ލޫސިއާނޯގެ އިރުޝާދުގެ ދަށުން އޮޑި ކުޅުނު ފުރަތަމަ މެޗުން މޮޅެއް

ދިވެހި ޕްރިމިއާލީގްގައި ރޭ ގައްދޫ ސްޕޯޓްސް އާއި އޮޑި ސްޕޯޓްސް ކްލަބް ބައްދަލުކުރިމެޗް ފަސޭހަކަމާއެކު އޮޑި ކާމިޔާބުކޮށްފިއެވެ.

ގަލޮޅު ދަނޑުގައި ކުޅުނު މިމެޗް އޮޑި ކާމިޔާބުކުރީ 4-0 ގެ ނަތީޖާއިންނެވެ. މިމެޗަށް އޮޑި ނިކުތީ، އާ ކޯޗް ލޫސިއާނޯ ތެއިލާގެ އިރުޝާދުގެ ދަށުންނެވެ. މި ސީޒަނުގައި އޮޑިއަށް އިރުޝާދުދެމުން އައިސްފައިވަނީ ޕޯޗްގަލްގެ ރުއީ ގްރެގޯރިއޯގެ ދަށުންނެވެ.

ރޭ ކުޅުނުމެޗްގައި އޮޑިއަށް ގޯލް ހުޅުވާލަދިނީ، މެޗް ފަށައިގެން 10 ވަނަ މިނެޓް ތެރޭގައި ހަޑްސަން އެވެ. ފުރަތަމަ ލަނޑު ޖެހިތާ ކުޑަ ވަގުތުކޮޅެއްގެ ތެރޭގައި އޮޑިން ވަނީ އެޓީމްގެ ދެވަނަ ލަނޑު ޖަހާފައެވެ. މި ލަނޑު ކާމިޔާބުކޮށްދިނީ މުޒްދާންއެވެ. ފުރަތަމަ ހާފް ނިމުމުގެ ކުރިން އޮޑިން ވަނީ ތިންވަނަ ލަނޑު ޖަހައި މެޗްގެ ނަތީޖާ 3-0 ކަށް ބަދަލުކޮށްފައެވެ. މި ލަނޑު ޖަހައިދިނީ، އިބްރާހިމް ވަހީދެވެ. މި ލަނޑު ޖެހުމުގެ ކުރިން ގައްދޫގެ ފޯވާޑު ޖެމޮވިކަށް ރަތްކާޑު ދައްކައި ދަނޑުން ފޮނުވާލުމުން ގައްދޫއަށް ވަނީ އިތުރު ނުތަނަވަސްކަމާ ކުރިމަތިލާން ޖެހިފައެވެ.

މެޗްގެ ފަހު ހާފްގައި ފެނިގެންދިޔަ ލަނޑު އޮޑިއަށް ކާމިޔާބުކޮށްދިނީ ބަދަލުކުޅުންތެރިއެއްގެ ގޮތުގައި ކުޅެން ނިކުތް ޓޮމިސްލާވް އެވެ.

މިމެޗަކީ ރަށުން ބޭރުގައި ގައްދޫ ކުޅުނު ފުރަތަމަ މެޗެވެ. ދިވެހި ޕްރިމިއާލީގްގައި ބިސްބުރާއި ބުރު ސްޕޯޓްސް ބައްދަލުކުރިމެޗް ކާމިޔާބުކުރީ ބިސްބުރެވެ. މިމެޗް އެޓީމުން ކާމިޔާބުކުރޫީ 2-1 ގެ ނަތީޖާއިންނެވެ.