ރިސޯޓް ލީގު 2023: ދާލު ޒޯނުގެ މެޗުތައް މިއަދު ފެށިއިރު، ޗެންޕިއަން ކަނޑިންމަ އަށް އުދަގޫ މޮޅެއް!

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ދާލު ޒޯނުގެ ކުޅުން މިއަދު ފެށިއިރު، މުބާރާތުގެ ފުރަތަމަ މެޗުގައި ގްރޫޕް އޭގެ ކަނޑިންމަ އާއި ވޮމްމުލި ވާދަކުރި މެޗު 1-0 ގެ ނަތީޖާއަކުން ކަނޑިންމަ ކާމިޔާބުކޮށްފި އެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިއަދުގެ މެޗުގައި ލަނޑުޖަހާނެ ރަގަޅު ފުރުސަތުތަކެއް ދެޓީމުން ވެސް ތަނަވަސްކުރި ނަމަވެސް މި މެޗުގައި ފުރަތަަމަ ލަނޑުޖަހައި ކުރިހޯދީ ކަނޑިންމަ އިންނެވެ. މި ލަނޑު ފުރަތަމަ ހާފުގެ 13 ވަނަ މިނެޓުގައި ކާމިޔާބުކޮށްދިނީ އަކްރަމް އަހުމަދެވެ.

މިއީ އެޓީމުގެ ކެޕްޓަން މުހައްމަދު އަޔާޒު މުޅިން ހުސްކޮށްލާފައި ޖައްސާލި ބޯޅައެއް ވޮމްމުލި ޕެނަލްޓީ އޭރިއާ ތެެރެއިން ކޮންޓްރޯލް ކުރުމަށްފަހު ވަރަށް ހަމަޖެހިލާފައި ތިރިތިރިން ގޯލުގެ ތެރެއަށް ފޮނުވާލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި 1-0 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި ވެސް ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔަ ނަމަވެސް ދެޓީމަށްވެސް ލަނޑު ޖަހަން ލިބުނު ފުރުސަތުތަކުގެ ބޭނުން ނުކުރެވި މެޗުގެ ކުޅުން ނިމިގެންދިޔައީ 1-0 ގެ ނަތީޖާއަކުން އެންމެ ފަހުގެ ޗެމްޕިއަން ކަނޑިންމަ ކުރީގައި އޮވެގެންނެވެ. މި މެޗުގެ މޭން އޮފް ދަ މެޗަކަށް ހޮވުނީ ކަނޑިންމަ ޓީމުގެ ކެޕްޓަން މުހައްމަދު އަޔާޒުއެވެ.

މިއަހަރުގެ ރިސޯޓް ލީގު ފުޓްސަލް މުބާރާތުގެ ދާލު ޒޯނުގައި 07 ޓީމެއް ބައިވެރިވެފައި ވާއިރު މުބާރާތް ކުރިއަށް ގެންދިއުމަށް ހަމަޖެހިފައިވަނީ ބައިވެރިވި ޓީމުތައް ދެގުރޫޕަކަށް ބަހާލައިގެންނެވެ. ގްރޫޕް އޭގައި 04 ޓީމު ހިމެނޭއިރު ގްރޫޕް ބީގައި ހިމެނެނީ 03 ޓީމެވެ.  ގުރޫޕް އޭގެ އެއްވަނަ އަދި ދެވަނަ ޓީމަށް މުބާރާތުގެ ސެމީ ފައިނަލުން ޖާގަލިބޭއިރު، ގްރޫޕް ބީ އިން ސެމީގެ އޮޓެމެޓިކް ޖާގައެއް ލިބޭނީ އެއްވަނަ ޓީމަށެވެ. އަދި ސެމީގެ ފަހު ޖާގަ ލިބޭނީ ގްރޫޕް ބީގެ ދެވަނަ ޓީމާއި ތިންވަނަ ޓީމުގެ މެދުގައި ޕްލޭއޮފް މެޗެއް ކުޅުމަށްފަހު އެ މެޗުން މޮޅުވާ ޓީމަކަށެވެ.

މި ޒޯނުގެ ހުރިހާ މެޗެއްވެސް ކަނޑިންމައިގައޖ ކުޅޭއިރު އެރަށަކީ މި ޒޯނުގެ އެންމެ ކާމިޔާބު ޓީމެވެ. އެޓީމު ވަނީ މި ޒޯނުގެ ޗެމްޕިއަންކަން ތިން ފަހަރު ހޯދާފައެވެ.