ވިކްޓޯ ޔޯކެރޭސް އާސެނަލްއަށް

ޕޯޗުގަލްގެ ސްޕޯޓިން ލިޒްބަންއަށް ކުޅެމުންއައި ސްވިޑެންގެ ފޯވާޑް ވިކްޓޯ ޔޯކެރޭސް އާސެނަލްއަށް ވިއްކާލުމަށް ސްޕޯޓިން ކުލަބުން އެއްބަސްވެއްޖެ އެވެ.

މީޑިއާ ރިޕޯޓުތައް ބުނާގޮތުފައި އުމުރުން 27 އަހަރުގެ ފޯވާޑް ވިއްކާލުމަށް ސްޕޯޓިން ލިޒްބަން އިން އެއްބަސްވީ 73.5 މިލިއަން ޔޫރޯ (87 މިލިއަން ޑޮލަރު) ގެ ޓްރާންސްފަރ ފީއަކަށެވެ. އެއީ ފުރަތަމަ 63.5 މިލިއަން ޔޫރޯ ދެއްކުމަށްފަހު ބޯނަސްގެ ގޮތުގައި އިތުރު 10 މިލިއަން ޔޫރޯގެ އަގެއް ހިމަނައިގެންނެވެ.

މީގެ އިތުރުން އާސެނަލް އާއެކު ފަސް އަހަރު ދުވަހުގެ އެއްބަސްވުމެއްގައި ސޮއިކުރުމައްޓަކައި ސްޕޯޓިންގެ ހުއްދައާ އެކު ރޭގެ ވަގުތެއްގައި ޔޯކެރޭސް ލަންޑަނަށް ގޮސް،ފައިވާއިރު، މިއަދުގެ ވަގުތެއްގައި މެޑިކަލް ފުރިހަމަ ކުރުމަށް ފަހު، އާސެނަލްގެ އޭޝިއާ ޓުއާގައި ޔޯކެރޭސް ބައިވެރި ވާގޮތަށް ވަނީ ހަމަޖެހިފައެވެ.

އޭޝިއާ ޓުއާގައި އާސެނަލް ކުޅުނު ފުރަތަމަ މެޗުގައި ސިންގަޕޫރުގައި އޭސީ މިލާނާއި ވާދަކޮށް 1-0 ގެ ނަތީޖާއަކުން މޮޅުވެފައިވާއިރު، އަންނަ އާދިއްތަ ދުވަހު ނިއުކާސަލް ޔުނައިޓެޑާ ދެކޮޅަށް ކުޅުމަށް ފަހު ބުރާސްފަތި ދުވަހު ހޮންގް ކޮންގްގައި ޓޮޓެންހަމާއި ދެކޮޅަށް ކުޅެން ވަނީ ތާވަލް ކޮށްފަ އެވެ.

ޔޯކެރޭސް އާސެނަލް އަށް ބަދަލުވާން ބޭނުންވެގެން ސްޕޯޓިންގެ ޕްރީސީޒަން ފަރިތަކުރުންތަކުގައި ބައިވެރި ނުވުމުގެ އިތުރުން ޓްރާންސްފާގެ މުއާމަލަތުގައި އާސެނަލުން ސީދާ ކުޅުންތެރިޔާއި ވާހަކަ ދެއްކުމުން، އެ ސްޕޯޓިންގެ ރައީސް ފްރެޑްރީކޯ ވެރަންޑަސް، ވަނީ އެކަމާއި ހިތްހަމަނުޖެހި ނުރުހުންފާޅު ކޮށްފަ އެވެ.

ކުރިއަށް އޮތް ސީޒަނަށް ޓީމު އިތުރަށް ވަރުގަދަކުރުމުގެ ގޮތުން އާސެނަލް އިން ވަނީ ޗެލްސީގެ ކުރީގެ ކީޕަރު ކެޕާ އަރިޒަބަލާގާ އާއި އިނގިރޭސި ވިންގާ ނޮނީ މަޑުއެކޭ އަދި ވެލެންސިއާގެ ޑިފެންޑަރު ކްރިސްޓިއަން މޮސްކޭރާގެ އިތުރުން ރެއާލް ސޮސިއެޑާޑްގެ މިޑްފީލްޑަރު މާޓިން ޒުބިމެންޑީ އަދި ބްރެންޓްފޯޑްގެ މިޑްފީލްޑަރު ކްރިސްޓިއަން ނޯގާޑް ވެސް އެޓީމަށް ސޮއި ކުރުވައިފަ އެވެ.