ރާއްޖެ ޖުމްހޫރިއްޔަތަކަށް ބަދަލުވި ގޮތް ގެނެސްދިނުމަށް މީޑިއާތަކަށް މޫސާ ގޮވާލައިފި

ރާއްޖޭގެ ޖުމްހޫރިއްޔަތަށް 50 އަހަރު ފުރޭ މިއަހަރުގައި މިއޮތް މަދު ދުވަސްކޮޅު ގިނަގިނައިން ޖުމްހޫރިއްޔަތާއި ބެހޭ މައުލޫމާތުތައް ވީހާވެސް ފުޅާދާއިރާއެއްގައި މީޑިއާތަކުން ގެނެސްދިނުމަށް ރައްޔިތުން މަޖިލީހުގެ ނައިބު ރައީސް މޫސާ މަނިކު އިލްތިމާސްކުރައްވައިފިއެވެ.

މޫސާ މަނިކު މިހެން ވިދާޅުވީ 17 ނޮވެންބަރު ގައި އިންތިހާބީ ރައީސް ހުވާކުރައްވާ ރަސްމިއްޔާތަށް ރާއްޖޭގެ ހުރިހާ ރައްޔިތުންނަށް ދައުވަތު ދެއްވުމުގެ ގޮތުން މަޖިލިސްގައި ބޭއްވި ނޫސްވެރިންގެ ބައްދަލުވުމެއްގައެވެ.

ރާއްޖޭގެ ތާރީހް ނޯޅޭގޮތައް ވަކިފަރާތަކަށް ބުރަނުވެ ރާއްޖޭގެ ޖުމްހޫރީ ވެރިކަން ފެށިގެން އައިގޮތާއި، މިހާތަނަށް ޖުމްހޫރިއްޔަތު ހިނގާފައި އޮތް ގޮތާއި، ޖުމްހޫރިއްޔަތުގެ ބޭނުމަކީ ކޮބައިކަމާމެދު ރައްޔިތުން ދެކޭގޮތް މީޑިއާ ތަކުން ރައްޔިތުންނަށް އަންގައިދިނުމަށް މޫސަ އެދިވަޑައިގަތެވެ.

މޫސަ އިތުރަށް ވިދާޅުވީ ޖުމްހުރީ ދުވަހަކީ ރާއްޖޭގެ ހުރިހާ ފަރާތަކުންވެސް ފާހަގަ ކުރަންޖެހޭ ދުވަހެއްކަމަށާއި މިދުވަސް ފާހަގަ ކުރުމަށް އެންމެހާ މުއައްސަސާތަކަށް މަޖިލީސްގެ ފަރާތްތަކުން ގޮވާލާކަމަށެވެ.

"ޖުމްހޫރިއްޔަތަކީ މުޅި ރާއްޖޭގެ ހުރިހާ ރައްޔިތުން، އުފައްދާ ސަރުކާރު އައިސްގެން އެމީހުންގެ ވެރިކަންކުރާ ކަމަކަށްވާތީ ހަމަ އެކަނި މަޖިލިސް، މީގަ ބައިވެރިވިއެއް ކަމަކު، މަޖިލިސް މީގެ އިސްނެގިއެއްކަމަކު، ސަރުކާރާއި ދައުލަތުގެ އެހެން މުއައްސަސާތަކަށްވެސް އަޅުގަނޑުމެން ގޮވާލަން، މީގެ ބޮޑުބައި މި ރައްދުވަނީ ރައްޔިތުން ނިންމާ ވޯޓަކުން ނިންމާ ވެރިކަމެއް އަންނަ ކަމެއް ކަމަށްވާތީ، މުޅި ހުރިހާ ރައްޔިތުންވެސް މި މުނާސަބު ފާހަގަ ކުރުމަކީ، މަޖިލީހުގެ ރައީސާއި މެމްބަރުންގެވެސް އެދުމެއް،" މޫސަ ވިދާޅުވި އެވެ.

މީގެ އިތުރުން 17 ނޮވެންބަރުގައި އިންތިހާބީ ރައީސް ހުވާކުރާ ޖަލްސާ ރަސްމީ ފުޓްބޯޅަ ދަނޑުގައި ބޭއްވުމަށް މަސައްކަތް ކުރެވެމުން ދާކަމުގެ މައުލޫމާތުވެސް މޫސަވަނީ ހިއްސާ ކުރައްވާފައެވެ. މި ޖަލްސާއަށް ކޮންމެ ސިޔާސީ ޕާޓީއަކަށްވެސް ދައުވަތު ކާޑުތައް ހަވާލު ކުރާނެކަމަށާއި، އެއީ އެބޭފުޅުން ބޭނުން ފަރާތަކަށް ދައުވަތު އެރުވުމަށް ކަމަށްވެސް މޫސަ ވިދާޅުވިއެވެ.

އޭގެ އިތުރުން މި ރަސްމިއްޔާތަށްް ރާއްޖެއިން ބޭރުގެ ގައުމު ތަކުގެ އިސް ވެރިންނާއި، ކުރީގެ ހުރިހާ ރައީސުންނާއި، ނައިބު ރައީސުންގެ އިތުރުން ދައުލަތަށް ގިނަ ދުވަހު ހިދުމަތް ކުރެއްވި ބޭފުޅުންނަށްވެސް ދައުވަތު އަރުވާނެ ކަމުގައިވެސް މޫސަ ހާމަކުރެއްވިއެވެ.