ޕީއެންސީގެ ދާއިރާތަކުގެ އިންތިހާބު ނޮވެމްބަރަށް ފަސްކޮށްފި
ޕީޕަލްސް ނޭޝަނަލް ކޮންގްރެސް (ޕީއެންސީ) އިން މިދިޔަ މަހު ބޭއްވުމަށް ނިންމި، އެ ޕާޓީގެ ދާއިރާތަކުގެ އިންތިހާބު އަންނަ ނޮވެންބަރު މަހަށް ފަސްކޮށްފިއެވެ.
ޕީއެންސީން ނެރުނު އިއުލާނެއްގައި ބުނީ، 19 އޮކްޓޫބަރުގައި ބޭއްވުމަށް ހަމަޖެހިފައިވާ މި އިންތިހާބު ބާއްވާ ތާރީހު ފަސްކޮށް، 9 ނޮވެންބަރުވާ ހޮނިހިރު ދުވަހު ބޭއްވުމަށް ހަމަޖެހިފައިވާ ކަމަށެވެ.
ހަމައެއާއިއެކު، އެޕާޓީން މި މަގާމުތަކަށް ކުރިމަތިލުމުގެ މުއްދަތުވެސް ވަނީ 24 އޮކްޓޫބަރުގެ އިރުއޮއްސި 6:00 އާއި ހަމައަށް އިތުރުކޮށްފައެވެ.
ޕީއެންސީން ހާމަކުރި ގޮތުގައި، އިންތިހާބު ބާއްވާ ތާރީހާއި މަގާމުތަކަށް ކުރިމަތިލުމުގެ މުއްދަތު އިތުރުކޮށްފައިވަނީ މަގާމުތަކަށް ޝައުގުވެރިވާ ގިނަ ބަޔަކު އެކަމަށް އެދޭތީ އެވެ.
މަގާމުތަކުގެ ގޮތުގައި ޕީއެންސީން އިންތިހާބުކުރާ މަގާމުތަކަކީ:
1) ދާއިރާގެ ރައީސުން/ނައިބު ރައިސުން
2) ޒުވާނުންގެ ހަރަކާތުގެ ރައީސުން
3) އަންހެނުންގެ ހަރަކާތުގެ ރައީސުން
4) ސްޓިއަރިން ކޮމިޓީ މެންބަރުން
މީގެ ތެރެއިން ސްޓިއަރިން ކޮމިޓީ އަށް އިންތިހާބުކުރާ މެމްބަރުންނަކީ އާއްމު ކޮމިޓީގެ މެމްބަރު، ޒުވާނުންގެ މެމްބަރު އަދި އަންހެނުންގެ މެމްބަރެވެ.
ޕީއެންސީން ބުނީ، މި ބަދަލާއިއެކު، އިންތިހާބުގައި ވޯޓް ލެވޭނީ އިންތިހާބުގައި ވާދަކުރުމަށް ފޯމު ހުށަހެޅުމަށް ދީފައިވާ ތާރީހާއި ހަމައަށް ޕާޓީ އޮފީހަށް މެމްބަރޝިޕް ފޯމު ހުށަހަޅާ ކޮންގްރެސް ޕާޓީގެ މެމްބަރުންނަށް ކަމަށެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
