އިންޑިޔާއިން 565 މިލިއަން ޑޮލަރުގެ އެލްއޯސީއެއް؛ މިނިވަން ވިޔަފާރީގެ އެއްބަސްވުމުގެ މަޝްވަރާތައް ފަށަނީ

ރާއްޖޭގައި މުހިއްމު ތަރައްގީގެ މަޝްރޫއުތައް ތަންފީޒުކުރުމަށް އިންޑިޔާގެ އިމްޕޯޓް އެންޑް އެކްސްޕޯޓު ބޭންކު (އެގްޒިމް ބޭންކު) މެދުވެރިކޮށް 565 މިލިއަން އެމެރިކާ ޑޮލަރުގެ ލައިން އޮފް ކްރެޑިޓެއް ހަމަޖައްސައި، އިންޑިޔާއާއި ރާއްޖޭގެ މެދުގައި މިނިވަން ވިޔަފާރީގެ އެއްބަސްވުން ގާއިމުކުރުމުގެ ރަސްމީ މަޝްވަރާތައް ފެށުމަށް އެއްބަސްވެއްޖެ އެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ރަސްމީ ދައުވަތުފުޅަކަށް، ދެ ދުވަހުގެ ފުރަމާަނަ ދަތުރުފުޅެއްގައި މިއަދު ރާއްޖެއަށް ވަޑައިގެންނެވި އިންޑިޔާގެ ބޮޑުވަޒީރު ނަރެންދުރަ މޯދީއާއެކު ރައީސް އޮފީހުގައި ބޭއްވެވި ރަސްމީ މަޝްވަރާތަކަށްފަހު މުހިއްމު އަށް އެއްބަސްވުމުގައި ދެ ގައުމުގެ މެދުގައި ސޮއިކުރެވުނެވެ.

މި އެއްބަސްވުންތަކުގެ ތެރޭގައި ރާއްޖެއަށް 565 މިލިއަން އެމެރިކާ ޑޮލަރުގެ ލައިން އޮފް ކްރެޑިޓެއް އިންޑިޔާގެ އެގްޒިމް ބޭންކު މެދުވެރިކޮށް ހަމަޖެއްސުމަށް ގާއިމުކުރެވުނު ފަހުމުނާމާ ހިމެނެއެވެ. އެ ފަހުމުނާމާގައި ރާއްޖޭގެ ފަރާތުން ސޮއިކުރެއްވީ ފިނޭންސް މިނިސްޓަރު މޫސަ ޒަމީރެވެ. އިންޑިޔާގެ ފަރާތުން ސޮއިކުރެއްވީ އެ ގައުމުގެ އެކްސްޓާނަލް އެފެއާޒް މިނިސްޓަރު ޑރ.ސުބްރަމާނިޔަމް ޖައިޝަންކަރެވެ.

އެއްބަސްވުންތަކުގައި ސޮއިކުރުމުގެ ރަސްމިއްޔާތަށްފަހު ނޫސްވެރިންނާ ބައްދަލުކުރަައްވައި ދެއްކެވި ވާހަކަފުޅުގައި ރައީސްވަނީ މި ފައިސާއަކީ އެމަނިކުފާނުގެ ސަރުކާރުން އަސްކަރީ، ތައުލީމީ، ސިއްހީ އަދި ބޯހިޔާވަހިކަމުގެ ދާއިރާއިން ކުރިއަށްގެންދިއުމަށް އިސްކަންދޭ މަޝްރޫއުތައް ތަންފީޒުކުރުމަށް ބޭނުންކުރެވޭނެ ފައިސާކަން ފާހަގަކުރައްވައި އިންޑިޔާއަށް ޝުކުރު އަދާކުރައްވާފައެވެ.

މި އެއްބަސްވުމުގެ އިތުރަށް ދެން ސޮއިކުރެވުނު އެންމެ މުހިއްމު އެއްބަސްވުމަކީ އިންޑިޔާއާއި ރާއްޖޭގެ މެދުގައި މިނިވަން ވިޔަފާރީގެ އެއްބަސްވުމެއް ގާއިމުކުރުމަށް ރަސްމީކޮށް މަޝްވަރާތައް ފެށުމާ ގުޅޭ އެއްބަސްވުމެވެ. ރާއްޖެއާއި އިންޑިޔާގެ މެދުގައި މިނިވަން ވިޔަފާރީގެ އެއްބަސްވުމެއް ގާއިމުކުރެވިއްޖެނަމަ، އެވާނީ ރާއްޖެއާއި އެހެން ގައުމަކާމެދު ގާއިމުކުރެވޭ ދެވަނަ މިނިވަން ވިޔަފާރީގެ އެއްބަސްވުމަށެވެ. މި އެއްބަސްވުމުގައި ރާއްޖޭގެ ފަރާތުން ސޮއިކުރެއްވީ އިގުތިސާދީ ތަރައްގީއާ ބެހޭ ވަޒީރު މުަހައްމަދު ސައީދެވެ. އިންޑިޔާގެ ފަރާތުން ސޮއިކުރެއްވީ އެ ގައުމުގެ ހާރިޖީ ވަޒީރެވެ.

ރައީސް ނޫސްވެރިންނާ ބައްދަލުކުރައްވައި ދެއްކެވި ވާހަކަފުޅުގައި ރައީސް ވިދާޅުވީ މި އެއްބަސްވުން ގާއިމުކުރެވުމުން ރާއްޖެއާއި އިންޑިޔާގެ މެދުގައި އޮތް ވިޔަފާަރިއާއި އިގުތިސާދީ ގުޅުން އެތައް ގުނައެއް ފުޅާަކުރެވި، ދެ ގައުމުގެ މެދުގައި ވިޔަފާރިއާއި އިންވެސްޓުމެންޓު ދައުރުކުރުމަށް ލުއި ފަސޭހަތަކެއް ލިބިގެންދާނެ ކަމަށެވެ.

މި އެއްބަސްވުންތަކުގެ އިތުރަށް އިންޑިޔާއިން ރާއްޖޭގެ ރަސްމީ ބޭރު ފައިސާގެ ރިޒާވްގެ ހާލަތު ރަނގަޅުކުރުމަށް ހަމަޖައްސައިދީފައިވާ ކަރަންސީ ސްވޮޕް ފެސިލިޓީއާ ގުޅޭ އިތުރު އެއްބަސްވުމެއްގަައި ސޮއިކުރެވުނެވެ.

ރައީސްވަނީ ރާއްޖެއަށް ކުރިމަތިވެފައިވާ އިގުތިސާދީ އަދި މާލީ ގޮންޖެހުންތަކުން އަރައިގަތުމުގައި އިންޑިޔާއިން ފޯރުކޮށްދެމުންދާ އެހީތެރިކަން ފާހަގަކުރައްވައި ހާއްސަ ޝުކުރެއް އަދާކުރައްވާފައެވެ.