ޑިގިއާ ޔުނައިޓެޑުގައި މަޑުކުރާނެ ކަމުގެ ޔަގީންކަމެއް ނެތް

މެންޗެސްޓާ ޔުނައިޓެޑުގެ ގޯލް ކީޕަރު ޑޭވިޑް ޑިގިއާ ކްލަބުއާއިއެކު އައު އެއްބަސްވުމެއްގައި ސޮއި ކުރާނެކަމުގެ ޔަގީންކަމެއް ނެތް ކަމަށް ކޯޗް މޮރީނިއޯ ބުނެފިއެވެ.

ޑިގިއާ ކްލަބުގައި މަޑުކުރާނެކަމުގެ ޔަގީންކަން އެބަ އޮތްތޯ ނޫސްވެރިޔަކު ކުރި ސުވާލަށް ޖަވާބު ދެމުން މޮރީނިއޯ ބުނެފައިވަނީ އެއްވެސް ޔަގީންކަމެއް ނެތްކަމަށާއި އެ ސުވާލަށް އެންމެ ރަނގަޅު ޖަވާބެއް ދެވޭނީ ޑިގިއާށާއި ކްލަބުގެ މެނޭޖްމެންޓަށް ކަމަށެވެ.

ހަތަރު ފަހަރު ޔުނައިޓެޑުގެ މޮޅު ކުޅުންތެރިޔާކަން ހޯދާފައިވާ ޑިގިއާއާއި ބެހޭ ގޮތުން ވާހަކަ ދައްކަމުން ޔުނައިޓެޑް މިހާރު އޮތް ފެންވަރަށް ވުރެ މައްޗައް ދިއުމަށް ޑިގިއާގެ ކޮންޓްރެކްޓް އައު ކުރުން ވަރަށް މުހިންމުކަމަށްވެސް މޮރީނިއޯ ފާހަގަކޮށްފައިވެއެވެ.

2011 ވަނަ އަހަރު ސްޕެއިންގެ އެޓްލެޓިކޯ މެޑްރިޑުން 18.9 މިލިއަން ޕައުންޑަށް ޔުނައިޓެޑައި ގުޅުން ޑިގިއާގެ އެއްބަސްވުން މި ސީޒަން ނިމޭއިރަށް ހަމަވާއިރު 2020 ވަނަ އަހަރަށް އެއްބަސްވުމުގެ މުއްދަތު އިތުރުކުރުމުގެ އިހްތިޔާރު ކްލަބަށް އެބޯތެވެ.

މާޝިއަލް، މަޓާ، އަދި ވެލެންސިއާއާއި އެކު ޔުނައިޓެޑުން ހަދާފައިވާ އެއްބަސްވުންތައްވެސް މި ސީޒަން ނިމޭ އިރަށް ހަމަވާނެއެވެ.

ޔޫރަޕުގެ ފުޓްބޯޅައިގެ ކަންކަން ދިރާސާކުރާ ފަރާތްތަކުން ގަބޫލުކުރާ ގޮތުގައި މޮރީނިއޯ ޔުނައިޓެޑުގެ ކޯޗުކަމުގައި ދެމިހުރެއްޖެ ނަމަ އޭނާ ބޭނުންވާނީ މިހާރުގެ ސްކްޑުގައި ތިބި ގިނަ ކުޅުންތެރިންތަކެއް ދޫކޮށްލާ އައު ކުޅުންތެރިންތަކެއް ގަތުމަށެވެ.