ނޭމާ އަނބުރާ ބާސެލޯނާއަށް ގެންދަން ފަންޑް ހޯދުމަށް ކޯޓީނިއޯ ވިއްކާލަނީ
ކޯޓީނިއޯ ވިއްކާލުމަށްފަހު ލިބޭ ފަންޑުން ނޭމާ އަނބުރާ ބާސެލޯނާއަށް ގެންނަން އުޅޭ ކަމުގައި ދުނިޔޭގެ ކުޅިވަރު ހަބަރުތައް ގެނެސްދޭ ވަރުގަދަ މީޑިއާތަކުން ރިޕޯޓް ކޮށްފިއެވެ.
ލިވަޕޫލްއުން ކޯޓީނިއޯ ބާސެލޯނާއަށް ބަދަލުވީ 142 މިލިއަން ޕައުންޑަށެވެ. މި ޓްރާންސްފާ ފީ އާއެކު އޭނާ ހިމެނިފައިވަނީ ދުނިޔޭގެ އެންމެ އަގުބޮޑު ފުޓްބޯޅަ ކުޅުންތެރިންގެ ލިސްޓްގެ ތިންވަނައިގައެވެ.
ބާސެލޯނާ ދޫކޮށް ނޭމާ ފްރާންސްގެ ޕީއެސްޖީއަށް ބަދަލުވިތަން ފޫބެއްދުމަށްޓަކައި ބާސެލޯނާއިން ބޮޑު އަގެއް ދެއްކުމަށްފަހު ގެނައި ކޯޓީނިއޯއަށް މި ސީޒަނުގައި އެދެވޭ ކުޅުމެއް ދެއްކިފައެއް ނުވެއެވެ. ބާސެލޯނާއަށް ބަދަލުވެގެން ކުޅުނު ފުރަތަމަ ހަ މަސް ދުވަހުގެ ތެރޭގައި މޮޅު ކުޅުމެއް ދައްކައި 22 މެޗުގައި ކޯޓީނިއޯވަނީ 10 ލަނޑު ކާމިޔާބުކޮށްދީފައެވެ.
ނަމަވެސް މި ސީޒަނުގައި ފޯމް ގެއްލިފައިވާ ކޯޓީނިއޯގެ ފަރާތުން މޮޅު ކުޅުމެއް ފެންނަ ގޮތްވަނީ ނުވެފައެވެ. އޭގެ ނަތީޖާއެއްގެ ގޮތުން ބާސެލޯނާ އެންމެ ފަހުން ކުޅުނު ފަސް މެޗުގައި ކޯޓީނިއޯއަށް ފުރަތަމަ އެގާރައިން ޖާގަ ލިބިފައިވަނީ އެންމެ މެޗަކުންނެވެ.
ނޭމާ ގަތުމަށް ފައި ވިއްދާލާފައިވާ ބާސެލޯނާއަށް އެކަން ކުރެވެން އޮތީ އެޓީމުގައި ތިބި ބައެއް ކުޅުންތެރިން ވިއްކާލައިގެން ކަމަށައި ވިއްކާލާ ކުޅުންތެރިންގެ ލިސްޓުގައި ކޯޓީނިއޯ ހިމެނޭކަމަށްވެސް މައުލޫމާތު ލިބެއެވެ.
ނޭމާ ދޫކޮށްލުމުގެ ވިސްނުމެއް ނުގެންގުޅޭ ކަމުގައި ޕީއެސްޖީއިން ފާޅުގައި ބުނެފައިވާއިރު ނޭމާވަނީ އޭނާ ބާސެލޯނާގައި ހޭދަކުރި ދުވަސްތައް މަތިން ވަރަށް ހަނދާންވާކަމުގައި އެކި ފަހަރުމަތިން ތަކުރާރުކޮށް ބުނެފައެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
