އޮސްޓްރޭލިޔާ ބަލިކޮށް، ފުރަތަމަ ފަހަރަށް އިންގްލެންޑް ވޯލްޑްކަޕް ފައިނަލުން ޖާގަ ހޯދައިފި!

އޮސްޓްރޭލިޔާ އާއި ނިއުޒިލޭންޑުގައި މިހާރު ކުރިއަށްދާ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ސެމީފައިނަލްގެ އޮސްޓްރޭލިޔާ ބަލިކޮށް، މުބާރާތުގެ ފައިނަލުން ފުރަތަަމަ ފަހަރަށް އިންގްލެންޑުން ޖާގަ ހޯދައިފި އެވެ. މި މެޗު އެޓީމުން ކާމިޔާބުކުރީ 3-1 ގެ ނަތީޖާއަކުން ނެވެ

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ އިންގްލެންޑުން ނެވެ. މިލަނޑު ފުރަތަމަ ހާފުގެ 36 ވަނަ މިނެޓުގައި ކާމިޔާބުކޮށްދިނީ އެޓީމުގެ މެންޗެސްޓާ ޔުނައިޓެޑްގެ މިޑްފީލްޑަރު އެލާ އެން ޓޫން އެވެ. މިއީ އޮސްޓްރޭލިޔާގެ ޕެނަލްޓީ އޭރިއާގެ ތެރެއިިން އެޓީމުގެ އާސެނަލް ފޯވާޑް އެލެސިއާ ރޫސޯ ފަހަތަށް ޖައްސާލި ބޯޅައެއް އެއްފަހަރުން ޖަހައި ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

މިލަނޑާއެކު ފުރަތަމަ ހާފުގެ ކުޅުން ނިމިގެންދިޔައީ 1-0 ގެ ނަތީޖާއަކުން އިންގްލެންޑް ކުރީގައި އޮވެގެންނެވެ.

މެޗުގެ ދެވަަނަ ހާފުގައި އޮސްޓްރޭލިޔާ އިން ވަނީ އެޓީމުގެ ކުޅުން ރަނގަޅުކޮށް މެޗުގެ ނަތީޖާ އެއްވަރުކޮށްފައެވެ. މިލަނޑު ދެވަނަ ހާފުގެ 63 ވަނަ މިނެޓުގައި ކާމިޔާބުކޮށްދިނީ އެޓީމުގެ ޗެލްސީ ފޯވާޑް ސަމަންތާ އެވެ. މިއީ އެޓީމުގެ މިޑްފިލްޑަރު ކެޓްރީނާ ލީ ގޯރީ ތަނަވަސްކޮށްދިން ފުރުސަތެއްގައި އިންގްލޭންޑްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާ ގޯލްގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

އިންގްލެންޑުން މިމެޗުގައި ދެވަނަ ފަހަރަށް ލީޑު ހޯދި ލަނޑު ދެވަނަ ހާފުގެ 71 ވަނަ މިނެޓުގައި ކާމިޔާބުކޮށްދިނީ މެންޗެސްޓާ ސިޓީގެ ފޯވާޑް ލޯރެން ހެމްޕް އެވެ. އަދި އެޓީމުގެ ތިންވަނަ ލަނޑު 86 ވަނަ މިނެޓުގައި ކާމިޔާބުކޮށްދިނީ އާސެނަލް ފޯވާޑް އެލެސިއާ ރޫސޯ އެވެ.

މިލަނޑާއެކު މެޗުގެ ކުޅުން ނިމިގެންދިޔައީ 3-1 ގެ ނަތީޖާއަކުން އިންގްލެންޑް ކުރީގައި އޮވެގެންނެވެ. މިއާއެކު 2015 އަދި 2019 ވަނަ އަހަރުގެ ވޯލްޑްކަޕް ސެމީ ފައިނަލުން ކެޓި އިންގްލެންޑަށް ވަނީ އަންހެނުންގެ ވޯލްޑްކަޕް ފުޓުބޯޅަ މުބާރާތުގެ ފައިނަލުން ފުރަތަަމަ ފަހަރަށް ޖާގަ ލިބިގެން ގޮސްފައެވެ.

މުބާރާތުގެ ފައިނަލްގައި އިންގްލެންޑުން ނުކުންނާނީ ސްޕެއިން އާއި ދެކޮޅަށެވެ. މިމެޗު ކުޅުމަށް ހަމަޖެހިފައިވަނީ މިމަހުގެ 20 ވަނަ ދުވަހުގެ ހަވީރު 15:00 ގައެވެ.

މުބާރާތުގެ ތިންވަނަ ހޮވާ މެޗުގައި މިމަހުގެ 19 ވަނަ ދުވަހުގެ މެންދުރުފަހު 13:00 ގައި އޮސްޓްރޭލިޔާ ނުކުންނާނީ ސްވިޑެން އާއި ދެކޮޅަށެވެ.