އެކްސިޑެންޓުތައް އިތުރުވާތީ ޓްރެފިކް ޕޮލިހުން މަޖިލީހަށް ހާޒިރުކުރަނީ

މަގުމަތީގެ ނުރައްކާތެރި އެކްސިޑެންޓުތައް އިތުރުވަމުންދާ މައްސަލައާ ގުޅިގެން، ރައްޔިތުންގެ މަޖިލީހުގެ ޖުޑީޝަރީ ކޮމިޓީއަށް ޓްރެފިކް ޕޮލިހުން ހާޒިރުކުރަން ފާސްކޮށްފިއެވެ.

މިއަދު ބޭއްވި ޖުޑީޝަރީ ކޮމިޓީގެ ބައްދަލުވުމުގައި ޓްރެފިކް ޕޮލިހުން ހާޒިރުކުރުމަށް ހުށަހެޅުއްވީ ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލެވެ. މި ހުށަހެޅުމަށް ހުޅުދޫ ދާއިރާގެ މެންބަރު މުޙައްމަދު ޝާހިދާއި ފޭދޫ ދެކުނު ދާއިރާގެ މެންބަރު އިސްމާޢީލް ނިޒާރު ވަނީ ތާޢީދުކުރައްވާފައެވެ.

މެންބަރު ނާޒިލް ވިދާޅުވީ، އެއްގަމު ދަތުރުފަތުރާ ގުޅޭ ސިޔާސަތުތައް ތަންފީޒުކުރުމުގައި ބޮޑެތި ގޮންޖެހުންތަކެއް އެބަހުރި ކަމަށެވެ. އަދި ޤަވާޢިދާ ޚިލާފަށް އުޅަނދު ދުއްވުން ޢާންމުވެފައިވުމަކީ އެކްސިޑެންޓުތައް ގިނަވާ މައިގަނޑު އެއް ސަބަބުކަން ފާހަގަކުރައްވަމުން އޭނާ ވިދާޅުވީ، މަގުމަތީގެ ޤަވާޢިދުތައް ތަންފީޒުކުރުމުގައި ފުލުހުންގެ ފަރާތުން އެކަށީގެންވާ ސަމާލުކަމެއް ނުލިބޭ ކަމަށެވެ. ޚާއްޞަކޮށް، ޓްރެފިކް ބެލެހެއްޓުމަށް ނެރޭ އޮފިސަރުން ޒިންމާދާރުކުރުވުމަކީ މުހިންމު ކަމެއްގެ ގޮތުގައި މެންބަރު ފާހަގަކުރެއްވިއެވެ.

މީގެއިތުރުން ކޮމިޓީގެ އެހެން މެންބަރުންވެސް ވަނީ، ޤާނޫނާއި ޤަވާޢިދުތަކަށް ޙުރުމަތްތެރިކޮށް ނުހިތުމަކީ މި މައްސަލަ އިތުރަށް ގޯސްވާ މައިގަނޑު ސަބަބުކަން ފާހަގަކުރައްވާފައެވެ.

އަދި މަގުމަތީގެ ރައްކާތެރިކަން ކަށަވަރުކުރުމަށް ސަރުކާރުން އަޅަމުންދާ ފިޔަވަޅުތަކާއެކު، ނުރައްކާތެރިކޮށް ދުއްވާ ފަރާތްތަކާ މެދު ހަރުކަށި ފިޔަވަޅު އެޅުމަށާއި، މިފަދަ ކަންކަމުގައި ފަރުދީ ޒިންމާ އަދާކުރުމުގެ މުހިންމުކަމުގެ މައްޗަށް މެންބަރުން އަލިއަޅުއްވާލެއްވިއެވެ.

ނުރައްކާތެރިކޮށް އުޅަނދު ދުއްވާ ފަރާތްތަކަށް ފިޔަވަޅު އެޅުމަށާއި މަގުމަތީގެ ސަލާމަތާއި ރައްކާތެރިކަން ދެމެހެއްޓުމަށްޓަކައި، ދިވެހި ފުލުހުންގެ ޚިދުމަތުން ވެސް މިހާރު ވަނީ ޚާއްޞަ އޮޕަރޭޝަނެއް ފަށައި، ފިޔަވަޅުތައް ވަރުގަދަކޮށްފައެވެ.