ކަނޑުގެ ރާޅުން ހަކަތަ އުފައްދަން ސްޓެލްކޯއިން ދިރާސާއެއް ފަށައިފި
ލިޔުންތެރިޔާ
ޚަދީޖާ އަރުފާ
ކަނޑުގެ ރާޅުން ހަކަތަ އުފެއްދުމަށްޓަކައި ދިރާސާކުރުމުގެ މަސައްކަތް ސްޓެލްކޯއިން ފަށައިފިއެވެ.
'ވޭވް މޮނިޓަރިން ޕްރޮޖެކްޓް'ގެ ނަމުގައި ސްޓެލްކޯއިން ދިރާސާއެއް ފަށާފައިވާއިރު މި މަސައްކަތުގެ ދަށުން ކަނޑުގެ އޮއިން ހަކަތަ އުފެއްދުމަށް ބޭނުންވާ މައުލޫމާތު އެއްކުރުމަށް ވަނީ ހަމަޖެހިފައެވެ.
ސްޓެލްކޯގެ މެނޭޖިންގ ޑިރެކްޓަރ ހުސައިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވިގޮތުގައި، މި މަޝްރޫޢުގެ މަޤްޞަދަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅެއް ކަމުގައިވާ ރާއްޖޭގައި ބޭނުންކުރާ ހަކަތައިގެ 33 އިންސައްތަ އައުކުރަނިވި ހަކަތައިން އުފެއްދުމުގެ ލަނޑުދަނޑިއަށް ވާސިލުވުމަށް މަގުފަހިކުރުމެވެ.
އަދި މި މަޝްރޫޢުގެ ދަށުން ރާޅުގެ ހަރަކާތްތައް ދެނެގަތުމަށް ޚާއްޞަ ޓެކްނޮލޮޖީއެއް ބޭނުންކުރާނެ ކަމަށާ މި ޓެކްނޮލޮޖީ މެދުވެރިކޮށް ރާޅުގެ ހަރަކާތްތަކާއި ބާރުމިނާ ގުޅޭ މަޢުލޫމާތު އެއްކޮށް، އެ މަޢުލޫމާތު ދިރާސާކުރާނެ ކަމަށެވެ. މިއީ ރާއްޖޭގައި އިޔާދަކުރަނިވި ހަކަތަ އުފެއްދުމަށް އިތުރު ވަސީލަތެއް ތަޢާރަފުކުރުމުގެ މުހިންމު ފިޔަވަޅެއް ކަންވެސް ފާހަގަކުރައްވާފައިވެއެވެ.
ފަހުމީ އިތުރަށް ވިދާޅުވީ ކަނޑުގެ ރާޅުން ހަކަތަ އުފެއްދުމަކީ އަވީގެ ހަކަތައާ އަޅާބަލާއިރު އިތުރު ފައިދާތަކެއް ލިބިދާނެ ކަމެއް ކަމަށެވެ. އޭގެ ތެރޭގައި މޫސުމަށް އަންނަ ބަދަލުތަކުގެ އަސަރު ކުޑަވުމާއި، ގިނަ ވަގުތު ހަކަތަ އުފެއްދުމުގެ ފުރުޞަތު އޮތުން ހިމެނެއެވެ. މީގެ އިތުރުން މި މަޝްރޫޢުގެ ސަބަބުން ރާއްޖޭގެ ހަކަތައިގެ ވިއުގަ އިތުރަށް ހަރުދަނާވެ، އިތުބާރު ބޮޑުވާނެ ކަމަށްވެސް ފަހުމީ ފާހަގަކުރެއްވިއެވެ.
މި މަޝްރޫޢަކީ ރާއްޖޭގެ ދެމެހެއްޓެނިވި ތަރައްޤީއަށް ސްޓެލްކޯއިން ކުރަމުންދާ މަސައްކަތްތަކުގެ ތެރެއިން އިތުރު ފިޔަވަޅެއް ކަމަށާއި، ރައީސް ޑރ. މުޢިއްޒުގެ ސަރުކާރުން ކަނޑައަޅާފައިވާ އައުކުރަނިވި ހަކަތައިގެ ލަނޑުދަނޑިތައް ހާސިލުކުރުމަށް އެހީތެރިވެދޭނެ ކަމެއް ކަމަށްވެސް ވިދާޅުވިއެވެ.
މި ލިޔުން ކަމުދިޔަނަމަ، ލައިކެއް ދެއްވާ
ކޮމެންޓް ކުރޭ
ކޮމެންޓްސް
މިހާތަނަށް ކޮމެންޓެއް ނެތް
