އާމްދަނީ ހޯދަން ގޭގައި އުފައްދައި ބަންދު ކުރާ ކާބޯތަކެއްޗަށް ހާއްސަ ލޯގޯ އިފުތިތާހު ކޮށް ދެއްވައިފި
އާމްދަނީ ހޯދަން ގޭގައި އުފައްދައި ބަންދު ކުރާ ކާބޯތަކެއްޗަށް ހާއްސަ ލޯގޯ، ރައީސުލްޖުމްހޫރިއްޔާގެ އަނބިކަބަލުން ސާޖިދާ މުހައްމަދު އިފުތިތާހު ކޮށް ދެއްވައިފިއެވެ.
މިކަމަށް ޓަކައި މިއަދު ހެނދުނު އިސްލާމީ މަރުކަޒުގެ ޖަލްސާކުރާ މާލަމުގައި ކުރިއަށްދިޔަ ހަފުލާގައި ވާހަކަފުޅު ދައްކަވަމުން މެޑަމް ސާޖިދާ ވިދާޅުވީ އިފްތިތާހްކުރެވިގެން ދިޔަ މި ލޯގޯ އާއި އެކު ގޭގައި ތިބެގެން މަސައްކަތްކުރައްވާ ފަރާތްތަކަށް އެފަރާތްތަކުގެ ވިޔަފާރި ފުޅާކުރުމަށް ފުރުޞަތު ފަހިވެގެންދާނެކަމަށެވެ. ޚާއްޞަކޮށް މި މަސައްކަތުގައި އުޅުއްވާ ކަނބަލުންގެ ވިޔަފާރިތަކަށް މިކަމުގެ ސަބަބުން ފައިދާ ލިބިގެންދާނެ ކަން އެކަމަނާ ފާހަގަކުރެއްވިއެވެ.
މެޑަމް ސާޖިދާގެ ވާހަކަފުޅުގައި ވަނީ ލޯގޯގެ މަޤުޞަދުތަކުގެ މައްޗަށް އަލިއަޅުވައިލައްވާފައެވެ. މިގޮތުން އެކަމަނާ ވިދާޅުވީ ބޯތަކެތީގެ ރައްކާތެރިކަން ކަށަވަރުކުރުމަށްޓަކައި އެމްއެފްޑީއޭ އިން ކަނޑައަޅާފައިވާ މިންގަނޑުތަކާ އެއްގޮތަށް އަމަލުކުރާ ފަރާތްތަކަށް ލޯގޯއެއް ނުވަތަ ނިޝާނެއް ދިނުމަކީ އެތަކެތީގެ ރައްކާތެރިކަމާމެދު އާންމުންގެ އިތުބާރު ބޮޑުވާނެ ކަމެއްކަމަށެވެ.
ބީސީސީ ގެ އިސްނެގުމާއި އެކު އެމްއެފްޑީއޭ އާއި ގުޅިގެން ނެރުނު ލޯގޯ އަށް އަލިއަޅުއްވާލައްވާ މެޑަމް ސާޖިދާ ވިދާޅުވީ ކަމާބެހޭ ފަރާތްތަކުން ކުރާ މަސައްކަތްތަކުން ޤައުމުގެ ކުރިއެރުން އިތުރު ހަރުފަތްތަކަކަށް ދިއުމަށް މަގުފަހިވެގެންދާނެ ކަމުގައެވެ.
މެޑަމް ސާޖިދާގެ މި ވާހަކަފުޅުގައި އެކަމަނާ ވަނީ 2021 ވަނަ އަހަރުން ފެށިގެން ރައްޔިތުންގެ މަޖިލީހަށް ހުށަހަޅާފައިވާ ކާބޯތަކެތީގެ ރައްކާތެރިކަމުގެ ބިލަކީ ރައްޔިތުންގެ ފައިދާއަށާއި ޤައުމުގެ ކުރިއެރުމަށް މަގުފަހިކުރެވިގެން ދާނެ ކަމެއްކަން ފާހަގަކުރައްވާ، އެ ގާނޫނު ތަންފީޒުވެގެން ދިޔުމަށް އެދިވަޑައިގެންފައެވެ.
އާމްދަނީ ހޯދުމަށްޓަކައި ގޭގައި އުފައްދައި ބަންދުކުރާ ކާބޯތަކެއްޗަށް ޚާއްޞަ ލޯގޯ ހޯދުމަށް ދިރިތި ޕޯޓަލް މެދުވެރިކޮށް ހުށައެޅޭނެ އިންތިޒާމް ވަނީ ހަމަޖައްސާފައެވެ. އަދި "އާމްދަނީ ހޯދުމުގެ ބޭނުމުގައި ގޭގައި ކާބޯތަކެތި އުފައްދާ ފަރާތްތައް ދަފުތަރުވުމުގެ އުސޫލު" ބީ.ސީ.ސީ. އިން އެކުލަވައިލައި މިހާރު ވަނީ ގެޒެޓުކޮށްފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
