މިސަރުކާރުން މަސްވެރިންނާއި އޮޑިވެރިން މަގުމަތިކޮށްފި: މުހުތާޒު

ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙުގެ މި ސަރުކާރުން މަސްވެރިންނާއި އޮޑިވެރިން މަގުމަތިކޮށްފައިވާ ކަމަށް ކުރީގެ ޕްރޮސެކިއުޓާ ޖެނެރަލް މުހުތާޒު މުހުސިން ވިދާޅުވެއްޖެެއެވެ.

ރިޔާސީ އިންތިޚާބާއި ދިމާކޮށް މަސް ކިލޯއެއްގެ އަގު 25ރ. އަށް ބޮޑުކުރި ކުރުން އަލުން، ރިވިއު ކުރުމަށް ފިނޭންސް މިނިސްޓްރީއާއި ސަރުކާރުގެ އިދާރާތަކާއެކު މަޝްވަރާ ކުރަމުންދާ ކަމަށް މިފްކޯއިން ބުނި ކަމަށް ބައެއް ނޫސްތަކުން ރިޕޯޓް ކުރުމާ ގުޅިގެން، މުހުތާޒު ކުރެއްވި ޓްވީޓެއްގައި ވިދާޅުވީ، މި ސަރުކާރުން ސިޔާސީ މަންފާއަށް މަސްވެރިކަމުގެ ސިނާއަތު ބޭނުންކޮށް، ވޯޓުގެ ދަހިވެތިކަމުގަ މަސް ގަންނަ އަގަށް ގެނެވުނު ބަދަލުގެ ސަބަބުން ހުރިހާގެއްލުމެއް ލިބިގެން ގޮސްފައިވަނީ މަސްވެރިންނަށާއި އޮޑިވެރިންނަށް ކަމަށެވެ.

"މިސަރުކާރުން މަސްވެރިންނާއި އޮޑިވެރިން މަގުމަތިކޮށްފި. ނޫއިގްތިސާދު މިވީ ކަޅުވަކަރު އިގްތިސާކަށް." މުހުތާޒް ވިދާޅުވި އެވެ.

މިފްކޯގެ މެނޭޖިން ޑިރެކްޓަރު އިސްމާއިލް ފައުޒީ އާއި ހަވާލާދީ އޮންލައިން ނޫސް 'މިހާރު' ގައި ބުނެފައިވާ ގޮތުން، މަސް ކިލޯއެއް ގަންނަ އަގު 25 ރުފިޔާއަށް ބޮޑުކުރި ނަމަވެސް މާކެޓުގެ އަގު ހުރި ގޮތުން މި ވަގުތު އަގު ހުންނަން ޖެހޭނީ 20 ރުފިޔައަށް ވުރެ ވެސް ދަށް އަގެއްގައެވެ. އެހެން ނޫން ނަމަ އެކުންފުނީގެ ހަރަދުތައް ހަމަޖައްސަން ވަރަށް ބޮޑަށް ދަތިވާނެ ކަމަށާއި މިހާރުވެސް އެ ކުންފުނީގެ އޮޕްރޭޝަން ދަނީ ވަރަށް ދަށްކޮށް ކަމުގައި ފައުޒީ ވިދާޅުވި ކަމަށް އެ ނޫހުގައި ވެއެވެ.