މެދުކެނޑުމަކަށްފަހު ފްލެޓް އެއްބަސްވުންތަކުގައި ސޮއިކުރަން ފަށައިފި

މިނިވަންދުވަހާ ގުޅިގެން އައި ބަންދަށްފަހު ގެދޮރުވެރިޔާ ސްކީމުން ދޫކުރުމަށް ހަމަޖެހިފައިވާ ފްލެޓް އެއްބަސްވުންތަކުގައި ސޮއިކުރުމުގެ މަސައްކަތް އަލުން ފަށައިފިއެވެ.

މިކަމާ ގުޅޭގޮތުން ފަހިދިރިއުޅުން ކޯޕަރޭޝަނުގެ އޮފިޝަލަކު ވޮއިސްއާ މައުލޫމާތު ހިއްސާކުރަމުން ވިދާޅުވީ، ފްލެޓް އެއްބަސްވުންތަކުގައި ސޮއިކުރުމުގެ ކަންކަން ކުރިއެކޭ އެއްގޮތަށް ކުރިއަށްދާކަމަށެވެ. އެއްބަސްވުމުގައި ސޮއިކުރުން ކުރިއަށްގެންދަނީ ހުޅުމާލޭ ފޭސް އެކެއްގެ ސިންތަޓިކް ޓްރެކް ސަރަހައްދުގައި އެކަމަށް ހާއްސަކޮށް ހަދާފައިވާ ތަނުގައި ހެނދުނު 9 އަކުން ފެށިގެން ހަވީރު 4 ޖެހުމާ ހަމަޔަށެވެ.

އެފްޑީސީން ބުނީ ވެރިފައިކޮށް ނިމިފައިވާ ފޯމްތަކުގެ ތެރެއިން މިދިޔަ ބްރާސްފަތި ދުވަހުގެ ނިޔަލަށް ޖުމްލަ 92 މީހުންނާއެކު އެއްބަސްވުމުގައި ސޮއިކޮށް ނިމިފައިވާކަމަށެވެ.

ފްލެޓް އެއްބަސްވުންތަކުގައި ސޮއިކުރަން ފެށިފަހުން މިހާތަނަށް ކުރިމަތިވާކަމަށް ފާހަގަކުރެވުނު އެންމެބޮޑު އެއް މައްސަލައަކީ ސޮއިކުރަން އަންނައިރު ޕޯޓަލަށް ފޮނުވާފައި ހުންނަ މައުލޫމާތު ފުރިހަމަނުވުމުގެ މައްސަލަކަމަށް އެފްޑީސީން ބުނެއެވެ. އެގޮތުން  ފޮނުވާފައި ހުންނަ އައިޑީކާޑުފަދަ ލިޔުންތައް ސާފް ނުވުމުގެ މައްސަލަ ހިމެނެއެވެ.

އެޕާޓްމަންޓް އެއްބަސްވުންތަކުގައި ސޮއިކުރުމުގެ ކަންކަން ކުރިއަށްގެންދަނީ، ހައުސިން މިނިސްޓްރީން ފޯމުތައް ވެރިފައިކުރުމަށްފަހު ދޭ ތަރުތީބުންނެވެ. ހައުސިން މިނިސްޓްރީން އެމީހެއްގެ ނަން އެފްޑީސީއަށް ފޮނުވުމުން ގެދޮރުވެރިޔާ ޕޯޓަލުން އެ މައުލޫމާތު އަޕްޑޭޓްވިކަމަށް އެމީހެއްގެ ފޯނަށް މެސެޖެއް ފޮނުވާއިރު، އެއްބަސްވުމުގައި ސޮއިކުރަންޖެހޭ ފަރާތްތަކަށް އެކަން އަންގަނީ، އެފްޑީސީގެ "ފަހި ޕޯޓަލަށް ލޮގިންވުމަށް އަންގާ ޓެކްސްޓް މެސެޖަކުންނެވެ.

އެފްޑީސީ ޕޯޓަލަށް އަޕްލޯޑްކުރަންޖެހޭ ލިޔުންތަކުގެ ތެރޭގައި ފްލެޓް ލިބޭމީހުންގެ އައިޑީކާޑާއި، ހެކިވެރިޔާ އައިޑީކާޑްގެ އިތުރުން ބަދަލުގައި ސޮއިކުރަން މީހަކު ފޮނުވާނަމަ އެމީހެއްގެ މައުލޫމާތު ހިމެނެއެވެ.

އެއްބަސްވުމުގައި ސޮއިކުރުމަށް ގެންދަންޖެހޭ ލިޔެކިއުންތައް:

1- ކުއްޔަށްހިފާ ފަރާތުގެ އައިޑީކާޑުގެ ދެފުށް ފެންނަ ސާފު 2 ކޮޕީ

2- ކޯ-އެޕްލިކަންޓުގެ އައިޑީކާޑުގެ ދެފުށް ފެންނަ ސާފު 2 ކޮޕީ

3- ހެކިވެރިޔާގެ އައިޑީކާޑުގެ އަސްލު އަދި 2 ކޮޕީ

4- ޒިންމާއަދާކުރާ ފަރާތުން ސޮއިކޮށްފައިވާ ފޯމުގެ އަސްލު

5- އެހެނިހެން ގުޅުންހުރި ލިޔެކިޔުންތައް

ގެދޮރުވެރިޔާ ސްކީމުން ދޫކުރާ އެޕާޓްމަންޓްތަކުގެ އެއްބަސްވުމުގައި ސޮއިކުރަން ފަށާފައިވާއިރު، މިހާރު ހަމަޖެހިފައިވާގޮތުން އަނބިމީހާ ނުވަތަ ފިރިމީހާއަށް ބިންވެރިޔާ ސްކީމްގެ ދަށުން ގޯތި ލިބިފައި އޮތް ނަމަވެސް، އެޕާޓްމަންޓް ލިބެއެވެ.

އެފްޑީސީއިން ތަރައްޤީކުރަމުންދާ 4000 ސޯޝަލް ހައުސިންގ ޔުނިޓް މަޝްރޫޢުގައި 16 ޓަވަރު ހިމެނޭއިރު، 96 އިންސައްތަ މަސައްކަތް ނިމިފައިވާކަމަށް އެކުންފުނިން ބުނެއެވެ. އެފްޑިސީން ބުނީ އެޕާޓްމަންޓްތައް ހަވާލުކުރުމަށް ހަމަޖެހިފައިވަނީ ފިނިޝިންގ މަސައްކަތްތައް ނިންމާފައިކަމަށެވެ. އަދި އަމާޒަކީ ސެޕްޓެމްބަރުމަހުގެ ނިޔަލަށް ހުރިހާ އެޕާޓްމަންޓްތައް ހަވާލުކޮށް ނިންމާލުންކަމަށްވެސް އެޗްޑީއެފްސީން ބުނެއެވެ.