އަޒަރުބައިޖާން މަތިންދާބޯޓު ވެއްޓުނު މައްސަލައިގައި ޕުޓިން މައާފަށް އެދެފި

ރަޝިއާގެ ވައިގެ ތެރެއަށް ވަނުމަށްފަހު އާޒަރުބައިޖާން އެއާލައިންސް ގެ މަތިންދާބޯޓެއް ވެއްޓުނު މައްސަލައާއި ގުޅިގެން ރަޝިއާގެ ރައީސް ވްލަދްމީރް ޕުޓިން މައާފަށް އެދެފިއެވެ.

ޕުޓިން މައާފަށް އެދުނު ނަމަވެސް މިކަމާއި ރަޝިއާއިން ޒިންމާވާން ޖެހޭނެކަމަށް ބުނެފައެއް ނުވެއެވެ.

ޕުޓިން ބުނީ، އެބޯޓު ރަޝިއާގެ ގްރޮޒްނީގައި ޖެއްސުމަށް މަސައްކަތްކުރިއިރު، އެގައުމުގެ އަސްކަރިއްޔާ ވައިގެ މަގުން ހަރަކާތްތެރިވެފައިވާކަމަށާއި، އޭގެ ސަބަބުން ބޯޓު އޭގެ މަންޒިލުގައި ނުޖެއްސި ކަޒަކިސްތާނު ކައިރިއަށް ވެއްޓި ބޯޓުން ދަތުރުކުރި 38 މީހުން މަރުވެފައިވާކަމަށެވެ.

ޕުޓިން އަޒަރުބައިޖާނުގެ ރައީސް އިލްހާމް އަލިޔެވް އަށް ގުޅުއްވައި، މައާފަށް އެދިފައިވާއިރު، ޕުޓިން ބުނީ، ބޯޓު ގްރޮޒޮނީ އެއާޕޯޓަށް ޖެއްސުމަށް މަސައްކަތްކުރި ނަމަވެސް، ގްރޮޒޮނީ، މޮޒްޑޮކް އަދި ވްލަޑިކަވްކާޒް ސަރަހައްދުގައި ޔޫކްރެއިންގެ ސިފައިން ހަރަކާތްތެރިވަމުންދާތީ ރަޝިއާގެ ސިފައިން ރައްދު ހަމަލާ ދީފައިވާކަމަށެވެ.

މިބޯޓުގައި އަޒަރުބައިޖާނާއި، ރަޝިއާއާއި، ކަޒަކިސްތާނާއި ކިރްގިސްތާނަށް ނިސްބަތްވާ މީހުން ތިއްބެވެ.

މި ހާދިސާ ހިނގަން މެދުވެރިވި ސަބަނު އަދިވެސް ހޯދިފައިނުވާއިރު، އެމެރިކާއިން ތުހުމަތުކުރާގޮތުގައި، މި ބޯޓު ވެއްޓުނީ ރަޝިއާގެ ވައިގެ ސިފައިން ހަމަލާދިނުމުގެ ސަބަބުންނެވެ.