ހުޅުމާލެ ރަށު މާރުކޭޓުގެ ނުވަ ގޮޅިއަކަށް ކުރިމަތިލުމަށް އެޗްޑީސީން ހުޅުވާލައިފި

ހުޅުމާލޭގައި ހުންނަ ރަށު މާރުކޭޓުން ނުވަ ގޮޅިއެއް ކުއްޔަށް ދިނުމަށް ޝައުޤުވެރިވާ ފަރާތްތަކަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ފުރުޞަތު ހުޅުވާލައިފިއެވެ.

އެ ކޯޕަރޭޝަނުން އާންމުކުރި އިޢުލާނުގައިވާ ގޮތުން، ގޮޅިތައް ލިބޭ ފަރާތްތައް ކަނޑައަޅާނީ އޮންލައިންކޮށް ފޯމު ހުށަހަޅާ ފަރާތްތަކުގެ ތެރެއިން ޝަރުޠު ފުރިހަމަވާ ފަރާތްތަކުގެ މެދުގައި ގުރުއަތު ނެގުމަކުންނެވެ.

މުޅި ޕްރޮސެސް ކުރިއަށް ގެންދިޔުމަށް ހަމަޖެހިފައި އޮތީ އޮންލައިންކޮށް ކަމަށް ވާއިރު، އެޕްލިކޭޝަން ހުށަހެޅުމުގެ މުއްދަތަކީ އޮކްޓޫބަރު 13 ވާ އަންގާރަ ދުވަހުގެ ހެނދުނު 08:30 އިން އޮކްޓޫބަރު 27 ވާ އަންގާރަ ދުވަހުގެ މެންދުރުފަހު 15:30 ގެ ނިޔަލަށެވެ. ފޯމު ހުށަހަޅަން ޖެހެނީ އެޗްޑީސީގެ ވެބްސައިޓް (https://www.hdc.mv/sales/application-forms) މެދުވެރިކޮށެވެ.

ޝަރުޠު ހަމަވާ ފަރާތްތަކުގެ މެދުގައި ބާއްވާ ގުރުއަތުލުން ތާވަލުކޮށްފައި އޮތީ ނޮވެމްބަރު 18 ވާ ބުދަ ދުވަހުގެ މެންދުރު 13:00 އަށެވެ.

ގުރުއަތުލުން އޮންނާނީ އެޗްޑީސީ އޮފީސް އިމާރާތުގެ ހުޅަނގު ފަރާތުގައި، އެ އިމާރާތާއި ފްލެޓް 12 އާ ދެމެދު ޖަހައިފައިވާ ޓެންޓެއްގައެވެ.

ކަމާ ގުޅޭ އިތުރު މަޢުލޫމާތު ކަރުދާސް އެޗްޑީސީގެ ރަސްމީ ވެބްސައިޓް (https://www.hdc.mv) އިންނާއި ޕްރޮޕަޓީސް ޕޯޓަލް (https://properties.hdc.mv) އިން ލިބެން ހުންނާނެއެވެ.

އަދި އިތުރު މަޢުލޫމާތު ސާފުކުރެއްވުމަށް އެ ކޯޕަރޭޝަނުގެ ހޮޓްލައިން 1516 އަށް ގުޅުއްވުމަށް އެޗްޑީސީން ވަނީ އެދިފައެވެ.