އިންޑިއާ ރުޕީސްގެ އަގު ރިކޯޑް އަދަދަކަށް އަނެއްކާވެސް ވެއްޓިއްޖެ

އެމެރިކާ ޑޮލަރާ އަޅާބަލާއިރު އިންޑިއާ ރުޕީސްގެ އަގު މިއަދު ވަނީ ތާރީޚީ ގޮތުން ދުވަހަކުވެސް ނުވެއްޓޭހާ ދަށަށް އަނެއްކާވެސް ގޮސްފައެވެ.

ބައިނަލްއަގުވާމީ ބާޒާރުގައި ޑޮލަރެއްގެ އަގު 95.31 ރުޕީސްއަށް މިއަދު ވަނީ އަރާފައެވެ. މިއީ މިހާތަނަށް އިންޑިއާގެ ފައިސާގެ އަގު މިހާ ބޮޑަށް ދަށަށް ދިޔަ ފުރަތަމަ ފަހަރެވެ.

މާހިރުން ފާހަގަކުރާ ގޮތުގައި ރުޕީސްގެ އަގު ދަށަށް ދިއުމުގެ މައިގަނޑު ސަބަބަކީ ދުނިޔޭގެ ބާޒާރުގައި ތެލުގެ އަގު އުފުލުމާއި، އެމެރިކާގެ އިގްތިސާދު ވަރުގަދަވުމުގެ ސަބަބުން ޑޮލަރުގެ އަގު މައްޗަށް ދިއުމެވެ. މިގޮތުން ބްރެންޓް ކްރޫޑް ތެލުގެ ފީފާއެއްގެ އަގު މިހާރު ހުރީ 123 އެމެރިކާ ޑޮލަރަށެވެ.

ރުޕީސްގެ އަގު ދަށަށް ދިއުމާ ގުޅިގެން އިންޑިއާއަށް އިމްޕޯޓްކުރާ މުދަލުގެ އަގު ބޮޑުވެ، އެ ގައުމުގެ ވިޔަފާރީގެ ޑެފިސިޓް އިތުރުވާނެ ކަމަށް ބެލެވެއެވެ. ހާއްސަކޮށް ތެޔޮ އިމްޕޯޓް ކުރުމަށް އިންޑިއާއިން ކުރަންޖެހޭ ހޭދަ ބޮޑުވުމަކީ އިގްތިސާދަށް އޮތް ބޮޑު ގޮންޖެހުމެއްގެ ގޮތުގައި ގިނަ ބަޔަކު ފާހަގަކުރެވެއެވެ.

މި ބަދަލާއެކު، އިންޑިއާގެ މަރުކަޒީ ބޭންކް، ރިޒާވް ބޭންކް އޮފް އިންޑިއާ (އާރު.ބީ.އައި) އިން ފައިސާގެ އަގު ކޮންޓްރޯލް ކުރުމަށް ފިޔަވަޅުތަކެއް އަޅާނެ ކަމަށް މާކެޓް އެނަލިސްޓުން ލަފާކުރެއެވެ. މީގެ ކުރިންވެސް ރުޕީސްގެ އަގު މާ ބޮޑަށް ދަށަށްދާ ދަނޑިވަޅުތަކުގައި އާރު.ބީ.އައި އިން ވަނީ ބާޒާރަށް ޑޮލަރު ވިއްކައިގެން އަގު ހިފެހެއްޓުމަށް މަސައްކަތް ކޮށްފައެވެ.