އެސްޓޯނިއާގެ ރައީސަށް ރައީސް މުޢިއްޒުގެ ޚާއްސަ ޝުކުރެއް
ލިޔުންތެރިޔާ
ޚަދީޖާ އަރުފާ
އެސްޓޯނިއާގެ ރައީސް އަލަރ ކަރިސްއަށް ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ޚާއްސަ ޝުކުރެއް އަދާކުރައްވައިފިއެވެ.
ރައީސް މުޢިއްޒު މިވަގުތު އެސްޓޯނިއާގައި ހުންނެވި އިރު، މިއީ ދިވެހިރާއްޖޭގެ ރައީސަކު އެސްޓޯނިއާއަށް ކުރައްވާ ފުރަތަމަ ދަތުރުފުޅެވެ.
މިދަތުރުފުޅާއި ގުޅޭގޮތުން ރައީސް މުޢިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އެސްޓޯނިއާގެ ރައީސާއި ސަރުކާރުން މި ތާރީޚީ ދަތުރުފުޅަށް ދެއްވި ދަޢުވަތަށް ޝުކުރު އަދާކުރައްވާ ކަމަށެވެ. އަދި އެ ޤައުމަށް ވަޑައިގަތް ފަހުން ލިބިވަޑައިގެންނެވި ފުރިހަމަ މެހެމާންދާރީއާއި ހޫނު މަރުޙަބާއަށް ޝުކުރު އަދާކުރެއްވިއެވެ.
ރައީސް މުޢިއްޒު އިތުރަށް ވިދާޅުވެފައިވަނީ، އިއްޔެ އެސްޓޯނިއާގެ ރައީސާއެކު ބޭއްވެވި ބައްދަލުވުމަކީ އުފާވެރި އަދި ފައިދާހުރި ބައްދަލުވުމެއް ކަމަށެވެ. މި ބައްދަލުވުމުގައި ދެ ޤައުމުގެ ގުޅުން ބަދަހިކުރުމަށް މަޝްވަރާކުރެވުނު ކަމަށް ރައީސް ވިދާޅުވިއެވެ.
އަދި ޑިޖިޓަލް ދާއިރާއާއި، ސައިބަރ ސެކިއުރިޓީއާއި، މޫސުމަށް އަންނަ ބަދަލުތަކާއި ތަޢުލީމީ ދާއިރާގެ ކަންކަމުގައި ދެ ޤައުމުގެ އިސްކަންދޭ ކަންތައްތަކުގެ މައްޗަށް ބިނާކޮށް ކުރިއަށް އޮތް އަހަރުތަކުގައި އެއް ވިސްނުމެއްގައި އެކުގައި މަސައްކަތްކުރާނެ ކަމަށް ވިދާޅުވިއެވެ.
މިއާއެކު ރައީސް މުޢިއްޒު ވިދާޅުވެފައިވަނީ، ދިވެހިރާއްޖެ އާއި އެސްޓޯނިއާ ފަދަ ކުދި ޤައުމުތަކުގެ މެދުގައި އެއްބައިވަންތަކަމާއި އެކުވެރިކަން އޮތުމަކީ އެ ޤައުމުތަކުގެ ސަލާމަތާއި މިނިވަންކަމަށް މުހިންމު ކަމެއްގެ އިތުރުން، ދުނިޔޭގެ ސުލްޙައާއި ދެމެހެއްޓެނިވި ތަރައްޤީއަށްވެސް މުހިންމު ކަމެއް ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
