ކޯވިޑް ލޯނުގެ އިންޓަރެސްޓް މާފުކޮށް، ކުރިން ދެއްކި އިންޓަރެސްޓް ފައިސާ އަނބުރާ ދޭން ނިންމައިފި!
ލިޔުންތެރިޔާ
ޚަދީޖާ އަރުފާ
ކޯވިޑާ ގުޅިގެން ދޫކުރި ލޯނުތަކުގެ އިންޓަރެސްޓް މަޢާފްކޮށް، ލޯނުގެ އަސްލު އަދަދަށް ވުރެ އިތުރަށް އިންޓަރެސްޓްގެ ގޮތުގައި މިހާތަނަށް ދައްކާފައިވާ ފައިސާ އަނބުރާ ރައްދުކުރުމަށް އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން، އެސްޑީއެފްސީން ނިންމައިފިއެވެ.
ކޯވިޑާއި ގުޅިގެން ކުރީގެ ސަރުކާރުން ދޫކުރި ލޯނުތަކުގެ ހުރިހާ އިންޓްރަސްޓެއް މައާފު ކޮށްދެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ނިންމުމާއި ގުޅިގެން އެސްޑީއެފްސީން އަމަލުކުރަން ހަމަޖެހިފައިވާ ގޮތް އެކުންފުނިންވަނީ ހާމަކޮށް މީސް މީޑިއާގައި ކުރި ޕޯސްޓެއްގައި ބުނީ، ކޮވިޑާއި ގުޅިގެން ލޯނު ނަގާފައިވާ ފަރާތްތަކުގެ ލޯނުގެ އިންޓްރަސްޓް މާފްކުރުމުން އަންނަ ބަދަލުތައް ކަސްޓަމަރ ޕޯޓަލް މެދުވެރިކޮށް، އީދު ބަންދަށްފަހު ސަރުކާރު ހުޅުވޭ ހަފްތާ ތެރޭގައި ހިއްސާ ކުރާނެކަމަށެވެ.
އަދި ކޯވިޑާއި ގުޅިގެން ކުރީ ސަރުކާރުން ދޫކޮށްފައިވާ ލޯނުތަކަށް އިންޓްރަސްޓުގެ ގޮތުގައި މިހާތަނަށް ދައްކާފައިވާ ފައިސާ ލޯނުގެ އަސްލު އަދަދުން އުނިކުރެވޭނެކަމަށާ، މިގޮތަށް އުނިކުރުމުން ލޯނުގެ އަސްލު އަދަދަށް ވުރެ އިތުރަށް އެއްވެސް ފައިސާއެއް ދެއްކިފައިވާނަމަ އެ ފައިސާ އަނބުރާ ލޯނު ނެގި ފަރާތަށް ރައްދުކުރާނެކަމަށް އެސްޑީއެފްސީން ބުނެފައިވެއެވެ.
މީގެ އިތުރުން އެސްޑީއެފްސީން ބުނީ މިހާތަށް ލޯނު އަނބުރާދައްކާ ޚަލާސްކޮށްފައިވާ ފަރާތްތަކަށްވެސް ލޯނުގެ އިންޓްރަސްޓްގެ ގޮތުގައި ދައްކާފައިވާ އަދަދު އަނބުރާ ރައްދު ކުރާނެކަމަށެވެ.
އެސްޑީއެފްސީން ބުނެފައިވާ ގޮތުން، ކޯވިޑް-19 ވިޔަފާރި އެހީ ލޯނުގެ ދަށުން ދޫކޮށްފައިވާ ހުރިހާ ލޯނުތައް އަނބުރާ ދައްކަން ޖެހޭ މުއްދަތު ލޯނު ދޫކުރި ތާރީޚުން ފެށިގެން 10 އަހަރަށް އިތުރު ކޮށްދޭނެއެވެ.
ކޯވިޑް-19އާއި ގުޅިގެން ކުދި އަދި މެދު ފަންތީގެ ވިޔަފާރިތަކަށް ލިބިފައިވާ ގެއްލުމުން އަރައިގަތުމަށް "ރިކަވަރީ ލޯނު ސްކީމް"ގެ ދަށުން 352.8 މިލިއަން ރުފިޔާ ދޫކޮށްފައިވެއެވެ. މީގެ ތެރެއިން އެންމެ ގިނަ ލޯނު ދޫކޮށްފައިވަނީ މުދާ ވިއްކުމުގެ ވިޔަފާރިކުރާ ފަރާތްތަކަށެވެ. އެގޮތުން އެދާއިރާގައި ހަރަކާތްތެރިވާ 846 ފަރާތަކަށްވަނީ 201.1 މިލިއަން ރުފިޔާ ދޫކޮށްފައެވެ.
އެލޯން ތަކުގެ އިންޓަރެސްޓް މައާފް ކޮށްދެއްވާނެކަން ރައީސް އިއުލާން ކުރެއްވީ ރޭ ފުނަދޫގައި ބޭއްވި ޖަލްސާގައެވެ. އެސްޑީއެފްސީގެ އިތުރުން އެޗްޑީއެފްސީން ދޫކުރި ލޯންތަކުގެ އިންޓަރެސްޓްވެސް މައާފް ކުރެއްވުމަށް ރައީސް ވަނީ ނިންމަވާފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
