ވަގުތީ ލިސްްޓުން 800 މީހުން އުނި ކުރެވުނު

ހުށުމާލޭ ދެވަނަ ފިޔަވަހިން ދޫކަރަން ނިންމާފައިވާ ހިޔާ މަޝްރޫއުގެ ވަގުތީ ލިސްޓުގައި ހިމެނުނު 800 އަށް ވުރެ ގިނަ މީހުންގެ ނަން ދާއިމީ ލިސްޓުން އުނިކޮށްފައިވާ ކަމަށް ހައުސިން މިނިސްޓަރ ޑރ. މުހައްމަދު މުއިއްޒު ވިދާޅުވެއްޖެއެވެ.

ހައުސިންގ މިނިސްޓްރީގައި ބޭއްވި ޕްރެސް ކޮންފަރެންސްގައި ވާހަކަ ދައްކަވަމުން މިނިސްޓަރ މުއިއްޒު ވިދާޅުވީ، ޝަކުވާ ހުށަހެޅުމަށް ހުޅުވާލި ތިން ހަފްތާގެ ތެރޭގައި 3000 އަށް ވުރެ ގިނަ ޝަކުވާ ހުށައަޅާފައިވާ ކަމަށާއި ދާއިމީ ލިސްޓު އިއުލާނު ކުރުމުގައި ހުށަހެޅިފައިވާ ޝަކުވާތަކަށް ބެލިފައިވާނެ ކަމަށެވެ.

އަދި މިނިސްޓްރީގެ އިހްމާލުތައް އިސްލާހް ކޮއްފައިވާކަމަށާއި ހުށަހެޅިފައިވާ ޝަކުވާތައް މަދުވެގެން ދެ މީހުން މެދުވެރިކޮށް ބަލާފައިވާ ކަމަށެވެ.

މީގެ އިތުރުން ފްލެޓްތައް ދީފައި ވަނީ ދެފުއް ފެންނަ ނިޒާމެއްގެ ތެރެއިން ފްލެޓް ލިބޭ ފަރާތްތަކަށް ޕޮއިންޓް ލިބޭނެ ގޮތާއި ޝަރުތުތައް ވެސް ކުރިއާލާ ހާމަކުރެވިގެންކަ ކަމަށް މިނިސްޓަރ ފާހަގަކުރެއްވިއެވެ.

ހިޔާފުލެޓަށް ފޯމް ހުށައެޅުމުގެ ފުރުސަތު ހުޅުވާލުމުން 22،000 އަށް ވުރެ ގިނަ ފޯމު ހުށަހެޅި ކަމަށާ މިފަރާތްތަކަށް ފްލެޓްތައް ދިނުމުގައި ދެ ލިސްޓަކަށް ކެޓަގަރީތައް ބަހާލެވިފައިވާކަމަށް ވެސް މިނިސްޓަރ ވިދާޅުވިއެވެ.

އެއި 7،000 ފްލެޓްގެ މަޝްރޫއު ލިސްޓާއި 2،500 ފްލެޓްގެ މަޝްރޫއުގެ ލިސްޓެވެ.

7،000 ފްލެޓްތަކުގެ މަސައްކަތް ވަރަށް ބާރަށް ކުރިއަށްދާ ކަމަށް މިނިސްޓަރ މުއިއްޒު ވިދާޅުވިއެވެ.

މީގެ އިތުރުން އެއް ކެޓަގަރީގެ ފްލެޓްތައް ދޫކުރުމުގައި ކުރިމަތިލާފައިވާ ހުރިހާ ފަރާތްތަކަށް ފްލެޓް ލިބިގެންދާނެ ކަމަށް ވެސް މިނިސްޓަރ ވިދާޅުވިއެވެ.

" ދެމަރިފިންނަށް ލިބިއްޖެ ނަމަ އެއް ފަރާތަކަށް ފްލެޓް ލިބޭނީ. އެގޮތަށް ވަގުތީ ލިސްޓުގައި ނަން ހިމެނުނު އެހެން ނަމަވެސް ދާއިމީ ލިސްޓުގައި ނަން ނުހިމެނޭ 768 ފަރާތެއް ނަން ހިމެނޭނެ. ޓާޓާ އާއި ގުޅީފަޅު ފްލެޓް ލިބުނު ފަރާތްތަކުގެ ނަންތައްވެސް ނުހިމެނޭނެ. ޓާޓާ އަދި ގުޅީފަޅުން ފްލެޓް ލިބުނު ހުރިހާ ފަރާތްތަކަށްވެސް ފްލެޓް ލިބިގެންދާނެ. މަދުން ނަމަވެސް މައުލޫމާތު އޮޅުވާލައިގެން ހުރި ފަރާތްތަކުގެ ނަންތައްވާނީ އުނިކުރެވިފައި. އެކެޓަގަރީން 46 ފަރާތެއްގެ ނަން ވާނީ އުނި ކުރެވިފައި." މުއިއްޒު ވިދާޅުވިއެވެ.

2،500 ފްލެޓްގެ މަޝްރޫއުގެ ލިސްޓު އާންމުކުރިކަމުގައި ވީނަމަވެސް އަދި މިހާތަނަށް އެ މަޝްރޫއުގެ އަމަލީ މަސައްކަތެއް ނުފަށައެވެ.

މިހެން ކަންކަން ހުރުމާއި ޔާމީންގެ ސަރުކާރު ނިމުމަކާ މިހާ ގާތްވެފައިވަނިކޮށް ފުލެޓްތަކުގެ ލިސްޓް އާންމުކޮއްފައިވާތީ ގިނަބަޔަކުދަނީ މި ފުލެޓްތައް ދެން އަންނަ ސަރުކާރެއްގައި ލިބޭނެތޯ ސުވާލު އުފައްދަަމުންނެވެ.

މިނިސްޓަރ އިތުރަށް ވިދާޅުވީ، މި ފްލެޓްތައް އަންނަ ސަރުކާރުގައި ވެސް ކަނޑައެޅުނު ފަރާތްތަކަށް ދޭނެ ކަމަށް އުންމީދު ކުރައްވާ ކަމަށެވެ.

މި ދެ މަޝްރޫއުއަކީ ހުޅުމާލޭ ދެވަނަ ފިޔަވަހިން ފްލެޓް ލިބިގެންދާނެ ފަރާތްތައް ކަމަށާއި މި ފްލެޓްތަކުގެ މަސައްކަތް 2019 ވަނަ އަހަރު ޖުލައި މަހުގެ ތެރޭގައި ނިންމާލެވޭނެ ކަމަށް މިނިސްޓަރ ވިދާޅުވިއެވެ.