މުޅިން އަލަށް ވާދަކޮށް، އެއިޓީން ތާޓީ ކްލަސިކްގެ ތަށި އެޗްޑީސީން އުފުލާލައިފި

"އެއިޓީން ތާޓީ ކްލަސިކް" ފުޓްސަލް މުބާރާތުގެ ފޯރިގަދަ ފައިނަލް މެޗުގައި ސްޓެލްކޯ ރެކްރިއޭޝަން ކްލަބް ބަލިކޮށް، ކްލަބް އެޗްޑީސީން މުބާރާތުގެ ޗެމްޕިއަންކަން ހޯދައިފިއެވެ.

މިއީ މި މުބާރާތުގައި އެޗްޑީސީން ވާދަކުރި ފުރަތަމަ ފަހަރު ކަމަށްވާއިރު، އެ ޓީމުން ތަށި އުފުލާލީ ފައިނަލްގައި ސްޓެލްކޯގެ މައްޗަށް 4-2 ގެ ނަތީޖާއަކުން ކުރިހޯދައިގެންނެވެ.

ހުޅުމާލެ، ރެހެންދި ޓާފް ފުޓްސަލް ދަނޑުގައި ރޭ ކުޅުނު މެޗު ފެށިގެން ހަތަރުވަނަ މިނެޓުގައި ފިރުޝާނާ ނަސީރު ޖަހައިދިން ލަނޑާއެކު އެޗްޑީސީން ފުރަތަމަ ލީޑު ނެގިއެވެ. ނަމަވެސް، އޭގެ މިނެޓެއް ފަހުން ސްޓެލްކޯގެ ޝަހުލާ ތައުފީގު ވަނީ ގޯލެއް ޖަހައި މެޗުގެ ނަތީޖާ އެއްވަރުކޮށްފައެވެ.

ދެވަނަ ހާފު ފެށިގެން މާގިނަ އިރުތަކެއް ނުވަނީސް، 17 ވަނަ މިނެޓުގައި ފާތިމަތު ސާލިޔާ ވަނީ އެޗްޑީސީއަށް ދެވަނަ ފަހަރަށް ކުރިހޯދައިދީފައެވެ. އަދި މެޗުގެ 27 ވަނަ މިނެޓުގައި ސާލިޔާ ވަނީ އޭރިޔާ ބޭރުން ފޮނުވާލި ހިތްގައިމު ހަމަލާއަކުން އެ ޓީމުގެ ތިންވަނަ ލަނޑު ކާމިޔާބުކޮށްދީފައެވެ.

ސްޓެލްކޯއިން އުންމީދު އާކުރީ 29 ވަނަ މިނެޓުގައި ޝަހުލާ ޖަހައިދިން ހިލޭ ޖެހުމުގެ ގޯލުންނެވެ. މި ގޯލާއެކު ނަތީޖާ 3-2 އަށް ބަދަލުވެ، ސްޓެލްކޯއިން އެޗްޑީސީގެ ގޯލަށް ބާރުބޮޑުކުރި ނަމަވެސް، މެޗު ނިމެން މިނެޓަކަށް ވެފައި ވަނިކޮށް ފިރުޝާނާ ވަނީ އެޗްޑީސީގެ ހަތަރުވަނަ ލަނޑު ޖަހައި ތަށި ކަށަވަރުކޮށްދީފައެވެ. މި މެޗުގެ މޮޅު ކުޅުންތެރިޔާގެ މަގާމު ހޯދީ ވެސް ފިރުޝާނާ ނަސީރެވެ.

އެޗްޑީސީން މި މުބާރާތުގެ ތަށި އުފުލާލީ ކުޅުނު ފަސް މެޗުން ވެސް މޮޅުވެ، މުޅި މުބާރާތުގައި ޖުމްލަ 28 ގޯލު ޖަހައިގެންނެވެ.