ފިހަޅޮހި އަތުން ބޮލިފުށި މޮޅުވި ނަމަވެސް ގްރޫޕްގެ އެއްވަނަ ލިބުނީ އަނަންތަރާ އަށް

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ސައުތު މާލޭ ޒޯން ގުރޫޕް ސީގައި މިއަދު ހަވީރު ކުޅެވުނު ފުރަތަމަ މެޗުގައި ފިހަޅޮހި އައިލެންޑް ރިސޯޓް އާއި އޮޒެން ރިޒާވް ބޮލިފުށި ވާދަކުރި މެޗު 6-2 ގެ ނަތީޖާއަކުން ބޮލިފުށި ކާމިޔާބުކޮށްފިއެވެ.

މުބާރާތުގެ ފުރަތަަމަ މެޗުގައި އަނަންތަރާ އަތުން 6-1 ގެ ނަތީޖާއަކުން ފިހަޅޮހި ބަލިވެފައި ވާއިރު، ބޮލިފުށި ކުޅުނު ފުރަތަމަ މެޗުގައި އެޓީމުން ވަނީ އަނަންތަރާ އާއި ވާދަކުރި މެޗު 3-3 ގެ ނަތީޖާއަކުން އެއްވަރުކޮށްފައެވެ. އަދި މިމެޗަށް ނުކުތްއިރު ހަ ލަނޑުގެ ތަފާތަކުން މޮޅުވެ ގްރޫޕްގެ އެއްވަނަ ޓީމުގެ ގޮތުގައި ކުއާޓާގެ ފައިނަލުން ޖާގަ ހޯދުމުގެ ފުރުސަތު އެޓީމަށް އޮތެވެ.

މެޗުގެ ފުރަތަަމަ ހާފުގައި ބޮލިފުށިން ދެ ލަނޑުގެ ލީޑެއް ނެގިއިރު، މިދެލަނޑު ވެސް އެޓީމުން ކާމިޔާބުކުރީ ފުރަތަމަ ހާފުގެ އިތުރު ވަގުތުގެ ތެރޭގައި އެވެ. އެގޮތުން އެޓީމުގެ ފުރަތަަމަ ލަނޑު ކާމިޔާބުކޮށްދިނީ ކެޕްޓަން އިބްރާހިމް ނިޔާޒު އެވެ.

މިއީ އެޓީމަށް ލިބުނު ކޯނަރެއްގައި އިބްރާހިމް ސައީދު ހުރަސްކޮށްދިން ބޯޅައެއް ފިހަޅޮހި ޕެނަލްޓީ އޭރިއާ ބޭރުން ކޮންޓްރޯލް ކުރުމަށް ފަހު ތިރިތިރިން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. އަދި އެޓީމުގެ ދެވަނަ ޖެހިގެންއައި މިނެޓުގައި ކާމިޔާބުކޮށްދިނީ ޒިދާން އަބްދުލް ގަނީ އެވެ. މިއީ އެޓީމުގެ މުހައްމަދު އާޒިމް ތަނަވަސްކޮށްދިން ފުރުސަތެއްގައި ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 2-0 ގެ ނަތީޖާއަކުން ބޮލިފުށި ކުރީގައި އޮވެގެންނެވެ.

މެޗުގެ ދެވަަނަ ހާފުގައި ބޮލިފުށިން އިތުރު ހަތަރު ލަނޑު ކާމިޔާބުކުރިއިރު، އެޓީމުގެ ތިންވަނަ ލަނޑު ދެވަނަ ހާފު ފެށިގެން ފުރަތަމަ މިނެޓުގައި ކާމިޔާބުކޮށްދިނީ ކެޕްޓަން އިބްރާހިމް ނިޔާޒު އެވެ. އަދި އޭގެ ދެ މިނެޓު ފަހުން އެޓީމުގެ ހަތަރުވަނަ ލަނޑު އިބްރާހިމް ސައީދު ކާމިޔާބުކުރި އިރު ޖެހިގެން އައި މިނެޓުގައި އެޓީމުގެ ފަސްވަނަ ލަނޑު ކާމިޔާބުކޮށްދިނީ މުހައްމަދު އާޒިމް އެވެ.

މިމެޗުގެ ބޮލިފުށިން ކާމިޔާބުކުރި ހަވަނަ ލަނޑު ދެވަނަ ހާފުގެ 28 ވަނަ މިނެޓުގައި ކާމިޔާބުކޮށްދިނީ މުހައްމަދު އިރުފާން އެވެ. އަދި މިނަތީޖާއާއެކު މެޗު ނިމެން ދަނިކޮށް މެޗުގެ ފަހު ވަގުތުކޮޅުގެ ތެރޭގައި ފިހަޅޮހިން ވަނީ ދެލަނޑު ކާމިޔާބު ނަތީޖާގެ ފަރަގު ކުޑަކޮށްފައެވެ.

މިމެޗުގައި ފިހާޅޮހިން ކާމިޔާބުކުރި ފުރަތަމަ ލަނޑު ދެވަނަ ހާފުގެ 40 ވަނަ މިނެޓުގައި އިބްރާހިމް ސޮލާހް ކާމިޔާބުކުރިއިރު މެޗުގެ އިތުރު ވަގުތުގެ ތެރޭގައި އެޓީމުގެ ދެވަަނަ ލަނޑު ކާމިޔާބުކޮށްދިނީ އަހުމަދު ނިހާލް އެވެ. އަދި މިލަނޑާއެކު މެޗުގެ ކުޅުން ނިމިގެންދިޔައީ 6-2 ގެ ނަތީޖާއަކުން ބޮލިފުށި ކުރީގައި އޮވެގެންނެވެ. އަދި މިމެޗުގެ މޭން އޮފް ދަ މެޗަކަށް ހޮވުނީ ބޮލިފުށީގެ ކެޕްޓަން އިބްރާހިމް ނިޔާޒު އެވެ.

މިމެޗުގެ ނަތީޖާއާއެކު ބޮލިފުށި އަދި އަނަންތަރާ އަށް ވެސް ދެމެޗުން ހަތަރު ޕޮއިންޓް ލިބިފައިވާއިރު، ލަނޑުގެ ތަފާތުން ކުރި ލިބެނީ އަނަންތަރާ އަށެވެ. އަދި އެޓީމަށް ވަނީ ގުރޫޕްގެ އެއްވަނަ ޓީމުގެ ގޮތުގައި ކުއާޓާގެ ފުރުސަތު ލިބިފައެވެ. މިއާއެކު މިގުރޫޕުން ކުއާޓާ ފައިނަލުގެ ދެވަނަ ޖާގަ ލިބޭނީ ޕްލޭއޮފްގައި ފިހަޅޮހި އާއި ބޮލިފުށި ވާދަކުރާ މެޗުން މޮޅުވާ ޓީމަކަށެވެ.