ރެއާލްގެ ފަރިތަކުރުންތަކުގައި ކޯޓުއާ އަށް އަނިޔާވެ ސީޒަން ނިންމާލަން ޖެހިއްޖެ

ރެއާލް މެޑްރިޑްގެ ބެލްޖިއަމް ގޯލް ކީޕަރު ތިބައު ކޯޓުއާ އަށް އަނިޔާވެ އިތުރު ދެމަހެއްހާ ދުވަހު ކުޅުމާއި ދުރުގައި ހުންނަންޖެހިއްޖެއެވެ. އަދި މިއާއެކު ކުރިއަށް އޮތް ޔޫރޯ ފުޓްބޯޅަ މުބާރާތުގައި ކޯޓުއާ ފެނިދާނެތޯ ވަނީ ސުވާލު އުފެދިފައެވެ.

އުމުރުން 31 އަހަރުގެ ކީޕަރު، މިދިޔައަހަރުގެ އޮގަސްޓު މަހުގެ ވައަތް ފަރާތު ކަކުލަށް ލިބުނު އަނިޔާއަކާއި ގުޅިގެން ކަކުލުގެ އޮޕަރޭޝަނެއް ކޮށްފައިވާ އިރު، ރެއާލްގެ ފަރިތަކުރުންތަކުގައި އޭނާ ބައިވެރިވާން ފެށީ ދާދިފަހުންނެވެ. އަދި މިއަދު ޓީމުގެ ފަރިތަކުރުންތަކުގައި ބައިވެރިވަމުން ދަނިކޮށް އަނިޔާވެފައިވަނީ ކޯޓުއާގެ ކަނާތު ކަކުލަށެވެ.

މިދިޔަ ސީޒަނުގައި ރެއާލް މެޑްރިޑުގައި އެންމެ މޮޅު ކުޅުމެއް ދެއްކި އެއްކުޅުންތެރިއަކީ ކޯޓުއާއެވެ. ނަމަވެސް އަނިޔާގެ ސަބަބުން މިސީޒަނުގައި އޭނާއަށް އަދި މެޗެއް ކުޅެވޭގޮތެއް ނުވެއެވެ.

ލީގުގައި ރެއާލް މެޑްރިޑުން 29 މެޗު ކުޅެފައިވާއިރު 72 ޕޮއިންޓާއެކު ލީގު ތާވަލުގެ އެއްވަނާގައި ރެއާލް މެޑްރިޑް އޮތީ 8 ޕޮއިންޓްގެ ލީޑަކާއެކު އެވެ. އަދި މިސީޒަނުގެ ޗެންޕިްއަންސް ލީގުގެ ކުއާޓާ ފައިނަލުން އެޓީމު ޖާގަ ހޯދަފައިވާއިރު، ކުއާޓާގައި ރެއާލް މެޑްރިޑް ވާދަކުރަން ޖެހިފައިވަނީ އެންމެ ފަހުގެ ޗެމްޕިއަން މެންޗެސްޓާ ސިޓީ އާއި ދެކޮޅަށެވެ.