ޢިރާޤުގެ ކުރީގެ މަޖިލިސް މެންބަރު އަޙްމަދު އަލްޢަލްވާނީ މަރުވެފައި އޮއްވާ ފެނިއްޖެ

ޢިރާޤުގެ ޤާނޫނުހަދާ މަޖިލީހުގެ ކުރީގެ މެންބަރެއް ކަމަށްވާ އަޙްމަދު އަލްޢަލްވާނީ، ލުބުނާނުގެ ވެރިރަށް ބެއިރޫތުގެ އެޕާޓްމަންޓެއްގެ ތެރޭގައި މަރުވެފައި އޮއްވާ ފެނިއްޖެއެވެ. ލުބުނާނުގެ ސަލާމަތީ އިދާރާތަކުން މިހާރު ދަނީ މި މައްސަލަ ބަލައި ތަޙުޤީޤު ކުރަމުންނެވެ.

އަލްޖަޒީރާއިން ބުނީ އެ ނޫހަށް މަޢުލޫމާތު ދިން ސަލާމަތީ އޮފިޝަލަކު ވިދާޅުވި ގޮތުގައި، މި މައްސަލައިގެ ތަޙުޤީޤު ލުބުނާނުގެ އިންޓަރނަލް ސެކިއުރިޓީ ފޯސަސްގެ އިންފޮމޭޝަން ބްރާންޗުން ވަރަށް ގާތުން އަންނަނީ ބަލަމުންނެވެ. އަދި އޭއެފްޕީ ނިއުސް އެޖެންސީއަށް މަޢުލޫމާތު ދިން ލުބުނާނުގެ ޝަރުޢީ ދާއިރާގެ މަޞްދަރަކުން ހާމަކުރި ގޮތުގައި، އިބްތިދާއީ ތަޙުޤީޤުތަކުން ދައްކަނީ އަލްޢަލްވާނީ މަރާލާފައިވަނީ ކަރުގައި އެއްޗެއް އަޅުވައި ނޭވާ ހާސްކޮށްލައިގެންނެވެ.

މި މައްސަލައާ ގުޅިގެން ޝައްކުކުރެވޭ ލުބުނާނުގެ ރައްޔިތަކު މިހާރު ވަނީ ހައްޔަރުކޮށްފައެވެ. އަދި މި ޢަމަލުގައި ބައިވެރިވި ކަމަށް ތުހުމަތުކުރެވޭ ސޫރިޔާގެ ދެ މީހަކު ހޯދުމުގެ މަސައްކަތް ފުލުހުން ދަނީ ކުރަމުންނެވެ. މި މީހުންނަކީ ވޭތުވެދިޔަ ހަފްތާގައި އަލްޢަލްވާނީ ބެއިރޫތަށް ވަޑައިގަތުމުން އެއާޕޯޓުން ހޮޓަލަށް އޭނާ ގެންދިޔަ މީހުން ކަމަށް މަޢުލޫމާތު ލިބެއެވެ.

އަލްޢަލްވާނީގެ އޮފީހުން 'އެކްސް' ގައި ނެރުނު ބަޔާނެއްގައި މި ހާދިސާ ސިފަކޮށްފައިވަނީ ނުރައްކާތެރި، އަނިޔާވެރި އަމަލެއްގެ ގޮތުގައެވެ. އަދި މިއީ ހަމައެކަނި ތަޢުޒިޔާ ކިޔައި، ކުށްވެރިކުރުމަކުން ނިންމާލެވޭނެ ކަމެއް ނޫން ކަމަށާއި، މި ޖަރީމާ ރޭވި ފަރާތްތަކާއި އެކަމުގައި ބައިވެރިވި އެންމެން ހޯދައި ހަރުކަށި ފިޔަވަޅު އެޅުމަށް ވަނީ ގޮވާލާފައެވެ.

އަޙްމަދު އަލްޢަލްވާނީ މަޤްބޫލުކަން ހޯއްދެވީ 2012 އަދި 2013 ވަނަ އަހަރު، ޢިރާޤުގެ އޭރުގެ ބޮޑުވަޒީރު ނޫރީ އަލްމާލިކީގެ ސަރުކާރާ ދެކޮޅަށް ސުންނީ މުސްލިމުން ކުރިއަށްގެންދިޔަ މުޒާހަރާތަކުގެ ތެރެއިންނެވެ. އޭނާއަކީ ޢިރާޤުގެ ތެރޭގައި އޮތް އީރާނުގެ ނުފޫޒަށާއި، އެ ޤައުމުގައި ހަރަކާތްތެރިވާ އީރާނަށް ތާއީދުކުރާ ހަތިޔާރުއެޅި ޖަމާޢަތްތަކަށް ވަރަށް ބޮޑަށް ފާޑުވިދާޅުވަމުން ގެންދެވި ލީޑަރެކެވެ.

ޑިސެމްބަރު 2013 ގައި ރަމާދީގައި ހުންނަ އޭނާގެ ގެއަށް ސަލާމަތީ ބާރުތަކުން ދިން ހަމަލާއެއްގެ ތެރޭގައި އޭނާ ހައްޔަރުކުރެވުނުއިރު، އެ ހާދިސާގައި އޭނާގެ ކޮއްކޮގެ އިތުރުން އެތައް ބަޔަކު މަރުވިއެވެ. އޭގެ ފަހުން 2014 ވަނަ އަހަރު "ޓެރަރިޒަމް" ގެ ދަޢުވާގައި އޭނާގެ މައްޗަށް މަރުގެ ޙުކުމް އިއްވުނު ނަމަވެސް، 10 އަހަރަށްވުރެ ގިނަ ދުވަހު ޖަލުގައި ހޭދަކުރެއްވުމަށްފަހު އޭނާ މިނިވަންވީ ޢިރާޤުގެ ޢާންމު މަޢާފުގެ ޤާނޫނުގެ ދަށުން 2025 ވަނަ އަހަރުގެ އެޕްރީލް މަހުގައެވެ.

ލުބުނާނުގައި ހުންނަވާ ޢިރާޤުގެ ސަފީރު މުޙައްމަދު ރިޟާ އަލްޙުސައިނީ ވިދާޅުވީ، އެމްބަސީން މި މައްސަލަ ވަރަށް ގާތުން ބަލަމުން އަންނަ ކަމަށާއި، މި ޖަރީމާ ހިނގައިދިޔަ ގޮތުގެ ފުރިހަމަ ތަފްޞީލު ހާމަކުރުމަށް ލުބުނާނުގެ ސަލާމަތީ އިދާރާތަކުގެ ފަހުގެ ރިޕޯޓަށް އިންތިޒާރު ކުރަމުންދާ ކަމަށެވެ.