ބީޗު ސޮކާ ވޯލްޑްކަޕް 2024: އިޓަލީ އަދި ޔޫއޭއީ ކުއާޓާ ފައިނަލުން ޖާގަ ހޯދިއިރު، އެމެރިކާ އަދި މިސްރު ގުރޫޕް ސްޓޭޖުން ކަޓައިފި

ދުބާއީގައި މިހާރު ކުރިއަށްދާ ބީޗު ސޮކާ ވޯލްޑްކަޕް 2024 ގެ ގުރޫޕް "އޭ" ގެ އިޓަލީ އަދި ޔޫއޭއީން މުބާރާތްގެ ކުއާޓާ ފައިނަލުން ޖާގަހޯދިއިރު، މިގުރޫޕްގައި ހިމެނޭ މިސްރު އަދި އެމެރިކާ މުބާރަތުގެ ގުރޫޕް ސްޓޭޖުން ކަޓައިފި އެވެ.

ފެބުރުއަރީ 15-25 އަށް ދުބާއީގައި ކުރިއަށް މިމުބާރާތުގައި ޖުމްލަ 16 ޓީމު ވާދަކުރަމުން އަންނައިރު، މުބާރާތް ކުރިއަށް ދަނީ ހަތަރު ގުރޫޕަކަށް ބަހާލައިގެންނެވެ. ކޮންމެ ގުރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމަށް ކުއާޓާގެ ފުރުސަތު ލިބޭ ގޮތަށެވެ.

ބީޗް ސޮކާ ވޯލްޑްކަޕްގައި ކޮންމެ މެޗެއްގައި 10 މިނެޓުގެ ތިން ހާފު އުޅޭއިރު، ގުރޫޕް ސްޓޭޖުގެ މެޗުތަކުގައި ވެސް ދެޓީމު އެއްވަރުވެއްޖެ ނަމަ އިތުރު ވަގުތުގެ އެއްހާފު ކުޅެ، ނަތީޖާއެއް ނުނެރެވިއްޖެ ނަމަ ޕެނަލްޓީ ޖަހައިގެން މޮޅުވާ ޓީމެއް ކަނޑައަޅާނީ އެވެ. އަދި މުބާރާތުގެ ގުރޫޕް ސްޓޭޖު މެޗުތަކުގައި މެޗުގެ ފުރިހަމަ ވަގުތުގެ ތެރޭގައި މޮޅުވެއްޖެ ނަމަ، މޮޅުވާ ޓީމަކަށް ތިން ޕޮއިންޓް ލިބޭއިރު، އިތުރު ވަގުތު ކުޅެގެން މޮޅުވެއްޖެނަމަ ލިބޭނީ ދެ ޕޮއިންޓެވެ. އަދި ޕެނަލްޓީ ޖަހައިގެން މޮޅުވާ ޓީމަކަށް ލިބޭނީ އެއް ޕޮއިންޓެވެ.

އެގޮތުން ގުރޫޕް އޭގެ އެއްވަނަ ޓީމުގެ ގޮތުގައި އިޓަލީ ކުއާޓާ ފައިނަލުން ޖާގައެއް ކަށަވަރުކުރިއިރު، ޔޫއޭއީ ކުއާޓާ ފައިނަލުން ޖާގަ ހޯދީ ގްރޫޕްގެ ދެވަނަ ޓީމުގެ ގޮތުގައެވެ.

ގުރޫޕް ސްޓޭޖުގައި އިޓަލީ ކުޅުނު ފުރަތަަމަ މެޗުގައި 3-1 ގެ ނަތީޖާއަކުން އެމެރިކާ އަތުން މޮޅުވިއިރު، ދެވަނަ މެޗުގައި މިސްރު އަތުން އެޓީމު މޮޅުވީ 6-2 ގެ ނަތީޖާއަކުންނެވެ. އަދި ގުރޫޕްގެ ފަހު މެޗުގައި ޔޫއޭއީ އާއި ދެކޮޅަށް ކުޅުނު މެޗު އެއްވަރުވެ، ޕެނަލްޓީގައި އެޓީމު ބަލިވެފައިވަނީ 1-0 ގެ ނަތީޖާއަކުންނެވެ.

ޔޫއޭއީގެ ފުރަތަަމަ މެޗުގައި މިސްރު އަތުން 2-1 ގެ ނަތީޖާއަކުން އެޓީމު މޮޅުވިއިރު، ދެވަނަ މެޗުގައި އެމެރިކާ އާއި ދެކޮޅަށް ކުޅުނު މެޗު 2-2 ގެ ނަތީޖާއަކުން އެއްވަރުވެ ނަތީޖާ ނެރުމަށްޓަކައި ކުޅެވުނު އިތުރު ވަގުތުގެ ތެރޭގައި އެޓީމު މޮޅުވީ 3-2 ގެ ނަތީޖާއަކުންނެވެ. އަދި ގުރޫޕްގެ ފަހު މެޗުގައި އިޓަލީއާ ދެކޮޅަށް ކުޅުނު މެޗު އެއްވަރުވެ، އިތުރު ވަގުތުގައި ވެސް ދެޓީމުން ކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވުމުން ޕެނަލްޓީ ޖަހައިގެން އެޓީމު މޮޅުވީ 1-0 ގެ ނަތީޖާއަކުންނެވެ.

މިއާއެކު މިދެޓީމަށް ވެސް 6 ޕޮއިންޓް ލިބިފައިވާއިރު، އިޓަލީއަށް ގުރޫޕްގެ އެއްވަނަ ލިބުނީ ލަނޑުގެ ތަފާތުންނެވެ. އަދި މިގުރޫޕްގެ ތިންވަނަ ހޯދީ މިސްރުން ނެވެ. އެޓީމުން ވަނީ ގުރޫޕްގެ ފަހުމެޗުގައި އެމެރިކާ ބަލިކޮށް ތިން ޕޮއިންޓް ހޯދާފައެވެ. އަދި މުބާރާތުގައި ކުޅުނު ތިން މެޗުން ވެސް ބަލިވެ އެމެރިކާ މުބާރާތް ނިންމާލީ ގުރޫޕްގެ ފުލުގައި އޮވެއެވެ.