ސިޔާސީ ކަންކަމުން ދުރަށްވަޑައިގަންނަވަނީކަމުގެ އިޝާރާތެއް ރައީސް ޔާމީން ދެއްވައިފި

ރިޔާސީ އިންތިޚާބުގައި އިއްޔެ ރާއްޖޭގެ ރައްޔިތުން އެމީހުން ބޭނުންވާގޮތް ނިންމައިފިކަމަށާއި އެނިންމުމަށް އިޙްތިރާމް ކުރައްވައި ސިޔާސީ ދާއިރާއިން ދުރަށް ވަޑައިގަންނަވާކަމުގެ އިޝާރާތެއް ރައީސް އަބްދުﷲ ޔާމީން ދެއްވައިފިއެވެ. އެމަނިކުފާނު މިގޮތަށް އިޝާރާތްކުރައްވައި ވާހަކަފުޅު ދެއްކެވީ އިންތިޚާބުގެ ނަތީޖާއަށްފަހު ފުރަތަމަ ފަހަރަށް ރައްޔިތުންނާ މުޚާތަބު ކުރައްވައި ރައީސް އޮފީހުގައި ވާހަކަފުޅު ދައްކަވަމުންނެވެ.

" ދިވެހި ރައްޔިތުންގެ ކުރިމަތީގައި މިހާތަނަށް އަޅުގަޑު މިކުރީ އިޚްލާސްތެރި މަސައްކަތް. އެކަމަކު އިއްޔެ ރައްޔިތުން އަޅުގަޑުގެ ޚިދުމަތާދޭތެރޭ ގޮތެއް ނިންމައިފި. އެހެންވީމާ އަޅުގަޑު ގަސްދުކުރަނީ އިއްޔެގެ ނަތީޖާ އަޅުގަޑު ގަބޫލުކޮށްފަ، އަނެއްކާވެސް އަޅުގަޑަށް ވެވުނުމިންވަރަކުން ރައްޔިތުންނަށް ޚިދުމަތްކުރަން" އަދިވެސް ވިދާޅުވިއެވެ.

" އަޅުގަޑު ނެތިން އެއްގޮތަކަށްވެސް އަޅުގަޑު ކަންކުރާގޮތުން ދިވެހި ރައްޔިތުންނަށް ތަކުލީފަކަށް ވާކަށް އަޅުގަޑުނެތިން. ރައްޔިތުން ރައްޔިތުންގެ ބަސްވިދާޅުވެއްޖެ. އެއަށް އަޅުގަޑު އިހްތިރާމްކުރަން. އެހެންވީމާ އަޅުގަޑު މިވަގުތު ރައްޔިތުންގެ އަރިހުން މައާފަށް އެދެމުން އަޅުގަޑު ޚިދުމަތުން ދުރަށް ޖެހިލާވާހަކަ ހުރިހާ ރައްޔިތުންނަށް ދަންނަވަން.އަޅުގަޑަށް ވޯޓްދެއްވި ހުރިހާ ރައްޔިތުންނަށް، އަޅުގަޑަށް ތާއީދުކޮށްދެއްވި ހުރިހާ ބޭފުޅުންނަށް ފަށްފަށުން ޝުކުރުދަންނަވަން. އަދިވެސް އިރާދަކުރެއްވިޔާ އަޅުގަޑުމެން އަޅުގަޑުމެންގެ މަސައްކަތް ރައްޔިތުންނަށްޓަކާ ކުރުމަށްޓަކާ އަޅުގަޑުމެން ސާބިތުވެ ތިބޭނަން. އެހެންނަމަވެސް އަޅުގަޑު އަޅުގަޑުގެ މިޚިދުމަތުން ދުރަށް ޖެހިލަންޖެހޭކަމަށް އަޅުގަޑަށް ގަބޫލުކުރެވޭތީ އިރާދަކުރެއްވިޔާ ނޮވެމްބަރ 17 އަންނަންދެން މިގޮޑީގާ އަޅުގަޑު މަސައްކަތްކުރާނަން"

ރައީސް އަބްދުﷲ ޔާމީން ވިދާޅުވީ ރައީސް ކަމުގެ މަގާމަށް ރައްޔިތުން އިންތިޚާބުކުރި އިބްރާހިމް މުހައްމަދު ސާލިހާއި އެމަނިކުފާނު ބައްދަލުކުރައްވައި މަރުހަބާ ވިދާޅުވެފައިވާނެކަމަށެވެ. އެއްސަރުކަރުން އަނެއް ސަރުކާރަށް ވެރިކަން ބަދަލުކުރުމުގެ ކަންކަން ވަރަށް އަމާންކަމާއެކު ކުރިއަށް ގެންދަވާނެކަމަށް ވިދާޅުވިއެވެ.

ރައީސް ޔާމިންގެ ވާހަކަފުޅުން އިންތިޚާބުގެ ނަތީޖާއިން ވަރަށް ފުން އަސަރުކޮށްފައިވާކަން އެގެއެވެ. ވިދާޅުވީ އެމަނިކުފާނު ހީކުރެއްވީ އެތައް ޒަމާނަކުއްސުރެ ދިވެހި ރައްޔިތުން މަހްރޫމްވެފައިވާ އަސާސީ ޚިދުމަތްތަކަކީ ރައްޔިތުންގެ އެންމެ ބޮޑު ސަމާލުކަންދޭނެކަންކަން ކަމަށް ބައްލަވައިގެން އެކަންކަން ފުރިހަމަކޮށްދެއްވުމަށް އެހެން ސަރކާރަކުން ނުކުރާހާ ގިނަ ބުރަ މަސައްކަތްތަކެއްކޮށް ނަތީޖާ ނުކުމެފައިވީނަމަވެސް ރައްޔިތުންނަށް އެއީ އެންމެ ބޮޑުކަންތައް ނޫންކަމަށް އިންތިޚާބުގެ ނަތީޖާއިން އެގިގެން ހިގައްޖެކަމަށެވެ. އެހެންވީމާ ރައްޔިތުން ބޭނުންވަނީ ކޮންކަންތައްތަކެއްބާއޭ ސުވާލުކުރެއްވިއެވެ.