ފަލަސްޠީން ރައްޔިތުންގެ ހައްގުތައް ދިފާއު ކުރަން ހުށަހެޅި ގަރާރު ހުއްޓުނީ މަޖިލިސް ހުއްޓުވީމަ: ސައުދު

ޤާނޫނު އަސާސީ އާއި ރައްޔިތުންގެ މަޖިލީހުގެ ގަވާއިދާއި ޚިލާފުވާ ފަރާތް ތަކަށް ފިޔަވަޅު އަޅަން ޖެހޭކަމަށް ވިލިނގިލި ދާއިރާގެ މެމްބަރު ސައުދު ހުސައިން ވިދާޅުވެއްޖެއެވެ.

މިފަދައިން ސައުދު ހުސައިން ވިދާޅުވެފައި ވަނީ މިއަދު ކުރެއްވި ޓްވީޓެއްގައެވެ.

މީގެ އިތުރުން ވެސް ސައުދު ބުނެފައި ވަނީ  މަޖިލިސް ގަވާއިދު ބޭނުން ގޮތަކަށް މާނަކޮށް މަޖިލިސް ހުއްޓުވާފައި ބޭއްވުމުގެ ސަބަބުން ފަލަސްތީނުގެ ރައްޔިތުންގެ ހައްގުތައް ދިފާއު ކުރުމަށް ދިވެހި ރާއްޖޭގެ ރައްޔިތުންގެ މަޖިލީހުން ބަހުސް ކޮށް ފާސް ކުރަން ޖެހޭ ގަރާރުގެ މަސައްކަތް ހުއްޓުމަކީ ވެސް ނުހަނު ކަންބޮޑުވާ ކަމެއް ކަމަށެވެ.

"ރައްޔިތުންގެ ހައްގުގައި ކުރަން ޖެހޭ އެތައް މަސައްކަތް ތަކެއް މިވަނީ ހުއްޓުމަކަށް އައިސްފައި. މަޖިލިސް ގަވާއިދުގައި މަޖިލިސް ހުއްޓުވާފައި ބޭއްވޭނެ އެއްވެސް ގޮތެއްނެތް." ސައުދު ކުރެއްވި ޓްވީޓްގައި ވެއެވެ.

މަޖިލިސް ކުރިއަށް ގެންދެވެން ޖެހޭނެ ކަމަށާއި ޤާނޫނު އަސާސީ އާއި މަޖިލީހުގެ ގަވާއިދާ ޚިލާފުވާ ފަރާތްތަކަށް ފިޔަވަޅު އެޅުމަށް ވިލިނގިލި ދާއިރާގެ މެމްބަރު ވަނީ ގޮވާލައްވާފައެވެ.

ސައުދު މިހެން ވިދާޅުވެފައި ވާއިރު ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ މައްސަލަ ސުޕްރީމް ކޯޓުގައި އޮތުމުގެ ސަބަބުން މަޖިލީހަށް ވަޑައިގަތުމަށް އުޒުރުވެރި ވާކަމަށް މަޖިލީހުގެ ނައިބު ރައީސާ އީވާ އަބްދުالله ވަނީ މަޖިލީހުގެ އިދާރާއަށް ސިޓީއަކުން އަންގަވާފައެވެ. އެހެންނަމަވެސް މަޖިލީހުން މިއުޒުރު ގަބޫލު ނުކުރައްވާ ކަމަށް ބުނެ އީވާ އަށް ވަނީ ޖަވާބު ދާރީ ވެފައެވެ.

ރައީސް ނަޝީދުގެ އިތުބާރު ނެތް ކަމުގެ މައްސަލައިގެ އަޑު އެހުންތައް ވަނީ ސުޕްރީމް ކޯޓުން އިއްޔެ ނިންމަވާލައްވާފައެވެ. ދެން އޮންނާނީ އެ މައްސަލަ އަށް ހުކުމް ކުރެއްވުން ކަމަށް ސުޕްރީމް ކޯޓުން އެންގެވިއެވެ.