ޖަލުގައި ހިނގާ މަރުތަކަކީ އިންސާފުވެރިކަމާއިއެކު ތަހުގީގުކުރާ މައްސަލަތަކެއް: ވަޒީރު އިހުސާން

ރާއްޖޭގެ ޖަލުތަކުގައި ހިނގާ މަރުތަކަކީ އިންސާފުވެރިކަމާއިއެކު ތަހުގީގުކުރާ މައްސަލައެއްކަމަށް ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވެއްޖެއެވެ.

މާފުށީ ޖަލުގައި ޝަރީޢަތް ނިމެންދެން ބަންދުކޮށްފައި ހުރި ގައިދީއެއް ކަމަށްވާ މުޙައްމަދު ޖަމީލް މަރުވުމާއި ގުޅިގެން އެކްސްގައި ކުރެއްވި ޕޯސްޓެއްގައި ވަޒީރު އިހުސާން ވިދާޅުވީ، ޖަލުތަކުގައި ހިނގާ ކޮންމެ މަރަކީ ވެސް އިންސްޕެކްޓަރ އޮފް ކަރެކްޝަނަލް ސާވިސް އިން މިނިވަން ކަމާއި އެކު ތަހުގީގު ކުރާ މައްސަލައެއް ކަމަށެވެ.

ވަޒީރު އިހުސާން ވިދާޅުވީ، ގައިދީއެއްގެ މަރެއްގައި ޝައްކުވާ ކަމެއް އެކުލެވޭނަމަ، އެ ގައިދީއެއްގެ މަރުގެ މިނިވަން ތަހުގީގެއް ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް) އިން ވެސް ކުރިއަަށްގެންދާނެ ކަމަށެވެ.

" ޖަލުތަކުގައި ހިނގާ މަރުތަކުގެ ކޮންމެ ކޭސް އަކީ ވެސް އިންސްޕެކްޓަރ އޮފް ކަރެކްޝަނަލް ސާވިސް އިން މިނިވަންކަމާއި އެކު ތަހުގީގު ކުރާ މައްސަލައެއް. އަދި ގައިދީއެއްގެ މަރުގައި ޝައްކުވާ ކަމެއް އެކުލެވޭނަމަ އެޗްއާރުސީއެމް އިން ވެސް މިނިވަން ތަހުގީގެއް ކުރިއަށްގެންދާނެ."

ވަޒީރު އިހުސާން ވިދާޅުވިއެވެ.

އެގޮތުން، ޖަމީލްގެ މަރުގެ މައްސަލަ ވެސް ތަހުގީގު ކުރުމަށް ފުލުހުންނަށް އަންގާފައިވާނެ ކަމަށް ވަޒީރު އިހުސާން ވިދާޅުވިއެވެ.

ޖަމީލް މަރުވީ "ކާޑިއޯޕަލްމޮނަރީ އެރެސްޓް" އެއްގައި ކަމަށް ޑޮކްޓަރުން ވަނީ ކަނޑައަޅާފައިވާއިރު، ވަޒީރު އިހުސާން ވިދާޅުވީ، ޖަމީލްގެ ޖަލު ގޮޅީގައި ހުންނަ ސީސީޓީވީ ފުޓޭޖުން ފެންނަ ގޮތުގައި އޭނާ ހުރީ ނަމާދުކުރަން ކަމަށާއި، މަރުވެފައި އޮއްވާ ފެނުނީ ސަޖިދައިގައި އޮއްވާ ކަމަށެވެ.

ވަޒީރު ވިދާޅުވީ، މި ތަހުގީގު ކުރިއަށްދާއިރު، ކަމާ ބެހޭ އިދާރާތަކަށް ދޭން ޖެހޭ ފުރިހަމަ އެއްބާރުލުން ކަރެކްޝަނަލް ސާވިސް އިން ދެމުންގެންދާނެ ކަމަށާއި، މި މަރު ތަހުގީގު ކުރާ ފަރާތްތަކަށް ކަރެކްޝަނަލް ސާވިސްއިން ސީސީޓީވީ ފޫޓޭޖް ވެސް ހިއްސާ ކުރާނެ ކަމަށެވެ.

އާއިލާއިން ހުއްދަދީފި ނަމަ ޖަމީލްގެ ޕޯސްޓްމޯޓަމް ހެދުމަށްވެސް ފުލުހުންނަށް އަންގާފައިވާ ކަމަށް ވަޒީރު ވިދާޅުވި ނަމަވެސް، އާއިލާގެ ހުއްދަ އެކަމަށް ނުލިބުމުން، ޖަމީލްގެ ހަށިގަނޑު ވަނީ މިއަދު ފަތިހު ވަޅުލާފައެވެ.

ނުރައްކާތެރި އަދި ތޫނު ހަތިޔާރު ބޭނުންކޮށްގެން މާރާމާރީ ހިންގުމުގެ މައްސަލައެއްގައި ބަންދުކޮށްފައި ހުރި ޖަމީލު ގޮޅިން ބޭރަށް ނުނިކުމެ، ހަރަކާތް ނުކޮތް ގިނައިރު އޮތްކަން ފާހަގަ ކުރެވިގެން މާފުށީ ޖަލުގެ މެޑިކަލް ސެންޓަރަށް ގެންގޮސް ސީޕީއާރް ދީފައިވާ ކަމަށް ކަރެކްޝަނުން ވަނީ ބުނެފައެވެ.

ނަމަވެސް، ހާލަތަށް އެއްވެސް ބަދަލެއް ނައުމާ ގުޅިގެން، 12:13 ހާއިރު މާފުށީ ސިއްޙީ މަރުކަޒަށް ގެންގޮސް އޭނާއަށް ފަރުވާ ދޭން ފެށި ކަމަށާ، 12:45 ގައި ޑޮކްޓަރު ވަނީ މުޙައްމަދު ޖަމީލްގެ ހިތް ހުއްޓިގެން ނިޔާވިކަމަށް ކަނޑައަޅާފައިވާ ކަމަށް ކަރެކްޝަންސް އިން މައުލޫމާތު ދީފައިވެއެވެ.