ރިސޯޓް ލީގު 2023: ދެވަަނަ މެޗުގައި ރަސްފުށި އަތުން ބަނޑޮހަށް އުދަގޫ މޮޅެއް!

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތް 2023 ގެ ނޯތު މާލޭ ޒޯނުގައި މިއަދު ހަވީރު ކުޅެވުނު ފުރަތަމަ މެޗުގައި ގުރޫޕް "ބީ" ގައި 0-1 ގެ ނަތީޖާއަކުން ރަސްފުށި ބަލިކޮށް ބަނޑޮހުން ގުރޫޕްގެ އެއްވަނައިގައި ހަމަޖެހިލައިފި އެވެ.

މެޗުގެ ފުރަތަަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ އިރު، މިހާފުގައި ލަނޑު ޖަހާނެ އެންމެ ހުސް ފުރުސަތެއް ލިބުނީ ރަސްފުށި ޓީމަށެވެ. އެގޮތުން ފުރަތަމަ ހާފުގައި އެޓީމުން ނުރައްކާތެރި ދެ ހަމަލާއެއް ބަނޑޮސް ގެ ގޯލާއި އަމާޒުކޮށް ފޮނުވާލިއިރު، މިހާފުގައި ބަނޑޮހުން އުފައްދަން މަސައްކަތްކުރި ގިނަ އެޓޭކްތައް ރަސްފުށީގެ ކުޅުންތެރިން ވަނީ ބްލޮކް ކޮށްފައެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް ލަނޑެއް ކާމިޔާބު ނުކުރެވި ދެޓީމު އެއްވަރުވެގެންނެވެ.

ފުރަތަަމަ މެޗުގައި ތަފާތުބޮޑުކޮށް މޮޅުވި ބަނޑޮހުން ދެވަނަ ހާފުގައި އެޓީމުގެ އެޓޭކްތައް އިތުރަށް ވަރުގަދަ ކުރުމުގެ ނަތީޖާއެއްގެ ގޮތުން ފަހު ހާފުގެ 31 ވަނަ މިނެޓުގައި އެޓީމުން ލަނޑެއް ކާމިޔާބުކޮށް މެޗުގެ ލީޑު ހޯދިއެވެ. މިލަނޑު އެޓީމަށް ކާމިޔާބުކޮށްދިނީ އިބްރާހިމް މުޝީރު އެވެ.

މި މެޗުގެ މޭން އޮފް ދަ މެޗަކަށް ހޮވުނީ ވެސް މި މެޗުގައި ފެނިގެންދިޔަ ހަމައެކަނި ލަނޑު ކާމިޔާބުކޮށްދިން ބަނޑޮސް ޓީމުގެ އިބްރާހީމް މުޝީރު އެވެ.

މި މެޗުން ލިބުނު ތިން ޕޮއިންޓާއެކު ދެމެޗުން ހަ ޕޮއިންޓް ހަމަކޮށް ގުރޫޕް އެއްވަނައިގައި މިވަގުތު އޮތީ ބަނޑޮހެވެ. އަދި މި މެޗުން ބަލިވި ރަސްފުށި މުބާރާތުގައި ކުޅުނު ދެ މެޗުން ވެސް، އެޓީމު ވަނީ ބަލިވެފަ އެވެ.

ރިސޯޓް ލީގު 2023 ގެ ނޯތު މާލޭ ޒޯނުގައި މިއަހަރު 17 ޓީމެއް ބައިވެރިވެފައި ވާއިރު، މި ޒޯނުގެ މެޗުތައް ކުރިއަށް ގެންދިއުމަށް ހަމަޖެހިފައިވަނީ ހަތަރު ގުރޫޕަކަށް ބަހާލައިގެން ކޮންމެ ގްރޫޕަކުން ވެސް އެންމެ ރަގަޅު ނަތީޖާއެއް ހޯދާ ދެޓީމު ކުއާޓާ ފައިނަލަށް ހޮވޭގޮތަށެވެ.

މި ޒޯނުގެ ހުރިހާ މެޗެއްވެސް ވަން އެންޑް އޮންލީ ރީތިރަށުގައި ކުޅުމަށް ހަމަޖެހިފައިވާއިރު، ގުރޫޕް "އޭ" ގައި ފަސް ޓީމު ހިމެނޭއިރު، އަނެއް ތިން ގުރޫޕްގެ ތެރެއިިން ކޮންމެ ގުރޫޕެއްގައި ހިމެނެނީ ހަތަރު ޓީމެވެ.