރު، މިއަދު ފަތިހު ގައުމަށް ދިން ވައިގެ ހަމަލާތަކާއި ސަލާމަތީ މަސްލަހަތުތަކާ ގުޅޭގޮތުން މަޝްވަރާކުރުމަށް ކައުންސިލްގެ މެންބަރުންނަށް އަންގަވާފައިވާ ކަމަށެވެ.

ސައުދީ އަރަބިއްޔާގެ މިނިސްޓްރީ އޮފް ޑިފެންސް އިން ހާމަކުރި ގޮތުގައި، އެމެރިކާގެ ސެންޓްރަލް ކޮމާންޑް (ސެންޓްކޮމް) އާ ގުޅިގެން ބުދަ ދުވަހު ދިން މި ހަމަލާތަކަކީ ސައުދީގެ ހަކަތައާ ބެހޭ އިންފްރާސްޓްރަކްޗަރަށް ދެމުންދާ ހަމަލާތަކަށް ރައްދު ދިނުމުގެ ގޮތުން ދިން ހަމަލާތަކެކެވެ. ސައުދީގެ ދިފާއީ ވުޒާރާއިން ބުނީ މިއީ އެ ގައުމުގެ ތެޔޮ ވަސީލަތްތަކަށް އަމާޒުކޮށް އިރާގުގެ ސަރަހައްދުން ފޮނުވާލާ ޑްރޯން ހަމަލާތަކަށް ދިން ރައްދެއް ކަމަށެވެ.

މި އޮޕަރޭޝަނާ ގުޅޭގޮތުން ވާހަކަ ދައްކަވަމުން ސައުދީ ޑިފެންސް މިނިސްޓްރީގެ ތަރުޖަމާނު މޭޖަރ ޖެނެރަލް ތުރުކީ އަލް މާލިކީ ވިދާޅުވީ، މިދިޔަ ހޯމަ އަދި އަންގާރަ ދުވަހު ސައުދީގެ އީސްޓަން ޕްރޮވިންސް އަދި ރިޔާދު ސަރަހައްދުގައި ހުރި ތެޔޮ ވަސީލަތްތަކަށް ޑްރޯން ހަމަލާތަކެއް ދޭން މަސައްކަތް ކޮށްފައިވާ ކަމަށެވެ. އެ ހަމަލާތައް ސައުދީގެ އެއާ ޑިފެންސް ސިސްޓަމްތަކުން ހުއްޓުވާފައިވާއިރު، އެއީ އިރާގުގައި ހަރަކާތްތެރިވާ އީރާނަށް ތާއީދުކުރާ ހަނގުރާމަވެރި ޖަމާއަތްތަކުން ދިން ހަމަލާތަކެއްކަން ކަށަވަރުވެފައިވާ ކަމަށް އޭނާ ވިދާޅުވިއެވެ.

އަލް މާލިކީ އިތުރަށް ވިދާޅުވީ، ބުދަ ދުވަހުގެ އަސްކަރީ ހަމަލާތަކަކީ އދ. ގެ ޗާޓަރުގެ 51 ވަނަ މާއްދާގެ ދަށުން އަމިއްލަ ނަފްސުގެ ދިފާއުގައި ދިން ހަމަލާތަކެއް ކަމަށެވެ. އަދި ބޭނުންވާ ވަގުތެއްގައި އަދި ބޭނުންވާ ތަނަކަށް ރައްދު ހަމަލާ ދިނުމުގެ އިހުތިޔާރު ސައުދީއަށް އޮތް ކަމަށް އޭނާ ވިދާޅުވިއެވެ.

ސައުދީގެ ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، އިރާގުގައި ހަރަކާތްތެރިވާ އީރާނަށް ތާއީދުކުރާ ޖަމާއަތްތަކުން ބައިނަލްއަގުވާމީ ގާނޫނުތަކާ ހިލާފުވެ، ސަރަހައްދީ ހަމަޖެހުން ނަގާލަން މަސައްކަތް ކުރަމުންދާ ކަމަށެވެ. ސައުދީން ބޭނުންވަނީ މަސްލަހަތު ހިފެހެއްޓުމަށް ކަމަށްވިޔަސް، ގައުމުގެ އިސްތިގުލާލާއި ރައްޔިތުންގެ ރައްކާތެރިކަމަށްޓަކައި އަޅަންޖެހޭ ކޮންމެ ފިޔަވަޅެއް އަޅާނެ ކަމުގެ އިންޒާރު ސައުދީ ސަރުކާރުން ވަނީ ދީފައެވެ.