ރިސޯޓް ލީގު 2023 ގެ އޮފިޝަލް ޑިޖިޓަލް ޕާޓްނަރަކަށް އުރިދޫ މޯލްޑިވްސް!

ރާއްޖޭގައި ބާއްވާ އެންމެ ބޮޑު ރިސޯޓް ލީގު ފުޓްސަލް މުބާރާތުގެ އޮފިޝަލް ޑިޖިޓަލް ޕާޓްނަރަކަށް އުރިދޫ މޯލްޑިވްސް ހަމަޖައްސައިފިއެވެ.

މުބާރާތުގެ އޮފިޝަލް ޑިޖިޓަލް ޕާޓްނަރާއެކު ބޭއްވި ސޮއި ކުރުމުގެ ރަސްމިއްޔާތުގައި ބިގް ގޭމް މޯލްޑިވްސްގެ ފަރާތުން ސޮއިކުރެއްވީ ރިސޯޓް ލީގު 2023 ގެ ޕަބްލިކް ރިލޭޝަން އިސްމާއިލް މުފީދު (ބިއްލެ) އެވެ. މި ރަސްމިއްޔާތުގައި އުރީދޫ މޯލްޑިވްސްގެ ފަރާތުން ބައިވެރިވެލެއްވީ ބްރޭންޑް މެނޭޖަރު މަރިޔަމް ފަލަކް އެވެ.

ވޮއިސް އަށް މައުލޫމާތު ދެއްވަމުން އުރިދޫ މޯލްޑިވްސްގެ ފަރާތުން ބްރޭންޑް މެނޭޖަރު މަރިޔަމް ފަލަކް ވިދާޅުވީ ރިސޯޓް ލީގު ފުޓްސަލް މުބާރާތުގެ ޑިޖިޓަލް ޕާޓްނަރަކަށް އުރިދޫ މޯލްޑިވްސް އިން ޖޮއިންކުރި މައިގަނޑު ސަބަބަކީ މިއީ ރާއްޖޭގެ ރިސޯޓް ދާއިރާގައި މަސައްކަތްކުރައްވާ ފަރާތްތަކަށް އަމާޒުކޮށްގެން ބާއްވާ އެންމެ ބޮޑު ފުޓްސަލް މުބާރާތަށްވުމުގެ އިތުރުން ފުޓްސަލް އަކީ މިހާރު ރާއްޖޭގައި އެންމެ މަގުބޫލް އެއް ކުޅިވަރަށްވާތީ، މި މުބާރާތުގެ ތެރެއިން މިދާއިރާގައި މަސައްކަތްކުރާ ފަރާތަކާއި ގުޅުން ބަދަހި ކުރުމެވެ.

ރިސޯޓް ލީގު ފުޓްސަލް މުބާރާތަކީ 2013 ވަނަ އަހަރު ބާއްވަން ފެއްޓުނު މުބާރާތެކެވެ. މިދިޔަ އަހަރުގެ މުބާރާތުގައި 52 ޓީމު ބައިވެރިވި އިރު، ޖުމްލަ 101 މެޗު ވަނީ ކުޅެވިފަ އެވެ. އަދި މުބާރާތުގެ ހުރިހާ މެޗެއް ވަނީ ސޯޝަލް މީޑިއާގައި ލައިވް ސްޓްރީމް ކުރެވިފައެވެ. އަދި މި މުބާރާތުގައި ރާއްޖެ ބޮޑިތި ހުރިހާ ރިސޯޓަކުން ބައިވެރިވެފައިވެއެވެ.

މިއަހަރުގެ މުބާރާތުގެ ނޯތު މާލޭ ޒޯނުގެ ކުޅުން، ވަން އެންޑް އޮންލީ ރީތިރަށުގައި މިއަދު ފެށިގެން ކުރިއަށް ދާއިރު، މި މުބާރާތް ހަތަރު މަސް ދުވަހަށް ދިގުދެމިގެންދާއެވެ. އަދި 8 ޒޯނަކަށް ބަހާލައިގެން ކޮންމެ ޒޯނެއްގައި ވެސް މުބާރާތް ކުރިއަށް ގެންދިއުމަށް ހަމަޖެހިފައިވަނީ އެއް ރިސޯޓެއްގައެވެ.

މި އަހަރުގެ މުބާރާތުގައި ވެސް 100 އަށްވުރެ ގިނަ މެޗު ކުޅުމަށް ހަމަޖެހިފައިވާއިރު، މުބާރާތުގެ ހުރިހާ މެޗެއް ލައިވް ސްޓްރީމް ކުރުމަށް ވަނީ ހަމަޖެހިފައެވެ. މީގެއިތުރުންވެސް މުބާރާތުގެ މެޗުތަކުގެ މެން އޮފް ދަ މެޗަށް ހޮވޭ ފަރާތަކަށް އެވޯޑްގެ އިތުރުން ފައިސާގެ އިނާމު ދިނުމަށް ވެސް ވަނީ ހަމަޖެހިފައެވެ.