ރިސޯޓް ލީގު 2023: ޕްލޭއޮފް މެޗުގައި ވިލުރީފު ބަލިކޮށް ސެމީ ފައިނަލުގެ ފަހުޖާގަ ބަގްލިއޯނީއަށް!

ރާއްޖޭގެ ރިސޯޓް ދާއިރާގައި ބާއްވާ އެންމެ ބޮޑު ކުޅިވަރު ހަރަކާތް، ރިސޯޓް ލީގު ފުޓްސަލް މުބާރާތުގެ ދާލު ޒޯނުގެ ގްރޫޕް ބީގެ ޕްލޭއޮފް މެޗުގައި މިއަދު ހަވީރު ބަގްލިއޯނީ އާއި ވިލުރީފު ވާދަކުރި މެޗު 2-1 ގެ ނަތީޖާއަކުން ކާމިޔާބުކޮށް ބަގްލިއޯނީ އިން މުބާރާތުގެ ސެމީފައިނަލެ ފަހު ޖާގަ އެޓީމުން ކަށަވަރުކޮށްފިއެވެ.

ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔަ މިމެޗުގައި ފުރަތަަމަ ލަނޑުޖަހައި ކުރިހޯދީ ބަގްލިއޯނީ އިންނެވެ. މި ލަނޑު ފުރަތަމަ ހާފުގެ 08 ވަނަ މިނެޓުގައި ކާމިޔާބުކޮށްދިނީ މުހައްމަދު ރައިސާން އެވެ. މިއީ އެޓީމުގެ މުހައްމަދު އިޔާސް ޝާހިދު ތަނަވަސްކޮށްދިން ފުރުސަތެއްގައި ވިލުރީފްގެ ޕެނަލްޓީ އޭރިއާ ބޭރުން ފޮނުވާލި ބާރު ހަމަލާއެއް ގޯލުގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ބަގްލިއޯނީ އިން މި މެޗުގައި އެޓީމުގެ ލީޑު ފުޅާކުރީ ފުރަތަަމަ ހާފުގެ 15 ވަނަ މިނެޓުގައެވެ. މިލަނޑު އެޓީމަށް ކާމިޔާބުކޮށްދިނީ އިސްމާއިލް ނާހިޒް އެވެ. މިއީ ވިލުރީފުގެ ހާފުގެ މެދެއްހާ ހިސާބު އަރިމަތިން ލިބުނު ޖެހުމެއްގައި ތިރިތިރިން ފޮނުވާލި ބާރު ހަމަލާއެއް ގޯލުގެ ކަނަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ.

ވިލުރީފުން ނަތީޖާގެ ފަރަގު ކުޑަކުރީ ފުރަތަަމަ ހާފުގެ އިތުވަގުތުގެ ތެރޭގައެވެ. މި ލަނޑު އެޓީމަށް ކާމިޔާބުކޮށްދިނީ ކެޕްޓަން އަހުމަދު ނިމާލް އެވެ. މިއީ އެޓީމަށް ލިބުނު ދުރު ޕެނަލްޓީގައި ފޮނުވާލި ބާރު ހަމަލާ ގޯލްގެ މަތީ ދާގަނޑަށް އަމާޒުކޮށްލައިގެން އޭނާ ކާމިޔާބުކޮށްދިން ލަނޑެކެވެ. މިއާއެކު ފުރަތަަމަ ހާފުގެ ކުޅުން ނިމިގެންދިޔައީ 2-1 ގެ ނަތީޖާއަކުން ދެޓީމް އެއްވަރުވެފައި އޮވެގެންނެވެ.

މެޗުގެ ދެވަަނަ ހާފުގައި ދެޓީމުގެ ފަރާތުން ވަރަށް ވާދަވެރި ކުޅުމެއް ފެނިގެންދިޔަ އިރު، މިހާފުގައި ދެޓީމުން ވެސް ވަނީ ލަނޑުޖަހާނެ ރަގަޅު ފުރުސަތުތަކެއް ތަނަވަސްކޮށްފައެވެ. ނަމަވެސް މެޗުގެ ކުޅުން ނިމިގެންދިޔައީ ދެޓީމުންކުރެ އެއްވެސް ޓީމަކަށް އިތުރު ލަނޑެއް ކާމިޔާބު ނުކުރެވި 2-1 ގެ ނަތީޖާއަކުން ބަގްލިއޯނީ ކުރީގައި އޮވެގެންނެވެ.

މެޗުގެ ދެވަަނަ ހާފުގައި ބަގްލިއޯނީގެ ކީއްޕަރުގެ ފަރާތުން މޮޅު ކުޅުމެއް ފެނިގެންދިޔައިރު، މި މެޗުގެ މޭން އޮފް ދަ މެޗަކަށް ހޮވުނީ ވެސް ބަގްލިއޯނީގެ ކީއްޕަރު  މުހައްމަދު ޒަޔާން އެވެ.