އޭސީސީގެ ރައީސްގެ މައްސަލައެއް ފަނޑިޔާރު އަޒްމިރަލްދާ އޭސީސީއަށް ހުށައަޅުއްވައިފި
ލިޔުންތެރިޔާ
އަހުމަދު ހަމީދު އާދަމް
އޭސީސީގެ ރައީސް އާދަމް ޝާމިލްގެ މައްސަލައެއް ސުޕްރީމް ކޯޓްގެ ފަނޑިޔާރު ޑރ. އަޒްމިރަލްދާ ޒާހިރު، އެ ކޮމިޝަނަށް ހުށައަޅުއްވައިފި އެވެ.
އޭސީސީން ތަހުގީގު ކުރާ މައްސަލައަކާއި ގުޅިގެން ކަމަށް ބުނެ އަޒްމިރަލްދާ ހިމެނޭހެން ސުޕްރީމް ކޯޓްގެ ތިން ފަނޑިޔާރަކު ޖޭއެެސްސީން ވަނީ ސަސްޕެންޑް ކޮށްފަ އެވެ.
އަޒްމިރަލްދާ ދެކެވަޑައިގަންނަވާ ގޮތުގައި އެއީ ނުވެސް ނެތް ހާލަތެއް ބޭނުން ކުރައްވައިގެން އޭސީސީގެ ރައީސް ފޮނުއްވެވި ސިޓީއަކާއި ގުޅިގެން ޖޭއެސްސީން ނިންމާފައިވާ ނިންމުމެކެވެ. އަދި އޭސީސީގެ ރައީސް އެފަދަ ސިޓީއެއް ފޮނުއްވާފައި ވަނީ މަގާމުގެ މިނިވަންކަން ދޫކޮށްލާ ވަކި ބައެއްގެ ނުފޫޒުގައި މަގާމު ދިފާއު ކުރެއްވުމަށްޓަކަ އެވެ. އެހެން ކަމުން މަގާމުގެ ނުފޫޒު ނަހަމަގޮތުގައި ބޭނުންކޮށްގެން ދޮގު މައުލޫމާތު ދެެއްވި ކަމުގެ ތުހުމަތު ކުރައްވާ ޝާމިލްގެ މައްސަލަ ބައްލަވައި ދެއްވުމަށް އަޒްމިރަލްދާ ވަނީ އެދިވަޑައިގެންފަ އެވެ.
އެކަމަނާ ހުށައެޅުއްވި މައްސަލާގައި ވިދާޅުވީ ޝާމިލް، އެ ސިޓީ ފޮނުއްވާފައި ވަނީ އިޖުރާއަތުތަކާ އުސޫލުތަކުގެ ބޭރުން ކަމަށް ގަބޫލުކުރެވޭ ކަމަށެވެ. އަދި އެ ސިޓީގައި ސިޓީ ނަމްބަރެއް ނެތްކަން ފާހަގަކޮށް ސިޓީ ފޮނުވާފައި ވަނީ އެކަމަށް ހާއްސަ ނިޒާމުގެ ބޭރުން އަތުން އަތަށް ކަމަށް ވެސް ވަނީ ވިދާޅުވެފަ އެވެ.
މީގެ އިތުރުން އެކަމަނާގެ މައްޗަށް ޖިނާއީ މައްސަލައެއް ތަހުގީގު ކުރަމުންދާ ކަމަށް ވިދާޅުވެ ޝާމިލް ދެއްވީ ދޮގު މައުލޫމާތުތަކެއް ކަމަށާ އަވަސް އަރުވާލައިގެން ނިޒާމުން ބޭރުން އެފަދަ ސިޓީއެއް ފޮނުއްވީ ސުޕްރީމް ކޯޓުގައި ތާވަލްކޮށްފައި އޮތް ޝަރީއަތެއް ހުއްޓުވާލާ ފަނޑިޔާރުންގެ މަސައްކަތާ ބެހި ނުފޫޒު ފޯރުވުމަށް ކަމަށް ވެސް ވިދާޅުވި އެވެ.
އަދި އެއީ ޝާމިލް، އޭނާގެ އަމިއްލަ މަގާމު ދިފާއުުކުރުމުގެ މަސްހަލަތުގައި ކޮށްފައިވާ ކަމެއް ކަމަށް ތުހުމަތު ކުރެވޭތީ ޖިނާއީ އެ ކުށް އަވަހަށް ތަހުގީގު ކޮށް ދެެއްވުމަށް އެދިވަޑައިގެންފައިވެ އެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
