ޢީދު ފާހަގަކުރުމުގެ ނަމުގައި މީހުންނަށް ފުރައްސާރަކޮށް، ދީނާ ފުށުއަރާކަންކަން ކޮށްގެން ނުވާނެ: ޢީދު ޚުތުބާ

ބަރަކާތްތެރި އަޟުޙާ ޢީދުގެ އުފާ ފާޅުކުރުމުގައި އިސްލާމީ ޝަރީޢަތުގެ މިންގަނޑުތަކުން ބޭރުނުވުމަށާއި، ޢީދުގެ ނަމުގައި މީހުންނަށް ފުރައްސާރަކުރުމާއި ދީނާ ފުށުއަރާ ކަންކަން ނުކުރުމަށް މިއަދުގެ ޢީދު ޚުތުބާގައި ގޮވާލައިފިއެވެ.

"ޢީދުގެ އަދަބުތައް" މި މައުޟޫޢަށް ރާއްޖޭގެ އެކިކަންކޮޅުތަކުގައި މިއަދު އިއްވި ޢީދު ޚުތުބާގައި ބުނެފައިވާ ގޮތުގައި، ޢީދަކީ މުސްލިމުން ކައިބޮއި އުފާފާޅުކޮށް ކުޅިވަރު ކުޅޭން އޮތް ދުވަސްތަކެއް ނަމަވެސް، އެކަންކަން އޮންނަންވާނީ އިސްލާމީ އިންތަކުގެ ތެރޭގައެވެ. އެގޮތުން ޢީދު ފާހަގަކުރުމުގެ ނަމުގައި މީހުންނަށް މަލާމާތްކުރުމާއި، އަންހެނުން ފިރިހެން ހެދުން އެޅުމާއި، ފިރިހެނުން އަންހެން ހެދުން އެޅުމުގެ އިތުރުން ދެޖިންސު މަސްހުނިވެގެން ކުޅިވަރު ކުޅުމަކީ ދުރުހެލިވާންޖެހޭ ކަންކަން ކަމުގައި ޚުތުބާގައި ބުންޏެވެ.

ޢީދު ފާހަގަކުރުމުގެ ނަމުގައި މީހުންނަށް ފުރައްސާރަކުރުމާއި މަލާމާތްކުރުމާއި އަންހެނުން ފިރިހެން ހެދުން އެޅުމާއި ފިރިހެނުން އަންހެން ހެނދުން އެޅުމާއި ދެޖިންސު މަސްހުނިވެގެން ކުޅިވަރުކުޅުމާއި މިކަންކަމުން ދުރުހެލިވާންޖެހޭނެއެވެ. އަދި ޢީދުގެ އެންމެހައި ޙަރަކާތްތައް އިންތިޒާމުކުރާ ފަރާތްތަކުން މާތް اللهއަށް ބިރުވެތިވެ، އިސްލާމްދީނާ ފުށުއަރާ ކަންތައްތަކާއި އެހެން ދީންތަކުގެ ޝިޢާރުތަކާ އެއްގޮތްވާ ކަންކަމުން ދުރުހެލިވުމަކީ ވާޖިބެއްކަން ހަނދާންކުރާށެވެ! ޢީދުގެ އުފާ ފައުޅުކުރާ އިރު، އިސްލާމީ ޘަޤާފަތާ ޚިލާފު، އިސްލާމީ ޝަރުޢީ މިންގަނޑަށް ނުފެތޭ އެންމެހައި ކަންކަމުން ދުރުހެލިވުމަށް ނަސޭހަތްތެރިވަމެވެ.

ޚުތުބާ

ޚުތުބާގައި ބުނި ގޮތުގައި މިއަދަކީ މުޅި އަހަރުތެރޭގައި އަންނާނެ އެންމެ މާތް ދުވަސްތަކުގެ ތެރެއިން ދުވަހެކެވެ. ޢީދުގައި މާތް الله ދެއްވި ނިޢުމަތްތަކަށް ޝުކުރުވެރިވެ ގިނަގިނައިން ތަކުބީރުކިޔުމަކީ ގަދަވެގެންވާ ސުންނަތެކެވެ. ޙައްޖުމަސް ފެށުމާއެކު އެމަހުގެ 13 ވަނަ ދުވަހުގެ ނިޔަލަށް ގޭގޭގައްޔާއި މަގުތަކުގައި އަޑުހަރުކޮށް ތަކުބީރުކިޔުމަކީ ރަސޫލާގެ އަޞްޙާބު ބޭކަލުންގެ ޢަމަލުފުޅު ހުރި ގޮތްކަން ޚުތުބާގައި ހަނދާންކޮށްދިނެވެ.

އަޟުޙާ ޢީދުގެ އެންމެ މުހިންމު އެއް އަޅުކަން ކަމުގައިވާ އުޟްޙިޔާ ކަތިލުމާ ގުޅޭގޮތުން ވާހަކަދައްކަމުން، އެއީ އިބްރާހީމް ޢަލައިހިއްސަލާމާއި އެކަލޭގެފާނުގެ ދަރިކަލުން އިސްމާޢީލް ޢަލައިހިއްސަލާމް މާތް اللهގެ އަމުރުފުޅަށް ކިޔަމަންތެރިވެ ވެވަޑައިގަތް މަތިވެރި ޤުރުބާނީގެ ހަނދާން އާކޮށްދޭ ކަމެއް ކަމަށް ޚުތުބާގައި ބުންޏެވެ. އަދި އުޟުޙިޔާ ކަތިލުމަކީ މިއަދުގެ އިސްލާމީ ޝަރީޢަތުގައި ވެސް ގަދަވެގެންވާ ސުންނަތެއްކަން ބަޔާންކުރިއެވެ.

މިއަދުގެ ޚުތުބާގައި ވަނީ ރާއްޖޭގައި މަސައްކަތްކުރާ ބިދޭސީ މުސްލިމުންނަށް ޢީދުގެ ތަހުނިޔާ ކިޔައި، އެމީހުން ޢީދުގެ އުފަލުގައި ބައިވެރިކުރުމަށް ބާރުއަޅާފައެވެ. ހަމައެއާއެކު، ދުނިޔޭގެ އެކި ކަންކޮޅުތަކުގައި ނިކަމެތި ހާލުގައި ތިބި މުސްލިމުންނާއި، ޚާއްޞަކޮށް ފަލަސްޠީނ ފަދަ ޤައުމުތަކުގައި ޤަތުލުޢާންމުތަކާ ކުރިމަތިލަމުންދާ އަޚުންނާއި އުޚުތުންގެ މަތިން ހަނދާންކޮށް، އެމީހުންނަށްޓަކައި ހެޔޮ ދުޢާކުރުމަށް އިލްތިމާސްކުރިއެވެ.

ނިންމާލަމުން ޚުތުބާގައި ގޮވާލާފައިވަނީ، ޢީދުގެ ބޮޑު ޖަމާޢަތުން ވަކިވުމުގެ ކުރިން އެކަކު އަނެކަކަށް މަޢާފުކޮށް، ހިތްތައް ސާފުކުރުމަށެވެ. އަދި ބޮޑާކަމާއި ޙަސަދަވެރިކަން ހިތުން ފިލުވައިލުމަށާއި، ޤިޔާމަތް ދުވަހުގެ ބިރުވެރިކަން ހަނދާނަށް ގެނެސް ސަލާމަތް ހިތަކާއިގެން މާތް اللهއާ ބައްދަލުކުރުމަށް ތައްޔާރުވުމަށެވެ.