އިނގިރޭސި ލީގު ކަޕްގައި ލަންޑަނުގެ ގަދަ ބާރުތަށް މޮޅުވެއްޖެ

އިނގިރޭސި ލީގު ކަޕްގައި ލަންޑަނަށް ނިސްބަތްވާ ޓިމްތައް ކަމަށްވާ ޗެލްސީ، އާސެނަލް، އަދި ޓޮޓެންހަމް ކުޅުނު މެޗުތަކުން މޮޅުވެއްޖެއެވެ.

ޖުމްލަ ފަސް ލަނޑު ފެނިގެން ދިޔަ ޗެލްސީ އަދި ޑާބީ ކައުންޓީ ބައްދަލުކުރި މެޗު ޗެލްސީ ކާމިޔާބުކޮށްފައިވަނީ 3-2 ކުންނެވެ.

މި މެޗުގައި ޑާބީ ކައުންޓީވަނީ ބައި ކޮޅަށް ދެ ލަނޑު ވައްދާލާ އަދި ދެ ފަހަރުގެ މަތިން މެޗުގެ ނަތީޖާ އެއްވަރުވެސް ކޮށްފައެވެ. ނަމަވެސް ޗެލްސީ ވަނީ ފެބްރިގާސް 41 ވަނަ މިނެޓުގައި ޖެހި ލަނޑާއެކު މެޗު ކާމިޔާބުކޮށްފައެވެ.

ޗެލްސީގެ ތާރީހުގައިވެސް އެ ޓީމަށް ކުޅެދިން އެންމެ ކާމިޔާބު ކުޅުންތެރިޔާ ކަމަށް ގިނަ ބަޔަކު އިއްތިފާގުވާ ފްރޭންކް ލަމްޕާޑުގެ އިރުޝާދުގެ ދަށުން ކުޅެމުން އަންނަ ޑާބީވަނީ މި މެޗުގައި ވާދަވެރި ކުޅުމެއް ދައްކާފައެވެ.

މެޗަށްފަހު މީޑިއާތަކައި ވާހަކަ ދައްކަމުން ލަމްޕާޑް ބުނެފައިވަނީ ނަތީޖާއާމެދު ހިތްހަމައެއް ނުޖެހޭ ކަމަށާއި އޭނާގެ ޓީމަށް އެންމެ ކުޑަ މިނުން މެޗު އެއްވަރުވުން ހައްގު ކަމަށެވެ.

އާސެނަލް އަދި ބްލެކްޕޫލް ބައްދަލުކުރި މެޗު ލިޗްޓްސްޓެއިނާ އަދި ސްމިތް ޖަހައިދިން ލަނޑުތަކުން އާސެނަލް ކާމިޔާބުކޮށްފައިވަނީ 2-1 ކުންނެވެ.

މެޗަށް ފަހު ދިން އިންޓަވިއުގައި ބްލެކްޕޫލުން އާސެނަލް ބިރުގަންނުވާލި ކަމަށް އެ ޓީމުގެ ކޯޗު ބުނި ކަމުގައިވިއަސް އާދައިގެ ގޮތަކަށް ފެނިގެންދިޔަ ބްލެކްޕޫލްގެ ހަމައެކަނި ލަނޑު އެ ޓީމަށް ޖަހައިދިނީ އޮ ކޯނޯއެވެ. އޮ ކޯނޯ އަދި އާސެނަލްގެ ގުއެންޑޫޒީއަށް ވަނީ މި މެޗުގައި ރަތް ކާޑު ދައްކާ ދަނޑުންވެސް ފޮނުވާލާފައެވެ.

ލީގު ކަޕްގައި އާސެނަލް ދެން ބައްދަލުކުރަން ޖެހޭނީ ވެސްޓް ހަމަ ބަލިކޮށް ކުރިއަށް އޮތް ކުއާޓާ ފައިނަލުން ޖާގަ ހޯދި ޓޮޓެންހަމްއާއެވެ.

ފުރަތަމަ 11 އަށް ބަދަލުތަކެއް ގެނެސްގެން ކުޅުނު ޓޮޓެންހަމް މި މެޗު ކާމިޔާބުކުރީ 3-1 ކުންނެވެ.

ޓޮޓެންހަމްގެ ތިން ލަނޑުގެ ތެރެއިން ފުރަތަމަ ދެލަނޑު ސަން ޖަހައިދިން އިރު އެ ޓީމުގެ ފަހު ލަނޑު ޖަހައިދިނީ ލޮރެންޓޭއެވެ.

ކުރީގެ މެންޗެސްޓަރ ސިޓީގެ ޕެލެގްރިނީގެ ކޯޗުކަމުގެ ދަށުން މި ސީޒަނުގައި ކުޅެމުން އަންނަ ވެސްޓް ހަމްގެ ލަނޑު ޖަހައިދިނީ ޕެރޭޒްއެވެ.