ދުނިޔެއަށް ކުރިމަތިވި އިޤްތިޞާދީ ކާރިސާތަކުގެ އަސްލަކީ ރިބާގެ ނުރައްކާތެރި ވަބާ: ޚުޠުބާ

މުޅި ދުނިޔެއަށް މިހައި ތަނަށް ކުރިމަތިވެފައިވާ އިޤްތިޞާދީ ގިނަ ކާރިސާތައް މެދުވެރިވި ސަބަބަކަށް ވެފައިވަނީ، ރިބާގެ ނުރައްކާތެރި ވަބާ ކަމުގައި މިއަދުގެ ހުކުރު ޚުޠުބާގައި ބުނެފިއެވެ.

”ޙަލާލު ގޮތުގައި މާލީ މުޢާމަލާތްތައް ކުރުން“ މައުޟޫއަށް މިއަދު އިއްވި، ހުކުރު ޚުތުބާގައި ބުނީ، الله سُبْحَانَهُ وَتَعَالَى ހެއްދެވި އެންމެހައި މަޚްލޫޤުންގެ ތެރެއިން އެންމެ މާތްކުރައްވައި، މަތިވެރިކުރައްވައިފައިވަނީ އިންސާނާ ކަމަށާ އެއީ، އޭނާއަށް ހެވާއި ނުބައި ވަކިކޮށް، ދެނެގަނެވޭނެ ބުއްދި ދެއްވުމުން ކަމަށެވެ.

މިއާއެކު ޚުތުބާގައި ބުނީ، ބަވަނަވެފައިވާ ދުނިޔެއެއްގައި، މުޅި އިޤުތިޞާދު ހުޅަނގުގެ ފަލްސަފާގެ މައްޗަށް ބިނާކުރެވިފައި އޮތްއިރު، މާލީ މުޢާމަލާތުތަކުގެ ތެރޭގައި ހިމެނޭ އިސްލާމްދީނުގައި ޙަރާމްކުރައްވައިފައިވާ ކަންކަމުން ސަލާމަތްވާން ޖެހޭ ކަމަށެވެ.

އަދި މީގެ ކުރީން މަޖުބޫރު ޙާލަތެއްގައި ތިބެ، ރިބާ ހިމެނޭ ލޯނުތަކާއި، އިންޝުއަރެންސު ނަގާން ޖެހުނު ކަމުގައި ވިޔަސް، މިއަދު، އިސްލާމީ އުޞޫލުން ޚިދުމަތްދޭ ބޭންކުތަކާއި، ތަކާފުލް ކުންފުނިތައް ދިވެހިރާއްޖެއާއި މުޅި ދުނިޔޭގައި ތަޢާރަފުވެފައިވާ ކަމަށެވެ. އެގޮތުން، މިއަދު މުސްލިމް ޤައުމުތަކުގެ އިތުރަށް އެހެނިހެން ޤައުމުތަކުގައި ވެސް އިސްލާމީ ޝަރީޢަތް ހުއްދަކުރާ ގޮތަށް ފައިސާ ރައްކާކުރުމާއި، ފައިސާގެ މުޢާމަލާތުތައް ހިންގޭނެ ބޭންކުތަކާއި މުއައްސަސާތައް ކާމިޔާބުކަމާ އެކު ހިންގާން ފަށައިފައިވާ ކަމަށް ޚުތުބާގައި ބުންޏެވެ. އެހެންކަމުން، އިސްލާމީ ޝަރީޢަތްހުއްދަކުރާ ގޮތަށް، މާލީ މުޢާމަލާތުތައް ކުރެވެން ނެތް ކަމަށް މިއަދު ނިންމޭކަށެއް ނެތް ކަމަށްވެސް ބުނެފައިވެއެވެ.

މިއާއެކު ހުކުރު ޚުތުބާގައި ބުނީ، އިސްލާމް ދީނުގައި ރިބާގެ ހުރިހައި މުޢާމަލާތުތަކެއް ޙަރާމްކުރައްވައިފައިވާ ކަމަށާ، ރިބާގެ މުޢާމަލާތަކީ، الله سُبْحَانَهُ وَتَعَالَى ޙަރާމްކުރައްވައިފައިވާ، ހަލާކުކުރަނިވި ބޮޑެތި ހަތް ފާފައިގެ ތެރޭގައި ހިމެނޭ ކަމެއް ކަމަށެވެ.

”ރިބާ ކާމީހާ ފާފަވެރިވާ ފަދައިން، އެކަމުގައި ޝާމިލުވާ އެހެނިހެން މީހުން ވެސް ފާފަވެރި ވެއެވެ. އެބަހީ، ރިބާ ކާމީހާއާއި، ރިބާ ދޭ މީހާއާއި، އެކަމާ ގުޅޭ ލިޔުންތައް ލިޔާ މީހާއާއި އެ ކަމަށް ހެކިވާ މީހުން ވެސް ހިމެނޭ ގޮތަށް، މި އެންމެންނަކީ، ފާފާގައި ހަމަހަމަ ބައެއްކަމާއި، މި އެންމެންނަށް اللهގެ ލަޢުނަތް ހުރިކަމަށް ނަބިއްޔާ ﷺ ވަނީ މި އުންމަތަށް އިންޒާރުކުރައްވައިފައެވެ.“

ޚުތުބާ

”އެކަލޭގެފާނު ޙަދީޘްކުރައްވައިފައި ވެއެވެ. (لَعَنَ رَسُوْلُ اللهِ صَلَّى اللهُ عَلَيْهِ وَسَلَّمَ آكِلَ الرِّبَا، وَمُوْكِلَهُ، وَشَاهِدَهُ وَكَاتِبَهُ) މާނައީ: "ރިބާ ކާމީހާއާއި، ރިބާގެ ގޮތުގައި ފައިސާއާއި މުދާ ދޫކުރާ މީހާއާއި، އެ މުޢާމަލާތުގައި ހެކިވާ މީހާއާއި، އެ ކަމުގެ ލިޔެކިޔުންތައް ލިޔެ، ބަލަހައްޓާ މީހާގެ މައްޗަށް ރަސޫލު الله ﷺ ލަޢުނަތް ލެއްވިއެވެ."

ޚުތުބާގައި އިތުރަށް ބުނީ، ރިބާއަކީ، މުދަލުގެ ބަރަކާތް ކެނޑި، ދިރިއުޅުން ނުތަނަވަސްވެ، ލިބޭ މިންވަރާ މެދު ހިތްހަމަނުޖެހި، މުދަލާއި ފައިސާއަށް އިންސާނާގެ ދަހިވެތިކަން މަތިމައްޗަށް އިތުރުކުރުވާ ނުރައްކާތެރި ވަބާއެއް ކަމަށެވެ. މީގެ އިތުރަށް، އެއީ އުޚުރަވީ ޙަޔާތުގައި ވެސް ވޭންދެނިވި ޢަޛާބާ ކުރިމަތިލާން ޖެހޭނޭ ކަމެއް ކަންވެސް ފާހަގަކޮށްފައިވެއެވެ.

”މުޅި ދުނިޔެއަށް މިހައި ތަނަށް ކުރިމަތިވެފައިވާ އިޤްތިޞާދީ ގިނަ ކާރިސާތައް މެދުވެރިވި ސަބަބަކަށް ވެފައިވަނީ، ރިބާގެ ނުރައްކާތެރި ވަބާއެވެ. ރިބާގެ ސަބަބުން އިޤްތިޞާދީ ނަފާވެރިކަން މަދުބައެއްގެ އަތްމައްޗަށް ގޮސް، މުޅި މުޖުތަމަޢުގެ ތެރޭގައި އޮންނާންޖެހޭ އިޤްތިޞާދީ ޢަދުލުވެރިކަން ނެތި ކޮށްލައެވެ.“ ޚުތުބާގައި ބުންޏެވެ.

މީގެ އެތައް ސަތޭކަ އަހަރެއް ކުރީން، ވިޔަފާރިއާއި ރިބާއާ ބެހޭ ގޮތުން ބަޔަކު ބުނަމުން ދިޔަ ބަސްތައް، މާތް الله ވަނީ ކީރިތި ޤުރްއާނުގައި ބަޔާންކޮށްދެއްވައިފައެވެ. އެ ބަސްފުޅުގެ މާނައީ: "އެހެނީ، އެއުރެން ބުނެއުޅުނީ، ވިޔަފާރި ވާކަން ކަށަވަރީ، ރިބާ ކަހަލަ ކަމެއްކަމުގައެވެ." މިއީ މި އަދު މަދުން ނަމަވެސް އަހަރެމެންގެ މުޖުތަމަޢުން އިވޭ އަޑެކެވެ.

ޚުތުބާ

މިއަދުގެ ހުކުރު ޚުޠުބާގައި އިސްލާމީ އުއްމަތަށް ވަސިއްޔަތް ކުރައްވައިފައިވަނީ، އަހަރެމެންގެ ކޮންމެ ޢަމަލަކީ ވެސް މާތް الله ބައްލަވައިވޮޑިގެންވާ ޢަމަލެއްކަން ހަނދުމަކޮށް، ދުނިޔެއާއި އާޚިރަތުގައި ކާމިޔާބަށް އެދި، އަހަރެމެންގެ އުޅުމާއި ގުޅުން އިޞްލާޙުކުރުމަށެވެ. އަހަރެމެން ދެއަތް އުފުލައި ކުރާ ދުޢާ، اللهގެ ޙަޟުރަތަށް އުފުއްލެވުމަށް އެދޭ ހިނދު، ރިބާގެ ވަބާ ފަދަ، މާތް الله ޙަރާމްކުރައްވައިފައިވާ އެންމެހައި ޢަމަލުތަކުން ދުރުހެލިވުމަށް މި މަތިވެރި މިންބަރު މަތީގައި ހުރެ ނަސޭހަތްތެރިވެ ވަސިއްޔަތްކޮށްފައިވެއެވެ.

މާތް الله ރުހިވޮޑިގަންނަވާ ގޮތަށް އަޅުކަންކުރުމަށް އިސްކަންދޭ ފަދައިން، މާލީ މުޢާމަލާތުތައް ވެސް اللهގެ ރުހިވޮޑިގަތުން ލިބޭނޭ ގޮތަށް ބައްޓަންކުރުމަށް މަސައްކަތްކުރުމަށް ޚުޠުބާގައި ވަނީ ގޮވާލާފައެވެ.