ފަތުރުވެރިކަމާއި ވައިގެ ދަތުރުތައް ފުޅާކުރުމަށް އެމްއޭސީއެލްގެ ޓީމެއް ރަޝިއާގައި
ލިޔުންތެރިޔާ
އަބްދުﷲ ހުސައިން
ރަޝިއާ ނުވަތަ ރޫސީވިލާތުން ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދު އިތުރުކޮށް ވައިގެ ދަތުރުފަތުރުގެ ގުޅުންތައް ހަރުދަނާކުރުމަށް ސަރުކާރާއި އަމިއްލަ ކުންފުނިތައް ހިމެނޭ ވަފުދެއް މޮސްކޯ އާއި ސެއިންޓް ޕީޓަރސްބާގަށް ޒިޔާަރަތްކޮށްފިއެވެ.
އޮގަސްޓް 17 އިން 21 އަށް ކުރިއަށްދާ މި ދަތުރުގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) ގެ އިތުރުން ފަތުރުވެރިކަމާއި މަދަނީ ވައިގެ ދަތުރުފަތުރާ ބެހޭ ވުޒާރާ އާއި ވިޒިޓް މޯލްޑިވްސް ކޯޕަރޭޝަނާއި މޯލްޑިވިއަނާއި ރިސޯޓް ލައިފް ޓްރެވަލް އާއި އިން ޓުއާ މޯލްޑިވްސް އަދި ފަތުރުވެރިކަމުގެ ދާއިރާގެ ބައެއް އަމިއްލަ ކުންފުނިތަކުގެ މަންދޫބުން ބައިވެރިވެއެވެ.
ރޫސީވިލާތަކީ ރާއްޖޭގެ ފަތުރުވެރިކަމަށް އެންމެ މުހިންމު އެއް މާކެޓެވެ. މި ދަތުރުގެ ތެރޭގައި އެޤައުމުގެ ސިޓީގެ ސަރުކާރުގެ އިދާރާތަކާއި އެއާލައިންތަކާއި ޓުއާ އޮޕަރޭޓަރުންނާއި ޓްރެވަލް ޓްރޭޑް ބައިވެރިންނާ ބައްދަލުކޮށް ރާއްޖެއަށް ފަތުރުވެރިން ގެނައުން އިތުރުކުރެވޭނެ ގޮތްތަކާ މެދު މަޝްވަރާކުރުމަށް ހަމަޖެހިފައިވާކަމަށް އެމްއޭސީއެލުން ބުންޏެވެ.
ވެލާނާ އިންޓަރނޭޝަނަލް އެއަރޕޯޓަށް މިހާރު ދަތުރުކުރާ އެއާލައިންތަކާ އެކު ދަތުރުތައް އިތުރުކޮށް ކެޕޭސިޓީ ބޮޑުކުރުމާއި އަލަށް ސީދާ ދަތުރުތައް ފެށުމުގެ ފުރުޞަތުތަކާ ގުޅޭ ގޮތުންވެސް ވާހަކަ ދެކެވޭނެ ކަމަށް އެމްއޭސީއެލުން ބުނެފައިވެއެވެ. ހަމައެއާ އެކު ޓުއާ އޮޕަރޭޓަރުންނާއި ޓްރެވަލް ކުންފުނިތަކާ އެކު ބާއްވާ ބައްދަލުވުންތަކުގެ ތެރެއިން ތަރުހީބު ބޮޑުވަމުން އަންނަ ދާއިރާތައް ދެނެގަނެ ޓްރެވަލް ޕެކޭޖުތައް މެދުވެރިކޮށް ވައިގެ ދަތުރުތައް އިތުރަށް ފުޅާކުރެވޭނެ މަގުތައް ހޯދުމަކީވެސް ދަތުރުގެ ލަނޑުދަނޑިއެއް ކަމަށް އެ ކުންފުނިން ފާހަގަކޮށްފައިވެއެވެ.
މިއީ ބައިނަލްއަޤުވާމީ މުހިންމު މާކެޓުތަކާ ގުޅުން ބަދަހިކުރުމަށް ކުރަމުން އަންނަ ސިލްސިލާ ދަތުރުތަކުގެ ތެރެއިން ދަތުރެކެވެ. މީގެ ކުރިން 2026 ވަނަ އަހަރުގެ ޖުލައި މަހު ރާއްޖޭގެ ވަފުދެއް ޗައިނާއަށް ގޮސް ހަމަ މި ބާވަތުގެ މަޝްވަރާތައް ކުރިއަށް ގެންގޮސްފައިވެއެވެ. އެމްއޭސީއެލުން ބުނީ އެ ކުންފުނީގެ އަމާޒަކީ އެއާލައިންތަކާއި ފަތުރުވެރިކަމުގެ ބައިވެރިންނާ ގުޅިގެން ވެލާނާ އިންޓަރނޭޝަނަލް އެއަރޕޯޓުގެ ޚިދުމަތްތައް ފުޅާކޮށް ރޫސީވިލާތް ފަދަ ބޮޑެތި މާކެޓުތަކުން ރާއްޖެއަށް ދަތުރުކުރުން ފަސޭހަކޮށްދިނުމެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
